[1] «Ya intu al-atchaaniin ! Taʼaalu ale l-almi hatta intu al-ma induku gurus kula, taʼaalu ! Taʼaalu achru maʼaach wa aakulu ! Bala gurus wa bala ma tikaffu cheyy, taʼaalu acharbo khamar wa laban.
[2] Maala tikaffu gurusku // fi cheyy al-ma binʼakil ? Wa maala tiʼayyu nufuusku // fi cheyy al-ma yachbiʼku ? Asmaʼooni adiil ! Aakulu al-akil al-sameh wa farruhu nufuusku // be l-akil al-halu.
[3] Taʼaalu leyi wa khuttu adaanku, asmaʼooni wa tahyo. Wa nisawwi maʼaaku // muʼaahada daayme. Akiid nantiiku rahmati // al-waaʼadt beeha Dawuud.
[4] Wa daahu ana sabbattah // misil chaahid fi l-umam wa khaayid al-yuguud al-chaʼab.
[5] Wa daahu intu tinaadu umma // al-ma taʼarfuuha wa l-umma al-ma taʼarifku di // tajri leeku fi chaani ana Allah Ilaahku // Khudduus Israaʼiil al-anteetku charaf.»
[6] Fattuchu Allah fi wakit hu binlagi wa naaduuh wakit hu gaaʼid gariib.
[7] Khalli al-aasi yikhalli derbah wa l-naadum al-fasil // yikhalli afkaarah. Khalli yigabbil le Allah wa hu yarhamah achaan khufraan Ilaahna wasiiʼ.
[8] Daahu kalaam Allah : «Afkaari ma misil afkaarku wa aʼmaali ma misil aʼmaalku.
[9] Misil al-samaawaat gaaʼidiin // foog min al-ard, aʼmaali kula gaaʼidiin // min foog le aʼmaalku wa afkaari kula gaaʼidiin // min foog le afkaarku.
[10] Al-matar wa l-talaj yanzulu min al-sama wa ma yigabbulu gabul // ma yazgu al-ard lahaddi al-nabaat yugumm wa yinawwir wa yanti teeraab le l-harraati wa maʼaach le l-jiiʼaan.
[11] Wa l-matar da misil kalaami. Wakit yamrug min khachmi, ma yigabbil leyi saakit bala natiija wa bala ma haggag hadaf // al-ana nidoorah wa bala ma sawwa // al-rassaltah leyah.»
[12] Aywa, be l-farah tamurgu wa be l-salaam yuguuduuku. Wa l-jibaal wa l-hujaar yafraho // wa yiragrugu leeku wa kulla chadar al-kadaade yisaffig.
[13] Fi badal al-chadar al-indah chook, yugumm hatab al-sarwi. Wa fi badal al-haskaniit, yugumm nabaat al-indah // riihe haluuwe. Wa kulla l-achya dool yukuunu fi chaan usum Allah yabga aali wa alaama daayme // al-abadan ma tingachcha.