[1] ᒣᐧᐢᑕᐢ ᐃᔨᑯᕽ ᒫᑲ ᐅᐦᐃ ᓂ ᑭ ᐋᐧᐸᒫᐤ ᑯᑕᐠ ᐅᑭᓯᑯ ᐁ ᐯ ᔮᓯᐟ ᑭᐦᒋ ᑭᓯᑯᕽ ᐅᐦᒋ ᐁ ᐊᔮᐟ ᑭᐦᒋ ᑎᐯᔨᐦᒋᑫᐃᐧᐣ; ᐁᑯᓯ ᐊᐢᑭ ᑭ ᐋᐧᓭᔮᐤ ᐅ ᒪᓂᑐ ᐋᐧᐢᑌᐃᐧᐣ ᐅᐦᒋ.
[2] ᑭ ᑌᐯᐧᐤ ᒫᑲ ᒥᐢᑕᐦᐃ ᐁ ᑭᓯᐁᐧᐟ, ᐁ ᐃᑌᐧᐟ, ᐸᑭᐦᑎᐣ, ᐸᑭᐦᑎᐣ ᐊᓂ ᐹᐱᓬᐊᐣ ᑳ ᑭᐦᒑᔨᐊᐧᕽ, ᐁᑯᓯ ᐃᐧᑭᐊᐧᐠ ᒪᒑᔭᐠ, ᒥᓇ ᐅᐟ ᐃᑖᐃᐧᓂᐤ ᑲᐦᑭᔭᐤ ᐁᑳ ᑳ ