[1] ᓂ ᑭ ᐋᐧᐸᑌᐣ ᒫᑲ ᐅᐢᑭ ᑭᓯᐠ ᒥᓇ ᐅᐢᑭ ᐊᐢᑭ; ᒋᑫᒫ ᐊᓂᒪ ᓂᐢᑕᑦ ᑭᓯᐠ ᒥᓇ ᓂᐢᑕᑦ ᐊᐢᑭ ᑭ ᓯᐯᐧᐸᔨᐊᐧ; ᒥᓇ ᑭᐦᒋᑲᒥ ᑭ ᓇᒪᑕᑲᐧᐣ.
[2] ᓂ ᑭ ᐋᐧᐸᑌᐣ ᒫᑲ ᑳ ᑲᓈᑕᕽ ᐅᑌᓇᐤ, ᐅᐢᑭ ᒉᕒᐅᓴᓬᐊᑦ, ᐁ ᐯ ᐅᐦᒋ ᔮᓯᐸᔨᐠ ᑭᐦᒋ ᑭᓯᑯᕽ ᑭᓭᒪᓂᑐ ᐅᐦᒋ, ᐁ ᐊᐧᐁᐧᔨᒋᑳᑌᐠ ᑖᐱᐢᑯᐨ ᐅᐢᑭᐢᑫᐧᐋᐧᐣ ᐁ ᐊᐧᐁᐧᓯᐅᐢᑕᐋᐧᐟ ᐅ ᓈᐯᒪ.
[3] ᓂ ᑭ ᐯᐦᑌᐣ ᒫᑲ ᐁ ᑭᐦᒋ ᑭᓯᐁᐧᐠ ᐃᑌᐧᐃᐧᐣ ᑭᐦᒋ ᐊᐱᐃᐧᓂᕽ ᐅᐦᒋ ᐁ ᐃᑌᐧᕽ, ᒫᑎᑲ, ᐃᐧᑭ ᑭᓭᒪᓂᑐ ᐊᔨᓯᔨᓂᓈᕽ ᐊᔮᔨᐤ, ᐁᑯᓯ ᑭᑕ ᐃᐧᒋ ᐊᔮᒣᐤ, ᑭᑕ ᐅᐟ ᐃᔨᓂᒥᐤ ᒫᑲ, ᐁᑯᓯ ᑭᓭᒫᓂᑐ ᐃᐧᔭ ᑫᐦᒋᐋᐧᐠ ᑭᑕ ᐃᐧᒋ ᐊᔮᒣᐤ, ᒥᓇ ᑭᑕ ᐅ ᑭᓭᒪᓂᑐᒥᐊᐧᐠ;
[4] ᐁᑯᓯ ᑭᑕ ᑳᓯᐊᒣᐧᐤ ᑲᐦᑭᔭᐤ ᐅᐦᒋᑲᐋᐧᐱᐃᐧᐣ ᐅᐢᑭᓯᑯᐊᐧᕽ ᐅᐦᒋ; ᒥᓇ ᓂᐳᐃᐧᐣ ᑭᑕ ᓇᒪᑕᑲᐧᐣ; ᓇᒪᐃᐧᔭ ᒥᓇ ᑭᑕ ᐃᐦᑕᑲᐧᐣ ᐱᑫᐧᔨᑕᒧᐃᐧᐣ, ᐊᐦᐳ ᒫᑐᐃᐧᐣ, ᐊᐦᐳ ᐃᐧᓴᑫᔨᑕᒧᐃᐧᐣ; ᐊᔨᐢ ᐊᓂᐦᐃ ᓂᐢᑕᑦ ᑳ ᑭ ᐊᔮᑭ ᐁᑲᐧ ᐳᓂᐸᔨᐊᐧ.
[5] ᐊᓇ ᒫᑲ ᑳ ᐊᐱᐟ ᑭᐦᒋ ᐊᐱᐃᐧᓂᕽ ᑭ ᐃᑌᐧᐤ, ᒫᑎᑲ, ᑲᐦᑭᔭᐤ ᑫᑲᐧᐩ ᓄᓯᑖᐣ ᐅᐢᑭ. ᐁᑯᓯ ᐃᑌᐧᐤ, ᒪᓯᓇᐦᐊ; ᒋᑫᒫ ᐅᐦᐃ ᐃᑌᐧᐃᐧᓇ ᐊᔮᑳᐧᒣᔨᑖᑲᐧᓇᐧ ᒥᓇ ᑖᐯᐧᒪᑲᓇᐧ.
