[1] Wa daahu Allah gaal : «Ahfado al-hagg wa sawwu al-adaala achaan najaati gariib taji wa adaalti gariib tibiin.
[2] Mabruuk le l-naadum // al-yitabbig kalaami wa le l-insaan al-yakurbah gawi wa yahfad al-sabt wa yihtarimah wa iidah ma tisawwi ayyi fasaala.
[3] Wa khalli al-ajnabi al-munrabit fi Allah ma yuguul : ‹Akiid Allah yafsulni min chaʼabah !› Wa khalli al-khasi ma yuguul : ‹Daahu ana bigiit // misil chadara yaabse !›»
[4] Achaan daahu Allah gaal : «Fi khasiyiin waahidiin yahfado yoomi hana l-sabt wa yisawwu al-ana nidoorah wa yagoodu saabtiin fi muʼaahadati.
[5] Humman dool, ana nantiihum fi beeti wa fi daraadiri alaama hana zikra ahsan min al-wulaad wa l-banaat. Wa nantiihum usum daayim al-abadan ma yingachcha.
[6] Fi ajaanib waahidiin anrabato fi Allah le yakhdumu leyah wa le yihibbu usum Allah wa le yabgo abiidah. Humman yahfado al-sabt wa yihtarumu wa yagoodu saabtiin fi muʼaahadati.
[7] Al-naas dool, ana niwaddiihum // fi jabali al-mukhaddas wa nifarrihhum fi beeti, // beet al-sala. Wa narda be dahaayaahum al-muharragiin wa dahaayaahum al-aakhariin al-humman yigaddumuuhum // fi madbahi. Achaan beeti yisammuuh beet al-sala le kulla l-chuʼuub.»
[8] Wa daahu kalaam Allah al-Rabb, hu al-yilimm muchattatiin Bani Israaʼiil. Hu gaal : «Ana nilimm battaan aakhariin maʼa l-lammeethum.»
[9] Intu kulluku haywaanaat al-kadaade ! Aywa, intu kulluku haywaanaat al-khaaba ! Taʼaalu aakulu !
[10] Muraakhibiin Bani Israaʼiil, kulluhum amyaaniin wa ma yaʼarfu cheyy. Humman misil kulaab bukum ma yagdaro yanbaho. Yahlamo raagdiin wa yihibbu al-noom.
[11] Humman misil kulaab akkaaliin al-ma yaʼarfu al-chabaʼ. Wa humman ruʼyaan al-ma yaʼarfu cheyy. Ayyi waahid chaayil derbah wa yifattich faayditah // be kulla niiytah.
[12] Wa yuguul : «Taʼaalu ! Khalli nichiil mariise wa naskaro be l-khamar al-chadiid ! Ambaakir nisawwu nafs al-cheyy achaan yifaddil leena katiir !»