[1] Ilaahku buguul : «Hannusu ! Hannusu chaʼabi !
[2] Raggudu galib Madiinat al-Khudus wa guulu leeha kadar khidmitha al-ijbaariiye kammalat wa khataaha anmaha wa hi ligat min iid Allah marrateen jaza hana kulla zunuubha.»
[3] Fi hiss gaaʼid yiʼiit wa yuguul : «Fi l-khala, jahhuzu derib // le Allah wa fi l-sahara, addulu tariig // le Ilaahna.
[4] Khalli ayyi waadi yindafin wa kulli jabal wa hajar // yabga gisayyir. Wa khalli kulla l-giizaan yistawu wa l-derib al-waʼar yabga saahil.
[5] Khalaas, majd Allah yibiin wa kulla l-naas yichiifuuh sawa !» Wa da kalaam Allah al-gaalah.
[6] Fi hiss buguul : «Iit !» Wa ana gult : «Niʼiit nuguul chunu ?» «Guul kadar kulla l-naas // misil al-gechch wa charafhum misil nuwwaar al-gechch.
[7] Wa l-gechch yaybas // wa nuwwaarah yidaffig achaan nafkhat Allah // hajjat fooghum. Aywa ! Al-chaʼab misil gechch.
[8] Al-gechch yaybas // wa nuwwaarah yidaffig laakin kalaam Allah yagood // ila l-abad.»
[9] Atlaʼe fi l-jabal al-aali, ya Sahyuun, inti al-indiki khabar halu ! Be chidde arfaʼe sootki, ya Madiinat al-Khudus, inti al-indiki khabar halu ! Arfaʼe sootki bala khoof wa guuli le hillaal balad Yahuuza : «Daahu Ilaahku !
[10] Daahu Allah al-Rabb jaayi be chidde wa be gudrat iidah, gaaʼid yamluk. Wa daahu yijiib maahiiytah maʼaayah wa mukaafaatah giddaamah.
[11] Misil al-raaʼi, yarʼa khanamah wa be iidah, yilimm humlaanah. Wa yichiilhum fi hudnah wa yiwaddi al-chawaayil be hudu.»
[12] Yaatu al-gaawas kulla l-almi // be kaffah wa gaawas urd al-samaawaat // be chibrah ? Yaatu al-gidir kaal ajaaj al-ard // be mikyaal wa wazan al-hujaar wa l-jibaal // fi l-miizaan ?
[13] Yaatu irif afkaar Allah wa bigi leyah siid choortah le yiwassiih ?
[14] Min yaatu ligi al-wasiiye wa l-fihim wa yaatu allamah tariig al-adaala ? Yaatu al-allamah al-maʼrafa wa arrafah derib al-fihim ?
[15] Daahu al-umam dugaag misil nugta al-wagaʼat // min al-dalu wa misil ajaaj fi l-miizaan. Daahu al-jazaayir fi l-bahar khufaaf misil ajaaj al-chaayle al-riih.
[16] Khaabat Lubnaan ma titimm le tigabbid naar al-madbah wa haywaanaatha ma yitimmu dahiiye muharraga le l-Rabb.
[17] Kulla l-umam ma yisaawu cheyy giddaamah wa la induhum khiima wa hu ma yajʼalhum.
[18] Be yaatu tisaawu al-Rabb ? Wa be suura al-weeni tichabbuhuuh ?
[19] Al-sanam, al-haddaadi bas daggah wa l-sayyaakhi masahah be dahab wa sawwa leyah salaasil hana fudda.
[20] Laakin al-fagri al-ma yagdar yigaddim al-hadiiye di yichiil hatab al-ma yisawwis wa yifattich najjaar // al-indah khibra achaan yisawwi sanam // al-ma yinhazza.
[21] Intu ma taʼarfu walla ? Wa ma simiʼtu walla ? Ma oorooku beyah min al-bidaaya walla ? Wa ma fihimtu khaliigit al-ard walla ?
[22] Allah bas saakin min foog le l-ard wa sukkaanha, hu bichiifhum // misil jaraad. Wa hu yifill al-samaawaat misil sitaara wa yumuttuhum misil kheemtah // le yaskunha.
[23] Hu yisawwi al-hukkaam ma fiihum wa gudiya al-ard, yiwaddirhum.
[24] Gubbaal ma magganoohum wa la zaraʼoohum wa la uruughum lihgo al-ard, khalaas hu yanfukh fooghum wa humman yaybaso wa l-zoobaʼaane tichiilhum // misil gechch.
[25] Al-Khudduus gaal : «Be yaatu tichabbuhuuni ? Wa maʼa yaatu tisaawuuni ?»
[26] Arfaʼo ruuseeku foog wa chiifu fi l-sama ! Yaatu al-khalag al-achya dool ? Al-Rabb bas yamrug khuwwaathum kulluhum wa yinaadiihum kulluhum be asaameehum ! Achaan hu gaadir wa aziim wa chadiid, waahid minhum ma yinfagid !
[27] Ya Bani Israaʼiil ! Ya zurriiyit Yaakhuub ! Maala tuguulu : «Deribna mulabbad min Allah wa huguugna ma yinchaafo le Ilaahna.»
[28] Inta ma irift wa la simiʼt ? Allah bas hu al-Ilaah al-daayim wa hu bas al-khalag huduud al-ard. Hu wa la yaksal wa la yaʼya wa ilmah abadan ma indah hadd.
[29] Hu yanti gudra le l-ayyaan wa le l-ma indah khuwwa, yiziidah.
[30] Al-subyaan yaksalo wa yaʼyo, hatta al-chabaab yittartaʼo wa yagaʼo.
[31] Wa laakin al-yukhuttu achamhum fi Allah, gudrithum tiljaddad. Yitiiru misil al-suguura wa yajru wa ma yaksalo wa yuruukhu wa ma yaʼyo.