[1] ᐊᓇ ᒫᑲ ᑯᑕᐠ ᐅᑭᓯᑯ, ᐁᑲᐧ ᓂᔮᓇᐣ, ᑭ ᑭᑐᐦᑖᐤ ᐁᑯᓯ ᓂ ᑭ ᐋᐧᐸᒫᐤ ᐊᒐᐦᑯᐢ ᑭᓯᑯᕽ ᐅᐦᒋ ᐁ ᐸᐦᑭᓯᕽ ᐊᐢᑭᕽ; ᐁᐊᐧᑯ ᒫᑲ ᑭ ᒥᔮᐤ ᐋᐱᑯᑲᐃᑲᐣ ᐋᐧᑎ ᐁᑳ ᑳ ᒥᓴᐢᑫᔮᐠ.
[2] ᑭ ᔪᑌᓇᑦ ᒫᑲ ᐊᓂᒪ ᐋᐧᑎ ᐁᑳ ᑳ ᒥᓴᐢᑫᔮᐠ; ᑭ ᐃᐢᐹᑫᐸᔨᐤ ᒫᑲ ᑲᐢᑳᐸᑌᐤ ᐋᐧᑎᕽ ᐅᐦᒋ ᑖᐱᐢᑯᐨ ᑲᐢᑳᐸᑌᐤ ᑭᐦᒋ ᑎᑳᐱᐢᑭᓯᑲᓂᕽ ᐅᐦᒋ; ᐁᑯᓯ ᐱᓯᑦ ᒥᓇ ᓇᔦᐊᐧᒋᑭᓯᐠ ᑭ ᐊᐧᓂᑎᐱᐢᑭ ᐊᔮᐤ ᐁ ᑲᐢᑳᐸᑌᐠ ᐋᐧᑎᕽ ᐅᐦᒋ.
[3] ᐁᑯᓯ ᑲᐢᑳᐸᑌᕽ ᑭ ᐅᐦᒋᐸᔨᐊᐧᐠ ᑳᐧᐢᑯᑎᓯᓴᐠ ᐊᐢᑭᕽ; ᑲᐢᑭᐦᐁᐃᐧᓯᐃᐧᐣ ᒫᑲ ᑭ ᒥᔮᐊᐧᐠ ᑖᐱᐢᑯᐨ ᐅᒋᓱᐁᐧᐊᐧᐠ ᐊᐢᑭᕽ ᑳ ᐃᓯ ᐊᔮᒋᐠ ᑲᐢᑭᐦᐁᐃᐧᓯᐃᐧᐣ.
[4] ᑭ ᐃᑖᐊᐧᐠ ᒫᑲ ᐁᑳ ᓈᐣᑕᐤ ᑭᑕ ᐃᑐᑕᐦᑭᐠ ᒪᐢᑯᓯᔭ ᐊᐢᑭᕽ ᐊᐦᐳ ᓈᐣᑕᐤ ᑫᑲᐧᐩ ᐁ ᐊᐢᑲᐢᑯᓯᐃᐧ ᐊᔮᐠ ᐊᐦᐳ ᓈᐣᑕᐤ ᒥᐢᑎᐠ, ᒫᑲ ᐱᑯ ᑕᐦᑐ ᐊᔨᓯᔨᓂᐊᐧᐠ ᐁᑳ ᐁ ᐊᔮᐋᐧᒋᐠ ᐅ ᑭᐢᑭᓇᐋᐧᒋᒋᑲᓂᔨᐤ ᑭᓭᒪᓂᑐᐊᐧ ᐅᐢᑲᑎᑯᐋᐧᕽ.
[5] ᑭ ᐃᓯ ᒥᔮᐊᐧᐠ ᒫᑲ ᐁᑳ ᑭᑕ ᓂᐸᐦᐋᒋᐠ, ᒫᑲ ᑭᑕ ᑯᑕᑭᐋᒋᐠ ᓂᔮᓇᐣ ᐱᓯᑦ ᐃᔨᑯᕽ; ᐁᑯᓯ ᐅ ᑯᑕᑭᐦᐃᐁᐧᐃᐧᓂᐋᐧᐤ ᑖᐱᐢᑯᐨ ᐅ ᑯᑕᑭᐦᐃᐁᐧᐃᐧᐣ ᐅᒋᓱᐁᐧᐤ ᑳ ᒋᓵᐧᒋ ᐊᔨᓯᔨᓂᐊᐧ.
