[1] Al-azaab leek inta al-tikharrib wa laakin ma kharrabook wa leek inta al-tukhuun wa laakin ma khaanook. Wa wakit tikammil min al-kharaab, akiid yakharbuuk. Wa wakit tikammil min al-khiyaana, akiid yukhuunuuk.
[2] Ya Allah ! Hinn foogna ! Aniina nukhuttu achamna foogak. Abga gudritna fi kulli sabaah wa fi wakit al-diige, abga najaatna.
[3] Min haraka chadiide hana jaytak, al-chaʼab yiʼarrudu. Wa wakit inta tugumm, al-umam yichittu.
[4] Al-khaniime yilimmuuha be katara misil saar al-leel yaakulu al-chadar. Wa yagaʼo foogha misil wagiʼiin al-jaraad.
[5] Allah aziim achaan gaaʼid foog wa mala Sahyuun be l-hagg // wa l-adaala.
[6] Ya chaʼab Allah ! Kulla ayyaam hayaatku // yabgo amiiniin. Al-hikma wa l-maʼrafa dool khuna al-naja. Wa l-khoof min Allah yabga leeku misil kanz.
[7] Wa daahu al-furraas yiʼiitu fi l-chawaariʼ wa rusul al-salaam yabku be hurga.
[8] Wa l-chawaariʼ faadiyiin wa ma fi naadum maachi fi l-duruub. Al-mukharrib gataʼ al-muʼaahada wa le l-chuhuud, abaahum wa ma fakkar fi ayyi naadum.
[9] Al-balad jaffat wa yibsat aywa, Lubnaan yibsat // wa l-eeb karabha. Sahalat Chaaruun bigat misil al-sahara wa turaab Baachaan wa jabal al-Karmal waddaro khadaarhum.
[10] Wa Allah gaal : «Hassaʼ ana nugumm wa hassaʼ ana ninrafiʼ wa hassaʼ ana niwassif azamati.
[11] Intu khilibtu be gechch wa wilidtu tibin ! Wa nafasku misil naar al-tahrigku.
[12] Wa l-chaʼab al-aakhariin yahrago wa yabgo rumaad. Yabgo misil al-chook al-gataʼooh wa gaaʼid yahrag.»
[13] Intu al-gaaʼidiin baʼiid, asmaʼo be l-cheyy al-ana sawweetah ! Wa intu al-gaaʼidiin gariib, aʼarfu gudurti !
[14] Wa fi Sahyuun al-muznibiin rajafo wa l-kuffaar anbahato wa yuguulu : «Yaatu minnina yagdar yagood fi l-naar al-tahrig ? Wa yaatu yagdar yagood fi l-jamur al-daayim ?»
[15] Illa l-naadum al-yuruukh fi l-adaala wa yikallim be l-hagg wa yaaba maal al-zulum. Wa yihitt iideenah wa yaaba al-rachwa wa yisidd adaanah min kalaam daffigiin al-damm wa yisidd uyuunah achaan ma yichiif al-fasaala.
[16] Al-naadum da yaskun fi l-bakaan al-aali wa l-jibaal al-gawiyiin // yabgo maljaʼah. Wa yantuuh akil wa yadmano leyah al-almi.
[17] Wa uyuunak yichiifu al-malik // fi jamaalah wa yichiifu al-balad // be kulla huduudha.
[18] Wa galbak yifakkir fi l-ruʼub al-awwal wa yuguul : «Ween al-yahsib ? Wa ween al-yawzin ? Wa ween al-yahsib // buyuut al-muraakhaba ?»
[19] Wa battaan ma tichiif al-chaʼab al-mutakabbir, al-chaʼab al-kalaamhum gawi wa lukhkhithum ma tinʼarif // wa la tinfahim.
[20] Chiif Sahyuun madiinat farahna ! Wa uyuunak yichiifu Madiinat al-Khudus aamine. Hi misil kheema al-ma tilhawwal wa wutaadha abadan ma yamurgu wa hubaalha abadan ma yilfartago.
[21] Wa Allah yiwassif leena azamatah wa l-bakaan da yabga buhuur // wa majaari wasiiʼiin. Wa maraakib harib // ma yadkhulu fooghum wa sufun al-kubaar kula // ma yuchugguuhum.
[22] Achaan Allah hu gaadiina wa hu al-haakim foogna. Wa hu malikna wa hu al-yinajjiina.
[23] Wa hubaal sufun al-adu algattaʼo wa battaan ma yalzamo // amuud al-safiina wa ma yarfaʼo raayitha. Wa khalaas nigassumu al-khaniime be katara wa l-uruj kula yalgo gisimhum.
[24] Wa waahid min sukkaan Madiinat al-Khudus ma yuguul : «Ana mardaan». Wa l-chaʼab al-saakniin fi l-madiina di yalgo khufraan khataahum.