[1] ᐁᑯᓯ ᓂ ᑭ ᐃᑖᐱᐣ ᐳᑎ ᒫᑲ, ᐊᓇ ᒫᔭᑎᐦᑯᓯᐢ ᑭ ᓂᐸᐃᐧᐤ ᓵᔭᐣ ᐊᐧᒋᕽ ᐁ ᐃᐧᒉᐃᐧᑯᐟ ᒫᑲ ᒥᑖᑕᐦᑐᒥᑕᓇᐤ ᒥᓇ ᓀᒥᑕᓇᐤ ᓀᐤ ᐊᔨᐋᐧᐠ ᐁ ᐊᔮᔨᐟ ᐅ ᐃᐧᔪᐃᐧᐣ ᒥᓇ ᐅ ᐃᐧᔪᐃᐧᓂᔨᐤ ᐅᑖᐃᐧᔭ ᐁ ᒪᓯᓇᐃᑳᑌᔨᑭ ᐅᐢᑲᑎᑯᐋᐧᕽ.
[2] ᐁᑯᓯ ᓂ ᑭ ᐯᐦᑌᐣ ᐃᑌᐧᐃᐧᐣ ᑭᐦᒋ ᑭᓯᑯᕽ ᐅᐦᒋ ᑖᐱᐢᑯᐨ ᒥᐦᒉᐟ ᓂᐱᔭ ᐁ ᐯᑖᑲᐧᑭ ᒥᓇ ᑖᐱᐢᑯᐨ ᐁ ᑭᓯᐁᐧᒋᐠ ᐁ ᑭᑐᒋᐠ; ᐁᑯᓯ ᐊᓂᒪ ᐃᑌᐧᐃᐧᐣ ᑳ ᐯᑕᒫᐣ ᑖᐱᐢᑯᐨ ᐅᐟ ᐃᑌᐧᐃᐧᓂᐋᐧᐤ ᐅᑭᑐᒋᑫᐊᐧᐠ ᐁ ᑭᑐᑖᒋᐠ ᐅ ᑭᑐᒋᑲᓂᐋᐧᐊᐧ;
[3] ᐁᑯᓯ ᓂᑲᒧᐊᐧᐠ ᒫᓇ ᐱᑯ ᐅᐢᑭ ᓂᑲᒧᐣ ᐅᑎᐢᑲᐋᐧᔨᕽ ᐊᓂᒪ ᑭᐦᒋ ᐊᐱᐃᐧᐣ ᒥᓇ ᐅᑎᐢᑲᐋᐧᔨᕽ ᐊᓂᑭ ᓀᐤ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᒥᓇ ᐊᓂᑭ ᑳ ᓂᑳᓀᔨᑖᑯᓯᒋᐠ; ᓇᒪᐃᐧᔭ ᒫᑲ ᐊᐃᐧᔭᐠ ᐊᔨᓯᔨᓂᐤ ᑭ ᑲᐢᑭᑖᐤ ᑭᑕ ᑭᐢᑫᔨᑕᕽ ᐁᐊᐧᑯ ᓂᑲᒧᐣ ᐱᑯ ᐊᓂᑭ ᒥᑖᑕᐦᑐᒥᑕᓇᐤ ᒥᓇ ᓀᒥᑕᓇᐤ ᓀᐤ ᐊᔨᐋᐧᐠ, ᐊᓂᑭ ᐅᑎ ᑳ ᑭ ᑭᐢᐱᓇᑎᐦᒋᐠ ᐊᐢᑭᕽ ᐅᐦᒋ.