[6] ᐁᐊᐧᑯᓂ ᒫᑲ ᐁ ᑲᑭᓯᑳᑭ ᐊᔨᓯᔨᓂᐊᐧᐠ ᑭᑕ ᓇᑐᓇᒪᐧᐠ ᓂᐳᐃᐧᐣ, ᐁᑯᓯ ᓇᒪᐃᐧᔭ ᓈᐣᑕᐤ ᐃᓯ ᑭᑕ ᒥᐢᑲᒪᐧᐠ; ᒥᓇ ᑭᑕ ᓄᐦᑌ ᓂᐱᐊᐧᐠ ᒫᑲ ᓂᐳᐃᐧᐣ ᑭᑕ ᑕᐸᓯᐃᑲᐧᐠ.
[7] ᐊᓂᑭ ᒫᑲ ᑳᐧᐢᑯᑎᓯᓴᐠ ᑭ ᐃᓯᓈᑯᓯᐊᐧᐠ ᑖᐱᐢᑯᐨ ᒥᐢᑕᑎᒪᐧᐠ ᐁ ᐊᐧᐁᐧᔨᐃᐦᒋᐠ ᑭᑕ ᓄᑎᓂᑐᕽ ᐁᑯᓯ ᐅᐢᑎᑳᐧᓂᐋᐧᕽ ᑖᐱᐢᑯᐨ ᑭᐦᒋ ᐅᑭᒫᐊᐧᐢᑐᑎᓇ ᐅᓵᐃᐧᓱᓂᔮᐤ ᐁ ᐃᓯᓈᑲᐧᓂᔨᑭ, ᐅᑳᐧᑲᓂᐋᐧᐊᐧ ᒫᑲ ᑖᐱᐢᑯᐨ ᐊᔨᓯᔨᓂᐊᐧᐠ ᐅᑳᐧᑲᓂᐋᐧᐊᐧ.
[8] ᑭ ᐅ ᐁᐧᐢᑕᑳᐊᐧᐠ ᒫᑲ ᑖᐱᐢᑯᐨ ᐃᐢᑫᐧᐊᐧᐠ ᐁᐧᐢᑕᑳᐋᐧᐊᐧ, ᐃᐧᐱᑎᐋᐧᐊᐧ ᒫᑲ ᑖᐱᐢᑯᐨ ᒥᐢᑕᑫᓯᐊᐧᐠ.
[9] ᑭ ᐊᔮᐊᐧᐠ ᒫᑲ ᒫᐢᑭᑲᓈᐱᐢᑲᐧ ᑖᐱᐢᑯᐨ ᐃᔨᓇᑐ ᐱᐋᐧᐱᐢᐠ ᒫᐢᑭᑲᓈᐱᐢᑲᐧ; ᐁᑯᓯ ᐁ ᑭᑐᐁᐧᔮᐦᑫᒋᐠ ᑖᐱᐢᑯᐨ ᐁ ᐱᒣᐧᐁᐧᐸᔨᒋᐠ ᑎᑎᐱᑖᐸᓈᐢᑲᐧᐠ, ᒥᐦᒉᐟ ᒥᐢᑕᑎᒪᐧᐠ ᐁ ᒧᐢᑭᐢᑖᑫᒋᐠ ᓄᑎᓂᑐᐃᐧᓂᕽ.
[10] ᐅᓱᐊᐧᐠ ᒫᑲ ᑖᐱᐢᑯᐨ ᐅᒋᓱᐁᐧᐊᐧᐠ, ᒥᓇ ᒋᓵᐧᑲᓇ; ᐁᑯᓯ ᐅᓱᐋᐧᕽ ᐊᔮᔨᐤ ᐅ ᑲᐢᑭᐦᐁᐃᐧᓯᐃᐧᓂᐋᐧᐤ ᑭᑕ ᐃᐧᓴᑲᐋᐧᒋᐠ ᐊᔨᓯᔨᓂᐊᐧ ᓂᔮᓇᐣ ᐱᓯᑦ ᐃᔨᑯᕽ.