[6] ᓂ ᑭ ᐃᑎᐠ ᒫᑲ, ᑎᐱᐸᔨᐊᐧ. ᓂᔭ ᐁᐊᐧᑯ ᐋᓬᐸ ᒥᓇ ᐋᒥᑲ, ᐁ ᒫᒋᐸᔨᐠ ᒥᓇ ᐁ ᐳᓂᐸᔨᐠ. ᓂ ᑲ ᒧᐦᒋ ᒥᔮᐤ ᐊᓇ ᑳ ᓄᑌᔮᐸᑫᐧᐟ ᐁ ᒧᐦᑭᒋᐊᐧᓂᐯᑯᐊᐧᕽ ᐱᒫᑎᓯᐃᐧᓂ ᓂᐱ.
[7] ᐊᓇ ᑳ ᓵᑯᑖᐧᐟ ᑭᑕ ᑎᐯᔨᑕᑦ ᐅᐦᐃ; ᐁᑯᓯ ᓂᔭ ᑭᑕ ᐅ ᑭᓭᒪᓂᑐᒥᐤ ᒥᓇ ᐃᐧᔭ ᓂ ᑲ ᐅᑯᓯᓯᐣ.
[8] ᒫᑲ ᐃᐧᔮ ᑳ ᓵᑯᑌᐁᒋᐠ, ᒥᓇ ᐁᑳ ᑳ ᑖᐯᐧᑕᐦᑭᐠ ᒥᓇ ᑳ ᐸᑳᐧᑎᑯᓯᒋᐠ, ᒥᓇ ᐅᓂᐸᑖᑫᐊᐧᐠ, ᒥᓇ ᐅᐱᓯᑳᐧᑎᓯᐊᐧᐠ, ᒥᓇ ᒥᑌᐊᐧᐠ, ᒥᓇ ᐅᒪᓂᑐᑫᐢᑲᐠ, ᒥᓇ ᑲᐦᑭᔭᐤ ᐅᑭᔮᐢᑭᐢᑭᐊᐧᐠ, ᑭᑕ ᐃᐧᒋᐃᐁᐧᐊᐧᐠ ᐊᓂᒪ ᓵᑲᐦᐃᑲᐣ ᑳ ᑳᐧᑯᑌᐠ ᐃᐢᑯᑌᐤ ᒥᓇ ᐃᐢᑯᑌᓯᑲᐣ; ᐁᐊᐧᑯ ᑭᑖᐧᑦ ᓂᐳᐃᐧᐣ.
[9] ᓂ ᑭ ᐯ ᓈᑎᐠ ᒫᑲ ᐯᔭᐠ ᐊᓂᑭ ᑌᐸᑯᑊ ᐅᑭᓯᑯᐊᐧᐠ ᑳ ᐊᔮᒋᐠ ᐊᓂᐦᐃ ᑌᐸᑯᑊ ᐊᓯᐊᐧᒋᑲᓇ, ᐃᑕ ᐁ ᐊᓯᐊᐧᑌᑭ ᐊᓂᐦᐃ ᑌᐸᑯᑊ ᐃᐢᑳᐧᔮᐨ ᑯᑕᑭᐦᐃᐁᐧᐃᐧᓇ; ᐁᑯᓯ ᓂ ᑭ ᑭᑐᑎᐠ, ᐁ ᐃᑌᐧᐟ, ᐯ ᐃᑐᐦᑌ ᐅᑕ, ᑭ ᑲ ᐋᐧᐸᐦᑕᐃᑎᐣ ᐊᓇ ᐅᐢᑭᐢᑫᐧᐋᐧᐣ, ᐃᐧᐊᐧ ᐊᓇ ᒫᔭᑎᐦᑯᓯᐢ.