[4] ᐁᐊᐧᑯᓂᐠ ᐅᑭ ᐁᑳ ᑳ ᑭ ᐅᐦᒋ ᐃᐧᔨᐱᐃᑯᒋᐠ ᐃᐢᑫᐧᐊᐧ ᒋᑫᒫ ᐅᐢᑭᔨᓂᐃᐧᐊᐧᐠ. ᐁᐊᐧᑯᓂᐠ ᐅᑭ ᑳ ᐸᐸᒥᑎᓴᐋᐧᒋᐠ ᒫᔭᑎᐦᑯᓯᓴ ᐱᑯ ᐃᑌ ᐁ ᐊᔨᑐᑌᔨᐟ. ᐅᑭ ᑭ ᑭᐢᐱᓇᑖᐊᐧᐠ ᐊᔨᓯᔨᓂᓈᕽ ᐅᐦᒋ ᑭᑕ ᓂᑳᓂ ᒥᓂᓯᐃᐧᐃᐧᓂᒋᐠ ᑭᓭᒪᓂᑐ ᐃᓯ ᒥᓇ ᒫᔭᑎᐦᑯᓯᐢ ᐃᓯ.
[5] ᓇᒪ ᑫᑲᐧᐩ ᒫᑲ ᑭᔮᐢᑭᐃᐧᐣ ᑭ ᒥᐢᑲᒫᐧᐣ ᐅᑐᓂᐋᐧᕽ; ᓇᒪ ᓈᐣᑕᐤ ᒫᔨᓈᑯᒋᑫᐊᐧᐠ.
[6] ᐁᑯᓯ ᓂ ᐋᐧᐸᒫᐤ ᑯᑕᐠ ᐅᑭᓯᑯ ᐁ ᐱᒥᔮᐟ ᒣᑳᐧ ᓇᔦᐊᐧᒋᑭᓯᑯᕽ, ᐁ ᐊᔮᐟ ᑳᑭᑫ ᒥᔮᐧᒋᒧᐃᐧᐣ ᑭᑕ ᐃᐧᐦᑕᒪᐋᐧᐟ ᐊᓂᐦᐃ ᐊᐢᑭᕽ ᑳ ᐊᔮᔨᐟ ᒥᓇ ᑲᐦᑭᔭᐤ ᐁ ᐃᑕᑐᑌᐃᐧᓯᔨᐟ ᒥᓇ ᐁ ᐃᑕᑐᐢᑳᓀᓯᔨᐟ ᒥᓇ ᐃᑕᑐ ᐱᑭᐢᑫᐧᐃᐧᓀᔨᐟ ᒥᓇ ᐁ ᐃᑕᑐ ᐊᔨᓯᔨᓂᐃᐧᔨᐟ;
[7] ᐁᑯᓯ ᐃᑌᐧᐤ ᐁ ᑭᓯᐁᐧᐟ, ᑯᓯᑫᐧᔨᒥᕽ ᑭᓭᒪᓂᑐ ᒥᓇ ᑭᐢᑕᑭᒥᕽ; ᒋᑫᒫ ᐅᑎᐦᒋᐸᔨᔨᐤ ᐃᑕ ᑭᑕ ᐅᔭᓱᐋᐧᓯᐁᐧᐟ; ᒥᓇ ᐊᔭᒥᐁᐢᑖᕽ ᐊᓇ ᑳ ᑭ ᐅᓯᑖᐟ ᑭᓯᐠ ᒥᓇ ᐊᐢᑭ ᒥᓇ ᑭᐦᒋᑲᒥ ᒥᓇ ᐁ ᒧᑭᒋᐊᐧᓂᐯᑯᐊᐧᑭ ᓂᐱᔭ.
[8] ᑯᑕᐠ ᒫᑲ ᐅᑭᓯᑯ, ᐁᑲᐧ ᓂᓱ, ᓈᐊᐧᐩ ᑭ ᐱᒥᐸᔨᐤ ᐁ ᐃᑌᐧᐟ, ᐸᑭᐦᑎᐣ, ᐸᑭᐦᑎᐣ ᐊᓂ ᐹᐱᓬᐊᐣ ᑳ ᑭᐦᒑᔨᐊᐧᕽ, ᑳ ᑭ ᒥᓇᐋᐟ ᑲᐦᑭᔭᐤ ᐁ ᐃᑕᑐᐢᑳᓀᓯᔨᐟ ᐊᔨᓯᔨᓂᐊᐧ ᐁ ᓱᒥᓈᐳᐊᐧᓂᔨᐠ ᐅ ᑭᓯᐋᐧᑖᐧᐃᐧᐣ ᐅ ᐱᓯᑳᐧᑎᓯᐃᐧᓇ ᐅᐦᒋ.