[11] ᑎᐯᔨᒥᑲᐧᐠ ᒫᑲ ᐁ ᐅ ᑭᐦᒋ ᐅᑭᒫᒥᒋᐟ ᐊᓂᐦᐃ ᐅᑭᓯᑯᐊᐧ ᐁᑳ ᑳ ᒥᓴᐢᑫᔮᐠ ᐅᐦᒋ; ᐃᐸᕒᐅ ᐱᑭᐢᑫᐧᐃᐧᓂᕽ ᐊᐹᑕᐣ ᑳ ᐃᓯᔨᐦᑳᓱᐟ, ᒫᑲ ᑲᕒᐃᐠ ᐱᑭᐢᑫᐧᐃᐧᓂᕽ ᐊᐹᓬᐃᔭᐣ ᐃᓯᔨᐦᑳᑖᐤ.
[12] ᐊᓂᒪ ᓂᐢᑕᑦ ᑯᑕᑭᑖᐃᐧᐣ ᒪᔮᐢᑲᒧᐸᔨᐤ; ᒋᐢᐟ, ᑫᔮᐱᐨ ᓂᓱ ᒣᐧᐢᑕᐢ ᐃᔨᑯᕽ ᑭᑕ ᐊᔮᑭ.
[13] ᐊᓇ ᒫᑲ ᑯᑕᐠ ᐅᑭᓯᑯ, ᐁᑲᐧ ᓂᑯᑖᐧᓯᐠ, ᑭ ᑭᑐᐦᑖᐤ, ᓂ ᑭ ᐯᑌᐣ ᒫᑲ ᐃᑌᐧᐃᐧᐣ ᐁ ᐅᐦᒋᐸᔨᐠ ᐁ ᐅᐟ ᐁᐢᑲᓂᐊᐧᕽ ᐊᓂᒪ ᐅᓵᐃᐧᓱᓂᔮᐃᐧ ᐸᑭᑎᓈᓱᐃᐧᓈᐱᐢᐠ ᑳ ᐅᑎᐢᑲᐃᐧᐢᑳᑯᐟ ᑭᓭᒪᓂᑐ,
[14] ᐊᐃᐧᔭᐠ ᐁ ᐃᑖᐟ ᐊᓂᐦᐃ ᐅᑭᓯᑯᐊᐧ ᓂᑯᑖᐧᓯᐠ ᑳ ᐃᑕᑭᒥᐦᐟ ᑳ ᐊᔮᐟ ᐱᐱᑲᐧᐣ, ᐋᐱᑯᓂᐠ ᐊᓂᑭ ᓀᐤ ᐅᑭᓯᑯᐊᐧᐠ ᑳ ᒪᒫᒋᑲᐧᐱᓱᒋᐠ ᐁᑯᑕ ᐊᓂᒪ ᑭᐦᒋ ᓯᐱᕽ ᔪᐸᕒᐁᑎᐢ.
[15] ᐁᑯᓯ ᐊᓂᑭ ᓀᐤ ᐅᑭᓯᑯᐊᐧᐠ ᑭ ᐋᐱᑯᓈᐊᐧᐠ, ᑳ ᑭ ᐊᐧᐁᐧᔨᐃᐦᒋᐠ ᐊᓂᒪ ᑎᐸᐃᑲᐣ ᒥᓇ ᑭᓯᑳᐤ ᒥᓇ ᐱᓯᑦ ᒥᓇ ᐊᐢᑭ, ᑭᑕ ᓂᐸᐦᐋᒋᐠ ᐯᔭᐠ ᐁ ᑭ ᓂᐢᑐᐃᒥᐦᐟ ᐊᔨᓯᔨᓂᐊᐧ.
[16] ᐁᑯᓯ ᐁ ᐃᐦᑕᓯᒋᐠ ᐅᓄᑎᓂᑫᐊᐧᐠ ᐊᓂᑭ ᐁ ᑌᑕᐱᒋᐠ ᒥᐢᑕᑎᒪᐧ ᓂᓵᐧᐤ ᒥᑖᑕᑖᐧᐤ ᑭᐦᒋ ᒥᑖᑕᐦᑐᒥᑕᓇᐋᐧᐤ ᒥᑖᑕᐦᑖᐧᐤ ᑭᐦᒋ ᒥᑖᑕᐦᑐᒥᑕᓇᐤ; ᓂ ᑭ ᐯᐦᑌᐣ ᐁ ᐃᐦᑕᓯᒋᐠ.