[10] ᐁᑯᓯ ᓂ ᑭ ᓯᐯᐧᑕᐃᐠ ᐊᐦᒑᐦᑯᕽ ᑭᐦᒋ ᐊᐧᒋᕽ ᐁ ᐃᐢᐹᒪᑎᓈᐠ, ᓂ ᑭ ᐋᐧᐸᐦᑕᐃᐠ ᒫᑲ ᑳ ᑲᓈᑕᕽ ᐅᑌᓇᐤ ᒉᕒᐅᓴᓬᐊᑦ, ᐁ ᐯ ᐅᐦᒋ ᔮᓯᐸᔨᐠ ᑭᐦᒋ ᑭᓯᑯᕽ ᑭᓭᒪᓂᑐ ᐅᐦᒋ,
[11] ᐁ ᐊᔮᐠ ᐅ ᒪᓂᑐ ᐋᐧᐢᑌᐃᐧᐣ ᑭᓭᒪᓂᑐ; ᐅ ᐋᐧᐢᑌᐃᐧᐣ ᑖᐱᐢᑯᐨ ᐊᓯᓂ ᐊᔨᐋᐧᐠ ᑳ ᐋᑲᐧᑭᒋᑳᓱᐟ, ᑖᐱᐢᑯᐨ ᒑᐢᐸᕒ ᐊᓯᓂ, ᒥᑐᓂ ᐁ ᓵᐳᐯᓈᑯᓯᐟ;
[12] ᐁ ᑭᐦᒋ ᐋᐧᐢᑳᐃᑳᑌᐠ ᒥᓇ ᐁ ᐃᐢᐸᐠ; ᒥᑖᑕᐟ ᓂᓱᓵᑊ ᐁ ᐊᔮᑭ ᐃᐢᑳᐧᑌᒪ, ᐁᑯᓯ ᐃᐢᑳᐧᑌᒥᕽ ᒥᑖᑕᐟ ᓂᓱᓵᑊ ᐅᑭᓯᑯᐊᐧᐠ; ᐃᐧᔪᐃᐧᓇ ᒫᑲ ᐁ ᒪᓯᓇᐃᑳᑌᑭ ᐁᑯᑕ, ᐁᐊᐧᑫᐧᔨᐤ ᐅ ᐃᐧᔪᐃᐧᓂᐋᐧᐊᐧ ᒥᑖᑕᐟ ᓂᓱᓵᑊ ᑳ ᐃᑕᑐᑌᐃᐧᓯᔨᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ;
[13] ᐁ ᓵᑳᐢᑌᐠ ᐃᑌᑫ ᑭ ᐊᔮᐊᐧ ᓂᐢᑐ ᐃᐢᑳᐧᑌᒪ; ᒥᓇ ᑭᐁᐧᑎᓄᑖᕽ ᐃᑌᑫ ᓂᐢᑐ ᐃᐢᑳᐧᑌᒪ; ᒥᓇ ᓵᐊᐧᓄᑖᕽ ᐃᑌᑫ ᓂᐢᑐ ᐃᐢᑳᐧᑌᒪ; ᒥᓇ ᓇᑳᐯᐊᓄᑖᕽ ᐃᑌᑫ ᓂᐢᑐ ᐃᐢᑳᐧᑌᒪ.
[14] ᐁ ᐋᐧᐢᑳᐃᑳᑌᐠ ᒫᑲ ᐊᓂᒪ ᐅᑌᓇᐤ ᑭ ᐊᔮᐊᐧ ᒥᑖᑕᐟ ᓂᓱᓵᑊ ᐊᐢᐸᐢᑲᒥᑭᒋᑲᓇ, ᐁᑯᑕ ᒫᑲ ᒥᑖᑕᐟ ᓂᓱᓵᑊ ᐅ ᐃᐧᔪᐃᐧᓂᐋᐧᐊᐧ ᒥᑖᑕᐟ ᓂᓱᓵᑊ ᑳ ᐃᐦᑕᓯᔨᐟ ᐅᐟ ᐊᐹᐢᑎᓬᐃᒪ ᐊᓇ ᒫᔭᑎᐦᑯᓯᐢ.
[15] ᐊᓇ ᒫᑲ ᑳ ᐃᐧᒋ ᐱᑭᐢᑫᐧᒥᐟ ᑭ ᐊᔮᐤ ᐅᓵᐃᐧ ᓱᓂᔮᐃᐧ ᑎᐸᐃᑲᓈᑎᐠ ᑭᑕ ᑎᐸᐊᕽ ᐊᓂᒪ ᐅᑌᓇᐤ, ᒥᓇ ᐁ ᐃᐢᑳᐧᑌᒥᐊᐧᕽ ᒥᓇ ᐁ ᐊᐧᐢᑳᐃᑳᑌᐠ.