[9] ᑯᑕᐠ ᒫᑲ ᐅᑭᓯᑯ, ᐁᑲᐧ ᓂᐢᑐ, ᑭ ᓈᐊᐧᔪᑎᓴᐁᐧᐤ ᐁ ᐃᑌᐧᐟ ᐁ ᑭᓯᐁᐧᐟ, ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐊᔭᒥᐦᐋᐃᐧ ᐊᑐᐢᑲᐋᐧᒋ ᐊᓂᐦᐃ ᐱᓯᐢᑭᐊᐧ ᒥᓇ ᐅ ᓇᐢᐱᓯᒋᑲᓂᔨᐤ, ᒥᓇ ᑭᐢᑭᓇᐋᐧᒋᐃᑯᒋ ᐅᐢᑲᑎᑯᕽ ᐊᐦᐳ ᐅ ᒋᐦᒋᕽ,
[10] ᐃᐧᔭ ᒥᓇ ᑭᑕ ᒥᓂᑫᐧᐤ ᐁ ᓱᒥᓈᐳᐊᐧᓂᔨᐠ ᐅ ᑭᓯᐋᐧᓯᐃᐧᐣ ᑭᓭᒪᓂᑐ, ᑳ ᑲᐧᔮᑕᕽ ᐁ ᒧᐢᑖᑲᒥᐠ ᐅ ᑭᓯᐢᑖᑫᐃᐧ ᒥᓂᑳᐧᑲᓂᕽ; ᐁᑯᓯ ᑭᑕ ᑯᑕᑭᐋᐤ ᐃᐢᑯᑌᐤ ᒥᓇ ᐃᐢᑯᑌᓯᑲᐣ ᐅᐦᒋ ᐁ ᐋᐧᐸᒥᑯᐟ ᑳ ᑲᓈᑎᓯᔨᐟ ᐅᑭᓯᑯᐊᐧ ᒥᓇ ᐁ ᐋᐧᐸᒥᑯᐟ ᐊᓂᐦᐃ ᒫᔭᑎᐦᑯᓯᓴ;
[11] ᐁᑯᓯ ᐁ ᑲᐢᑳᐸᑌᔨᐠ ᐅ ᑯᑕᑭᐦᐃᑯᐃᐧᓂᐋᐧᐤ ᐃᐢᐹᑫᐸᔨᔨᐤ ᑳᑭᑫ ᒥᓇ ᑳᑭᑫ; ᓇᒪᐃᐧᔭ ᒫᑲ ᐋᐢᑌ ᐊᔮᐊᐧᐠ ᐁ ᑭᓯᑳᔨᐠ ᒥᓇ ᐁ ᑎᐱᐢᑳᔨᐠ ᐊᓂᑭ ᑳ ᐊᔭᒥᐦᐁᐢᑕᐋᐧᒋᐠ ᐊᓂᐦᐃ ᐱᓯᐢᑭᐊᐧ ᒥᓇ ᐅ ᓇᐢᐱᓯᒋᑲᓇ, ᒥᓇ ᐊᐃᐧᔭᐠ ᐁ ᑭᐢᑭᓇᐋᐧᒋᐃᐦᐟ ᐅ ᐃᐧᔪᐃᐧᓂᔨᐤ.
