<Revelation ᑭᐢᑫᔨᑖᑯᑫᐃᐧᐣ 4

[1] ᑳ ᐳᓂᐸᔨᐠ ᐅᒪ ᓂ ᐋᐧᐸᑌᐣ, ᐁᑯᓯ ᐳᑎ ᐃᐢᑳᐧᑌᑦ ᔪᑌᓂᑳᑌᐤ ᑭᐦᒋ ᑭᓯᑯᕽ ᐊᓂᒪ ᒫᑲ ᓂᐢᑕᑦ ᐃᑌᐧᐃᐧᐣ ᐁ ᐯᑕᒫᐣ ᑖᐱᐢᑯᐨ ᐱᐱᑲᐧᐣ ᐊᐃᐧᔭᐠ ᐁ ᑭᑐᓯᐟ ᐁ ᐃᑌᐧᐟ, ᐯ ᐃᑐᐦᑌ ᐅᑕ ᐁᑯᓯ ᑭ ᑲ ᐋᐧᐸᐦᑕᐃᑎᐣ ᐊᓂᐦᐃ ᑫᒋᓈ ᑫ ᐊᑎ ᐊᔨᑭᑭ ᒣᐧᐢᑕᐢ ᐃᔨᑯᕽ.

[2] ᓭᒫᐠ ᐊᐦᒑᐦᑯᕽ ᓂ ᑭ ᐊᔮᐣ; ᐁᑯᓯ ᐳᑎ ᑭᐦᒋ ᐊᐱᐃᐧᐣ ᑭ ᐅᔭᐢᑌᐤ ᑭᐦᒋ ᑭᓯᑯᕽ, ᐁᑯᑕ ᒫᑲ ᐊᐃᐧᔭᐠ ᑭ ᐊᐱᐤ ᑭᐦᒋ ᐊᐱᐃᐧᓂᕽ;

[3] ᐊᓇ ᐁᑯᑕ ᑳ ᐊᐱᐟ ᑭ ᐃᑖᐸᒥᓈᑯᓯᐤ ᑖᐱᐢᑯᐨ ᒑᐢᐸᕒ ᐊᓯᓂ ᒥᓇ ᓵᕒᑎᔭᐢ; ᐋᐧᐢᑳ ᒫᑲ ᑭᐦᒋ ᐊᐱᐃᐧᓂᕽ ᐱᓯᒣᐧᔮᐱ ᑭ ᐊᔮᐤ ᐁ ᐃᑖᐸᒥᓈᑲᐧᕽ ᑖᐱᐢᑯᐨ ᐁᒪᕒᐊᓬᐟ.

[4] ᐋᐧᓴᑳᑦ ᒫᑲ ᑭᐦᒋ ᐊᐱᐃᐧᓂᕽ ᑭ ᐊᔮᐊᐧ ᓂᓯᑕᓇᐤ ᓀᐤ ᐊᔨᐋᐧᐠ ᑭᐦᒋ ᐊᐱᐃᐧᓇ; ᐁᑯᓯ ᑭᐦᒋ ᐊᐱᐃᐧᓂᕽ ᓂ ᐋᐧᐸᒫᐊᐧᐠ ᓂᓯᑕᓇᐤ ᓀᐤ ᐊᔨᐋᐧᐠ ᑳ ᓂᑳᓀᔨᑖᑯᓯᒋᐠ ᐁ ᐊᐱᒋᐠ, ᐋᐧᐱᐢᑲᓵᑲᔭ ᐁ ᑭᑭᐢᑲᑭᐠ; ᐁᑯᓯ ᐅᐢᑎᑳᐧᓂᐋᐧᕽ ᐅᓵᐃᐧᓱᓂᔮᐃᐧ ᑭᐦᒋ ᐅᑭᒫᐊᐧᐢᑐᑎᓇ.

[5] ᑭᐦᒋ ᐊᐱᐃᐧᓂᕽ ᒫᑲ ᑭ ᐅᐦᒋᐸᔨᐊᐧ ᐁ ᐋᐧᐋᐧᐢᑌᐸᔨᐠ ᒥᓇ ᐯᐦᑖᑯᓯᐃᐧᓇ ᒥᓇ ᐁ ᑭᑐᒋᐠ. ᐁᑯᓯ ᑌᐸᑯᑊ ᐋᐧᓴᐢᑯᑌᓂᑲᓇ ᐁ ᓴᐢᑭᑌᑭ ᐅᑎᐢᑲᐋᐧᔨᕽ ᑭᐦᒋ ᐊᐱᐃᐧᓂᕽ ᑭ ᐊᔮᐊᐧ, ᐁᐊᐧᑯᓂ ᑌᐸᑯᑊ ᐅᐟ ᐊᐦᒑᐦᑲᐧ ᑭᓭᒪᓂᑐ;

[6] ᐅᑎᐢᑲᐋᐧᔨᕽ ᒫᑲ ᑭᐦᒋ ᐊᐱᐃᐧᓂᕽ ᑖᐱᐢᑯᐨ ᐋᐧᐸᒧᓈᐱᐢᑯᐃᐧ ᑭᐦᒋᑲᒥ ᐁ ᓵᐳᐯᓈᑲᐧᕽ; ᐁᑯᓯ ᒣᑳᐧᐨ ᑭᐦᒋ ᐊᐱᐃᐧᓂᕽ ᒥᓇ ᐋᐧᓴᑳᑦ ᑭᐦᒋ ᐊᐱᐃᐧᓂᕽ, ᑭ ᐊᔮᐊᐧᐠ ᓀᐤ ᐁ ᐱᒫᑎᓯᒋᐠ ᐅᓯᐦᒋᑲᓇᐠ ᒥᓯᐁᐧ ᐁ ᐅᐢᑭᓯᑯᒋᐠ ᓂᑳᐣ ᒥᓇ ᐅᑖᕽ.

