[1] Muhaakamat madiinat Dimachkh. Dimachkh battaan ma tukuun madiina. Hi tilhaddam wa tabga koom hana turaab.
[2] Wa mudun Aruuʼir yakhrabo wa yabgo bakaan le l-bahaayim. Al-bahaayim yarugdu fooghum wa ma fi naadum yibachtinhum.
[3] Al-mudun al-gawiyiin fi Afraayim // yiddammaro wa muluk Dimachkh kula yagiif. Al-faddalo min balad Araam, charafhum yabga ma fiih misil charaf Bani Israaʼiil. Wa da kalaam Allah al-Gaadir.
[4] Wa fi l-yoom da, charaf zurriiyit Yaakhuub yangus misil naadum al-laham jildah wa chahamah daffag.
[5] Wa humman yabgo misil al-zereʼ baʼad al-gatiʼ wakit al-gatiʼiin lammo al-gameh be katara. Wa da misil wakit yikachchubu al-ganaadiil fi waadi Rafaayiin.
[6] Al-yifaddil minhum yabga chiyya misil al-kichcheeb aw misil al-faddal baʼad hatto chadar al-zaytuun. Waahid aw tineen yifaddulu foog // fi raas al-chadara wa arbaʼa aw khamsa fi l-furuuʼ. Wa da kalaam Allah Ilaah Bani Israaʼiil.
[7] Wa fi l-yoom da, al-insaan yitwakkal ale Ilaahah al-khalagah wa yiwajjih be amaan ale Khudduus Israaʼiil.
[8] Wa battaan ma yintakil ale l-madaabih al-sawwathum iidah wa ma yiwajjih be amaan fi l-sawwaah be asaabʼah. Wa dool al-iidaan al-khazzaahum le ibaadat Achiira wa l-makhaabir hana l-bakhuur.
[9] Wa fi l-yoom da, al-mudun al-gawiyiin yikhalluuhum misil khallo al-khaaba // wa ruuse al-jibaal wakit Bani Israaʼiil jo chaalo al-balad, kulla l-balad takhrab.
[10] Achaan intu nisiitu Ilaahku al-najjaaku wa ma fakkartu foogah hu, // jabal maljaʼku. Wa fi chaan da, maggantu chadar laziiz wa teerabtu teeraab ajnabi.
[11] Wa yoom maggantuuhum, intu chiftuuhum kibro wa ambaakir fajur, chiftu nuwwaarhum. Wa laakin fi wakt al-gatiʼ, ma ligiitu intaaj wa wajaʼku ma indah ilaaj.
[12] Al-azaab ! Daahu al-hiss al-chadiid hana chuʼuub al-ma induhum adad. Harakathum chadiide misil harakat al-bahar wa hissuhum chadiid misil hiss almi al-seel.
[13] Wa harakat al-chuʼuub misil harakat almi al-katiir. Wakit al-Rabb yugumm didduhum, humman yiʼarrudu baʼiid, matruudiin misil uttaab giddaam riih min al-jibaal wa misil haskaniit giddaam amzoobaʼaane.
[14] Wa fi l-achiiye, ruʼub ! Wa gabul al-fajur, ma faddal cheyy ! Da bas gisim al-naas al-yanhaboona wa mukaafaat al-naas al-yaksaboona.