[12] ᐁᑯᑕ ᐅᒪ ᐅ ᓯᐯᔨᑕᒧᐃᐧᓂᐋᐧᐤ ᐅᑲᓈᑎᓯᐊᐧᐠ, ᐊᓂᑭ ᑳ ᑲᓇᐁᐧᔨᐦᑕᐦᑭᐠ ᐅᔭᓱᐁᐧᐃᐧᓇ ᑭᓭᒪᓂᑐ, ᒥᓇ ᐅ ᑖᐯᐧᔦᔨᒥᑯᐃᐧᐣ ᒋᓴᐢ.
[13] ᓂ ᑭ ᐯᐦᑌᐣ ᒫᑲ ᐃᑌᐧᐃᐧᐣ ᑭᐦᒋ ᑭᓯᑯᕽ ᐅᐦᒋ ᐁ ᐃᑎᑯᔮᐣ, ᒪᓯᓇᐦᐊ, ᓴᐁᐧᔨᑖᑯᓯᐊᐧᐠ ᐅᓂᐱᐊᐧᐠ ᑳ ᑎᐯᔨᐦᒋᑫᐟ ᐃᓯ ᑳ ᓂᐱᒋᐠ ᐊᓄᐦᐨ ᐅᐦᒋ; ᐁᐦᐁ, ᐃᑌᐧᐤ ᐊᐦᒑᕽ ᑭᑕ ᐊᔦᐧᐱᒋᐠ ᐅᐟ ᐊᑐᐢᑫᐃᐧᓂᐋᐧᕽ ᐅᐦᒋ; ᒋᑫᒫ ᐅᐟ ᐃᓯᐦᒋᑫᐃᐧᓂᐋᐧᐊᐧ ᐱᒥᑎᓴᐅᑲᐧᐠ.
[14] ᐁᑯᓯ ᓂ ᐋᐧᐸᑌᐣ ᐳᑎ ᒫᑲ ᐁ ᐋᐧᓯᑌᐠ ᐊᐧᐢᑯ; ᐁᑯᑕ ᒫᑲ ᐊᐧᐢᑯᕽ ᓂ ᐋᐧᐸᒫᐤ ᐊᐃᐧᔭᐠ ᐁ ᐊᐱᐟ ᑖᐱᐢᑯᐨ ᐊᔨᓯᔨᓂᐃᐧᑯᓯᓵᐣ, ᐁ ᑭᑲᐢᑐᑎᓀᐟ ᐅᓵᐃᐧᓱᓂᔮᐤ ᑭᐦᒋ ᐅᑭᒫᐊᐧᐢᑐᑎᐣ, ᐁᑯᓯ ᐅᒋᐦᒋᕽ ᐁ ᑳᓯᓯᓂᔨᐠ ᒪᓂᓯᑲᐣ.
[15] ᑯᑕᐠ ᒫᑲ ᐅᑭᓯᑯ ᑭ ᐯ ᐊᐧᔭᐃᐧᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐅᐦᒋ, ᐁ ᑌᐹᐧᑖᐟ ᐁ ᑭᓯᐁᐧᐟ ᐊᓂᐦᐃ ᑳ ᐊᐱᔨᐟ ᐊᐧᐢᑯᕽ, ᓯᐯᐧᑎᓴᐊ ᑭ ᒪᓂᓯᑲᐣ ᒥᓇ ᒪᓂᓯᑫ; ᒋᑫᒫ ᐅᑎᐦᒋᐸᔨᐤ ᑭᑕ ᒪᓂᓯᑫᕽ; ᐊᔨᐢ ᐅᓵᒪᑎᑌᐊᐧ ᑭᐢᑎᑳᓇ ᑫ ᒪᓂᓴᒥᕽ ᐊᐢᑭᕽ.
[16] ᐊᓇ ᒫᑲ ᑳ ᐊᐱᐟ ᐊᐧᐢᑯᕽ ᑭ ᐃᓯ ᐁᐧᐱᓇᑦ ᐅ ᒪᓂᓯᑲᐣ ᐊᐢᑭᕽ; ᐁᑯᓯ ᑭ ᑭᓯ ᒪᓂᓯᑳᓂᐊᐧᐣ ᐊᐢᑭᕽ.
