[1] Al-azaab le l-yikharruru churuut hana fasaala wa yaktubu gawaaniin hana taʼab !
[2] Humman yadharo al-miskiin min al-chariiʼa wa yaglaʼo al-hagg min fagraan chaʼabi. Wa yaksabo al-araamil wa yanhabo al-ataama.
[3] Intu tisawwu chunu fi yoom al-ikhaab, wakit al-halaak yaji leeku min baʼiid ? Le yaatu tajru wa min yaatu talgo al-fazaʼ ? Wa ween tudummu khunaaku ?
[4] Ma faddal illa tidanguru maʼa l-masaajiin wa tagaʼo maʼa l-maytiin. Wa be da kula, zaʼal Allah ma yagiif wa iidah gaaʼide marfuuʼa le l-ikhaab.
[5] Al-azaab le malik balad Achuur ! Hu asaat zaʼali wa ninazzil khadabi be l-asa al-fi iidah.
[6] Ana nirassil malik balad Achuur didd al-umma al-kaafre wa nuguudah didd al-chaʼab al-yigawwumu khadabi achaan malik Achuur yanhabhum wa yaksabhum wa yifajjikhhum tihit rijileenah misil al-tiine fi l-chawaariʼ.
[7] Wa laakin hu ma yafham misil da wa galbah kula ma yifakkir misil da. Achaan fi galbah illa l-damaar wa katil al-umam be katara.
[8] Achaan hu gaal : «Khuyyaadi ma ziyaada min al-muluuk dool walla ?
[9] Wa dammarna hillit Kalna misil hillit Karkamiich wa hillit Hamaat misil hillit Arfad wa madiinat al-Saamira misil madiinat Dimachkh !
[10] Iidi kula dammarat mamaalik al-ilaahaat al-asnaamhum katiiriin min asnaam Madiinat al-Khudus wa l-Saamira.
[11] Hal ana ma nidammir Madiinat al-Khudus wa asnaamha misil dammart al-Saamira wa ilaahaatha walla ?»
[12] Wa wakit al-Rabb yikammil kulla khidimtah fi jabal Sahyuun wa fi Madiinat al-Khudus, hu yuguul : «Nugumm didd afkaar al-istikbaar hana malik balad Achuur wa choofah hana l-bukhud.
[13] Achaan al-malik da gaal : ‹Be gudrat iidi, ana sawweet kulla l-cheyy da wa be hikmati, ana bigiit faahim. Ana khayyart huduud al-chuʼuub wa nahabt maalhum wa be faraasiiye nazzalt muluuk min karaasiihum.
[14] Wa misil yichiilu beed min al-uchch, ana khataft khuna al-chuʼuub. Wa misil yukhummu al-beed al-khallooh, ana khammeet kulla buldaan al-ard. Wa ma fi waahid harrak jinhah wa la fakka khachmah wa la sarakh diddi.›»
[15] Wa Allah gaal : «Hal al-faas tafchur fi siidha al-yagtaʼ beeha walla ? Hal al-munchaar yilʼalla fi l-yistaʼmalah walla ? Wa da misil al-asa tiharrik al-iid al-tarfaʼha walla misil al-dugul yigill al-insaan !
[16] Wa be sabab da, ana Allah al-Rabb al-Gaadir ninazzil al-batuul fi l-askar al-sumaan hana l-malik. Wa be azamathum di kula, al-naar taakulhum wa tahrighum.»
[17] Wa l-Rabb, nuur Israaʼiil, yabga misil naar aywa, Khudduus Israaʼiil yabga misil ambalbaala al-fi yoom waahid bas, taakul wa tahrig al-chook wa l-haskaniit.
[18] Be l-kaamil, al-Rabb yidammir al-khaabaat wa l-jineenaat al-kubaar // hana malik Achuur. Wa humman yabgo misil mardaan al-waddar gudurtah.
[19] Wa yifaddil chiyya bas min chadar khaabaatah lahaddi sakhiir sakhayyar kula // yagdar yahsibhum.
[20] Wa fi l-yoom da, al-yifaddulu min Bani Israaʼiil wa l-muʼarridiin wa l-nijo min zurriiyit Yaakhuub ma yintaklu ale malik Achuur al-darabaahum. Wa laakin yintaklu be amaan ale Allah Khudduus Israaʼiil.
[21] Wa l-yifaddulu yigabbulu. Aywa, al-yifaddulu min zurriiyit Yaakhuub yigabbulu le Allah al-Gaadir.
[22] Ya Bani Israaʼiil, kan chaʼabku bigo katiiriin misil ramla hana khachum al-bahar kula, al-yigabbulu minku chiyya bas. Kharaar al-damaar marag wa hu kharaar malaan be l-adaala.
[23] Wa khalaas, kharaar al-damaar da marag wa akiid Allah al-Rabb al-Gaadir yitabbigah fi kulla l-balad.
[24] Wa fi chaan da, daahu Allah al-Rabb al-Gaadir gaal : «Ya chaʼabi al-saakniin fi madiinat Sahyuun, ma takhaafo min malik balad Achuur. Hu gaaʼid yadrubku be asaatah wa yarfaʼ asaatah didduku misil sawwooh al-Masriyiin zamaan.
[25] Hassaʼ faddal wakit chiyya bas, khadabi didduku yagiif wa laakin zaʼali yidammir askar balad Achuur.»
[26] «Wa ana Allah al-Gaadir narfaʼ leyah al-soot wa nadurbah misil darabt naas Midyaan // fi hajar Uriib. Wa narfaʼ asaati didd al-bahar misil rafaʼtaha didd al-Masriyiin zamaan.
[27] Wa fi l-yoom da, narfaʼ tagalatah min kataafeeku wa nichiil al-daami min rigaabku wa l-daami yilkassar achaan tachbaʼo wa tabgo sumaan.»
[28] Wa askar Achuur yaju fi hillit Ayyat wa yuchuggu hillit Migruun wa fi hillit Mikmaach, yikhallu muʼiddaathum.
[29] Wa yagtaʼo al-maʼada wa yuguulu : «Fi l-leele di, nanzulu fi hillit Gabaʼ.» Wa be da, hillit al-Raama tarjif wa Gibeeʼa hillit Chaawuul sukkaanha yiʼarrudu.
[30] Asrakho, ya naas hillit Bitt Galliim ! Wa khutti baalki, ya hillit Laycha ! Wa hillit Anatuut al-Miskiine !
[31] Wa hillit Madmiina tiʼarrid wa sukkaan hillit Gabiim yifattuchu maljaʼ.
[32] Wa fi nafs al-yoom, askar Achuur yagiifu fi hillit Nuub wa yarfaʼo iideehum didd jabal Sahyuun al-misil bineeye wa da hajar al-foogah // Madiinat al-Khudus.
[33] Wa chiifu ! Daahu Allah al-Rabb al-Gaadir yidammir askar Achuur misil naadum yikassir al-furuuʼ be chidde. Wa misil yagtaʼ al-furuuʼ al-marfuuʼiin foog, Allah yikammil kubaaraathum wa l-aaliyiin kula, yarmiihum tihit.
[34] Wa da misil hu yagtaʼ chadar al-khaaba be faas wa khalaas, Lubnaan tagaʼ giddaam al-Aziim.