[7] ᐊᓇ ᒫᑲ ᓂᐢᑕᑦ ᐅᓯᐦᒋᑲᐣ ᑖᐱᐢᑯᐨ ᒥᐢᑕᑫᓯᐤ, ᐁᑯᓯ ᐊᓇ ᑯᑕᐠ ᐅᓯᐦᒋᑲᐣ ᑖᐱᐢᑯᐨ ᒧᐢᑐᓱᓯᐢ, ᐁᑲᐧ ᐊᓇ ᑯᑕᐠ ᐅᑳᐧᑲᓂᕽ ᑖᐱᐢᑯᐨ ᐊᔨᓯᔨᓂᐤ, ᐊᓇ ᒫᑲ ᑯᑕᐠ ᑖᐱᐢᑯᐨ ᑳ ᐸᐹᒥᔮᐟ ᒥᑭᓯᐤ.

[8] ᐊᓂᑭ ᒫᑲ ᐁ ᓀᐃᐧᒋᐠ ᐅᓯᐦᒋᑲᓇᐠ ᓈᓂᑯᑖᐧᓯᐠ ᐁ ᐃᑕᑎᓂᔨᑭ ᐅᑕᑕᑲᐧᓂᐋᐧᐊᐧ ᒥᓇ ᒥᓯᐁᐧ ᑭ ᐅᐢᑭᓯᑯᐊᐧᐠ ᐋᐧᐢᑳ ᒥᓇ ᐱᐦᒑᔨᕽ; ᐁᑯᓯ ᓇᒪᐃᐧᔭ ᐋᐢᑌ ᐊᔮᐊᐧᐠ ᐁ ᑭᓯᑳᐠ ᒥᓇ ᐁ ᑎᐱᐢᑳᐠ ᐁ ᐃᑌᐧᒋᐠ, ᑲᓈᑎᓯᐤ, ᑲᓈᑎᓯᐤ, ᑲᓈᑎᓯᐤ, ᑳ ᑎᐯᔨᐦᒋᑫᐟ ᑭᓭᒪᓂᑐ, ᒫᒪᐁᐧᔭᐢ ᓯᔪᑳᑎᓯᐟ, ᑳ ᑭ ᐊᔮᐟ ᑳ ᐊᔮᐟ ᒥᓇ ᑫ ᐊᔮᐟ,

[9] ᐃᐢᐱ ᒫᑲ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᐁ ᒥᔮᒋᐠ ᑭᐢᑕᑭᒥᐁᐧᐃᐧᐣ ᒥᓇ ᑭᐦᒑᔨᐃᐧᐃᐧᐣ ᒥᓇ ᓇᓈᐢᑯᒧᐃᐧᐣ ᐊᓂᐦᐃ ᑳ ᐊᐱᔨᐟ ᑭᐦᒋ ᐊᐱᐃᐧᓂᕽ, ᐊᓂᐦᐃ ᑳ ᐱᒫᑎᓯᔨᐟ ᑳᑭᑫ ᒥᓇ ᑳᑭᑫ,

[10] ᐊᓂᑭ ᓂᓯᑕᓇᐤ ᓀᐤ ᐊᔨᐋᐧᐠ ᑳ ᓂᑳᓀᔨᑖᑯᓯᒋᐠ ᑭ ᐸᐦᑭᓯᓇᐧᐠ ᐅᑎᐢᑲᐋᐧᔨᕽ ᐊᓂᐦᐃ ᑳ ᐊᐱᔨᐟ ᑭᐦᒋ ᐊᐱᐃᐧᓂᕽ ᒥᓇ ᑭ ᐅᒋᐦᒋᑲᐧᓂᐢᑕᐁᐧᐊᐧᐠ ᐊᓂᐦᐃ ᑳ ᐱᒫᑎᓯᔨᐟ ᑳᑭᑫ ᒥᓇ ᑳᑭᑫ, ᒥᓇ ᑭ ᐃᓯᐁᐧᐱᓇᒪᐧᐠ ᐅ ᑭᐦᒋ ᐅᑭᒫᐊᐧᐢᑐᑎᓂᐋᐧᐊᐧ ᐅᑎᐢᑲᐋᐧᔨᕽ ᑭᐦᒋ ᐊᐱᐃᐧᓂᕽ ᐁ ᐃᑌᐧᒋᐠ,

[11] ᑭ ᑌᐸᑫᔨᑖᑯᓯᐣ ᑭᔭ ᑌᐯᔨᐦᒋᑫᔭᐣ ᓂ ᑭᓭᒪᓂᑐᒥᓈᐣ ᑭᑕ ᐊᑭᑕᒫᑲᐃᐧᔭᐣ ᑭᐢᑌᔨᑖᑯᓯᐃᐧᐣ ᒥᓇ ᑭᐦᒑᔨᐃᐧᐃᐧᐣ ᒥᓇ ᒪᐢᑲᐃᐧᓯᐃᐧᐣ; ᒋᑫᒫ ᑭ ᑭ ᐅᓯᑖᐣ ᑲᐦᑭᔭᐤ ᑫᑲᐧᔭ ᒥᓇ ᑭᔭ ᑭᐟ ᐃᑌᔨᑕᒧᐃᐧᐣ ᐅᐦᒋ ᑭ ᐊᔮᐊᐧ ᒥᓇ ᑭ ᐅᓯᒋᑳᑌᐊᐧ.