[16] ᐊᓂᒪ ᒫᑲ ᐅᑌᓇᐤ ᒥᑐᓂ ᓀᐊᐧᔭᐠ ᐁ ᑲᑲᑫᔮᐠ ᑭ ᐃᑕᐢᑌᐤ, ᐁᑯᓯ ᐁ ᐃᐢᑳᐧᐠ ᒣᐧᐦᒋ ᑖᐱᐢᑯᐨ ᐁ ᐃᐢᐱᑕᔭᑲᐢᑳᐠ; ᑭ ᑖᑎᐸᐊᑦ ᒫᑲ ᐊᓂᒪ ᐅᑌᓇᐤ ᑎᐸᐃᑲᓈᑎᐠ ᐅᐦᒋ, ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ ᑕᐦᑐ ᑎᐹᐹᐣ; ᐁ ᐃᐢᑳᐧᐠ ᒥᓇ ᐁ ᐃᐢᐱᑕᔭᑲᐢᑳᐠ ᒥᓇ ᐃᔨᑯᕽ ᐁ ᐃᐢᐸᐠ ᐯᔭᑲᐧᐣ,
[17] ᑭ ᑖᑎᐸᐊᑦ ᒫᑲ ᐊᓂᒪ ᐁ ᐋᐧᐢᑳᐃᑳᑌᐠ, ᒥᑖᑕᐦᑐᒥᑕᓇᐤ ᓀᒥᑕᓇᐤ ᓀᐅ ᐊᔨᐋᐧᐠ ᑕᐦᑐ ᑯᐱᑕ, ᐁ ᐃᓯ ᐅ ᑎᐸᐃᑲᓂᐟ ᐊᔨᓯᔨᓂᐤ, ᐅᑭᓯᑯ ᐅᑎ.
[18] ᐊᓂᒪ ᒫᑲ ᑳ ᐅᓯᒋᑳᑫᕽ ᐁ ᐋᐧᐢᑳᐃᑳᑌᐠ ᐁᐊᐧᑯ ᒑᐢᐸᕒ; ᐅᑌᓇᐤ ᒫᑲ ᐃᐧᔭ ᐁ ᐯᑭᓯᐟ ᐅᓵᐃᐧ ᓱᓂᔮᐤ, ᑖᐱᐢᑯᐨ ᒣᒧᐦᒋ ᐋᐧᐸᒧᓈᐱᐢᐠ.
[19] ᐊᓂᐦᐃ ᒫᑲ ᐊᐢᐸᐢᑲᒥᑭᒋᑲᓇ ᐁ ᐋᐧᐢᑳᐃᑳᑌᐠ ᐊᓂᒪ ᐅᑌᓇᐤ ᑭ ᐊᐧᐁᐧᓯᒋᑳᑌᐊᐧ ᓇᓈᑐᕽ ᑐᐃᐧ ᓱᓂᔮᐊᐧᓯᓂᔭᐠ ᐅᐦᒋ. ᐊᓂᒪ ᓂᐢᑕᑦ ᐊᐢᐸᐢᑲᒥᑭᒋᑲᐣ ᐁᐊᐧᑯ ᒑᐢᐸᕒ, ᐊᓂᒪ ᓂᓱ ᓵᐸᔭᕒ, ᐊᓂᒪ ᓂᐢᑐ ᑳᓬᓯᑖᓂ, ᐊᓂᒪ ᓀᐅ ᐁᒪᕒᐊᓬᐟ;
[20] ᐊᓂᒪ ᓂᔮᓇᐣ ᓵᕒᑖᓂᐠᐢ, ᐊᓂᒪ ᓂᑯᑖᐧᓯᐠ ᓵᕒᑎᔭᐢ; ᐊᓂᒪ ᑌᐸᑯᑊ ᑲᕒᐃᓴᓬᐊᐃᐟ; ᐊᓂᒪ ᐊᔨᓈᓀᐤ ᐯᕒᐃᓬ; ᐊᓂᒪ ᑫᑳᐟ ᒥᑖᑕᐟ ᑖᐸᐢ; ᐊᓂᒪ ᒥᑖᑕᐟ ᑲᕒᐃᓴᐸᕒᐁᐢ; ᐊᓂᒪ ᐯᔭᑯᓵᑊ ᒉᓯᐣᐟ; ᐊᓂᒪ ᓂᓱᓵᑊ ᐋᒥᑎᐢᐟ.
[21] ᐊᓂᐦᐃ ᒫᑲ ᒥᑖᑕᐟ ᓂᓱᓵᑊ ᐃᐢᑳᐧᑌᒪ ᐁᐊᐧᑯᓂ ᒥᑖᑕᐟ ᓂᓱᓵᑊ ᓱᓂᔮᐁᐧᓴᐠ; ᑎᑲᐠ ᐅᐦᐃ ᐹᐯᔭᐠ ᐃᐢᑳᐧᑌᒪ ᐯᔭᐠ ᓱᓂᔮᐁᐧᓴ; ᐁᑯᓯ ᐃᐧᔭ ᐱᒧᐦᑌᐢᑲᓇᐤ ᐅᑌᓈᕽ ᒣᒧᐦᒋ ᐅᓵᐃᐧ ᓱᓂᔮᐤ, ᑖᐱᐢᑯᐨ ᐁ ᓵᐳᐯᓈᑲᐧᕽ ᐋᐧᐸᒧᓈᐱᐢᐠ.