[17] ᑯᑕᐠ ᒫᑲ ᐅᑭᓯᑯ ᑭ ᐯ ᐅᐦᒋ ᐊᐧᔭᐃᐧᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐊᓂᒪ ᑭᐦᒋ ᑭᓯᑯᕽ ᑳ ᐊᔮᐠ, ᐃᐧᔭ ᒥᓇ ᐁ ᐊᔮᐟ ᐁ ᑳᓯᓯᓂᔨᐠ ᒪᓂᓯᑲᐣ.
[18] ᐁᑲᐧ ᑯᑕᐠ ᐅᑭᓯᑯ ᐸᑭᑎᓈᓱᐃᐧᓈᐱᐢᑯᕽ ᑭ ᐯ ᐅᐦᒋᐤ ᐁᐊᐧᑯ ᐃᐢᑯᑌᐤ ᐁ ᑎᐯᔨᑕᕽ; ᑭ ᑌᐸᐧᑌᐤ ᒫᑲ ᐁ ᑭᓯᐁᐧᐟ ᐊᓂᐦᐃ ᑳ ᐊᔮᔨᐟ ᐁ ᑳᓯᓯᓂᔨᐠ ᒪᓂᓯᑲᐣ, ᐁ ᐃᑖᐟ, ᓯᐯᐧᑎᓴᐊ ᑳ ᑳᓯᓯᐠ ᑭ ᒪᓂᓯᑲᐣ ᒥᓇ ᒫᐊᐧᒋᐃᐠ ᐁ ᐋᐊᓯ ᓂᐦᑖᐃᐧᑭᒋᐠ ᓱᒥᓂᓴᐠ ᐊᐢᑭᕽ; ᒋᑫᒫ ᒥᑐᓂ ᐊᑎᓱᔨᐊᐧ ᐅ ᓱᒥᓂᓴ.
[19] ᐊᓇ ᒫᑲ ᐅᑭᓯᑯ ᑭ ᐃᓯᐁᐧᐱᓇᑦ ᐅ ᒪᓂᓯᑲᐣ ᐊᐢᑭᕽ ᒥᓇ ᑭ ᒫᐊᐧᒋᐁᐤ ᓱᒥᓂᓴ ᑳ ᑭᐢᑎᑳᑎᒥᐦᐟ ᐊᐢᑭᕽ, ᑭ ᐃᓯ ᐁᐧᐱᓀᐤ ᒫᑲ ᓱᒥᓈᐳᐃᐧ ᒫᑯᐃᑲᓂᕽ ᐊᓂᒪ ᑭᐦᒋ ᓱᒥᓈᐳᐃᐧ ᒫᑯᐃᑲᐣ ᐅ ᑭᓯᐋᐧᓯᐃᐧᐣ ᑭᓭᒪᓂᑐ.
[20] ᐊᓂᒪ ᒫᑲ ᓱᒥᓈᐳᐃᐧ ᒫᑯᐃᑲᐣ ᑭ ᒫᒫᑯᐢᑭᑳᑌᐤ ᐊᐧᔭᐃᐧᑎᒫᔨᕽ ᐅᑌᓈᕽ, ᒥᐦᑯ ᒫᑲ ᑭ ᐯ ᐊᐧᔭᐃᐧᒋᐊᐧᐣ ᓱᒥᓈᐳᐃᐧ ᒫᑯᐃᑲᓂᕽ ᐅᐦᒋ, ᐃᐢᑯ ᐅᐟ ᐊᔭᐱᑫᐧᐱᒋᑲᓂᐋᐧᕽ ᒥᐢᑕᑎᒪᐧᐠ, ᓂᓵᐧᐤ ᒥᑖᑕᐦᑐᒥᑕᓇᐤ ᑕᐦᑐ ᑎᐸᐦᐊᐢᑳᐣ ᐃᔨᑯᕽ.