[17] ᐅᒥᓯ ᒫᑲ ᓂ ᑭ ᐃᓯ ᐋᐧᐸᒫᐊᐧᐠ ᒥᐢᑕᑎᒪᐧᐠ ᐃᓯᓇᒧᐃᐧᓂᕽ, ᒥᓇ ᐊᓂᑭ ᑳ ᑌᑕᐱᒋᐠ, ᐁ ᐊᔮᒋᐠ ᒫᐢᑭᑲᓈᐱᐢᑲᐧ ᑖᐱᐢᑯᐨ ᐃᐢᑯᑌᐤ ᒥᓇ ᐋᔭᓯᐣᐟ ᒥᓇ ᐃᐢᑯᑌᓯᑲᐣ;
[18] ᐅᐦᐃ ᓂᐢᑐ ᑯᑕᑭᐦᐃᐁᐧᐃᐧᓇ ᐯᔭᐠ ᐁ ᓂᐢᑐᐃᐦᒋᐠ ᐊᔨᓯᔨᓂᐊᐧᐠ ᑭ ᓂᐸᐦᐋᐊᐧᐠ, ᐃᐢᑯᑌᐤ ᒥᓇ ᑲᐢᑳᐸᑌᐤ ᒥᓇ ᐃᐢᑯᑌᓯᑲᐣ ᐅᐦᒋ ᐅᑐᓂᐋᐧᕽ ᑳ ᐅᐦᒋᐸᔨᔨᑭ.
[19] ᒋᑫᒫ ᐅ ᑲᐢᑭᐦᐁᐃᐧᓯᐃᐧᓂᐋᐧᐤ ᐊᓂᑭ ᒥᐢᑕᑎᒪᐧᐠ ᐅᑐᓂᐋᐧᕽ ᐊᔮᔨᐤ ᒥᓇ ᐅᓱᐋᐧᕽ; ᒋᑫᒫ ᐅᓱᐋᐧᐊᐧ ᐃᓯ ᐊᔮᔨᐊᐧ ᑖᐱᐢᑯᐨ ᑭᓀᐱᑲᐧᐠ ᒥᓇ ᐅᐢᑎᑳᐧᓂᐊᐧᐠ ᐁᑯᑕ; ᐁᐊᐧᑯᓂ ᒫᑲ ᑳ ᐅᐦᒋ ᐃᐧᓴᑲᐅᐁᐧᒋᐠ.
[20] ᑯᑕᑲᐠ ᒫᑲ ᐊᔨᓯᔨᓂᐊᐧᐠ ᐁᑳ ᑳ ᑭ ᓂᐸᐃᑯᒋᐠ ᐅᐦᐃ ᑯᑕᑭᐦᐃᐁᐧᐃᐧᓇ, ᓇᒪᐃᐧᔭ ᒥᑯᐢᑳᑌᔨᑕᒥᐃᑲᐧᐠ ᐁ ᐃᓯᐦᒋᑫᒋᐠ ᐅᒋᐦᒋᐋᐧᕽ, ᐁᑯᓯ ᓇᒪᐃᐧᔭ ᐳᓂ ᑳᑭᓯᒧᑐᑕᐁᐧᐊᐧᐠ ᒪᒑᔭ, ᒥᓇ ᒪᓂᑐᑳᓇ ᑳ ᐅᐦᒋ ᐅᓯᒋᑳᓱᔨᐟ ᐅᓵᐃᐧᓱᓂᔮᐤ ᒥᓇ ᐋᐧᐱᐢᑭᓱᓂᔮᐤ ᒥᓇ ᐅᓵᐋᐧᐱᐢᐠ ᒥᓇ ᐊᓯᓂ ᒥᓇ ᒥᐢᑎᐠ; ᐁᑳ ᑭᑕ ᑭ ᐋᐧᐸᐦᑕᒥᔨᐟ ᐊᐦᐳ ᐯᑕᒥᔨᐟ ᐊᐦᐳ ᐱᒧᐦᑌᔨᐟ;
[21] ᐁᑯᓯ ᓇᒪᐃᐧᔭ ᒥᑯᐢᑳᑌᔨᑕᒥᐃᑲᐧᐠ ᐅ ᓂᐸᑖᑫᐃᐧᓂᐋᐧᐋᐧ, ᐊᐦᐳ ᐅ ᒥᑌᐃᐧᐃᐧᓂᐋᐧᐊᐧ, ᐊᐦᐳ ᐅ ᐱᓯᑲᐧᑎᓯᐃᐧᓂᐋᐧᐊᐧ, ᐊᐦᐳ ᐅ ᑭᒧᑎᐃᐧᓂᐋᐧᐊᐧ.