[22] ᓇᒪᐃᐧᔭ ᒫᑲ ᓂ ᐋᐧᐸᑌᐣ ᐁᑯᑕ ᐊᔭᒥᐦᐁᐃᐧᑲᒥᐠ; ᒋᑫᒫ ᑳ ᑎᐯᔨᐦᒋᑫᐟ ᑭᓭᒪᓂᑐ ᐊᓇ ᒫᒪᐁᐧᔭᐢ ᓯᔪᑳᑎᓯᐟ, ᒥᓇ ᐊᓇ ᒫᔭᑎᐦᑯᓯᐢ, ᐁᐊᐧᑯᓂ ᑳ ᐅᐟ ᐊᔭᒥᐦᐁᐃᐧᑲᒥᑯᒋᐠ ᐁᑯᑕ.
[23] ᐊᓂᒪ ᒫᑲ ᐅᑌᓇᐤ ᓇᒪᐃᐧᔭ ᓇᑕᐁᐧᔨᑕᒧᒪᑲᐣ ᐱᓯᑦ ᐊᐦᐳ ᑎᐱᐢᑳᐃᐧ ᐱᓯᑦ ᑭᑕ ᐋᐧᓭᔮᓯᑫᐟ; ᒋᑫᒫ ᐅ ᒪᓂᑐᐋᐧᐢᑌᐃᐧᐣ ᑭᓭᒪᓂᑐ ᐅᐦᒋ ᐋᐧᐢᑌᐤ, ᒥᓇ ᐋᐧᓴᐢᑯᑌᓂᑲᐣ ᐁᑯᑕ ᐁᐊᐧᑯ ᐊᓇ ᒫᔭᑎᐦᑯᓯᐢ.
[24] ᐁ ᓇᓈᑐᐦᑯᐢᑳᓀᓯᒋᐠ ᒫᑲ ᑳ ᐱᒫᒋᐃᐦᒋᐠ ᑭᑕ ᐱᒧᐦᑌᐊᐧᐠ ᒣᑳᐧᐨ ᐃᑕ ᐁ ᐋᐧᓭᔮᐠ; ᒥᓇ ᑭᐦᒋ ᐅᑭᒫᐊᐧᐠ ᐊᐢᑭᕽ ᑳ ᐊᔮᒋᐠ ᑭᑕ ᐱᑐᑲᑖᐊᐧᐠ ᐅ ᑭᐢᑌᔨᑖᑯᓯᐃᐧᓂᐋᐧᐤ ᐁᑯᑕ.
[25] ᐊᓂᐦᐃ ᒫᑲ ᐃᐢᑳᐧᑌᒪ ᓇᒪᐃᐧᑳᐨ ᑭᑕ ᑭᐸᐦᐃᑳᑌᐊᐧ ᐁ ᒣᑳᐧ ᑭᓯᑳᐠ ᓇᒪᐃᐧᔭ ᒫᑲ ᐃᐧᑳᐨ ᐁᑯᑕ ᑭᑕ ᑎᐱᐢᑳᐤ;
[26] ᐁᑯᓯ ᑭᑕ ᐱᑐᑲᑖᐁᐧᐊᐧᐠ ᐁᑯᑕ ᐅ ᑭᐢᑌᔨᑖᑯᓯᐃᐧᓂᔨᐤ ᒥᓇ ᐅ ᑭᐦᒉᔨᑖᑯᓯᐃᐧᓂᔨᐤ ᑳ ᓇᓈᑐᑯᐢᑳᓀᓯᔨᐟ ᐊᔨᓯᔨᓂᐊᐧ;
[27] ᓇᒪᐃᐧᔭ ᒫᑲ ᓈᐣᑕᐤ ᐃᓯ ᑭᑕ ᐱᐦᑐᑫᒪᑲᐣ ᐁᑯᑕ ᓈᐣᑕᐤ ᑫᑲᐧᐩ ᐁᑳ ᐁ ᐯᑲᕽ ᐊᐦᐳ ᐊᓇ ᑳ ᐃᑐᑕᕽ ᐊᓂᒪ ᑳ ᐸᑳᐧᑎᑲᐧᕽ ᐊᐦᐳ ᑭᔮᐢᑭᐃᐧᐣ; ᒫᑲ ᐱᑯ ᐊᓂᑭ ᑳ ᒪᓯᓇᐃᑳᓱᒋᐠ ᐊᓂᐦᐃ ᒫᔭᑎᐦᑯᓯᓴ ᐅ ᐱᒫᑎᓯᐃᐧᓂ ᒪᓯᓇᐦᐃᑲᓂᔨᕽ.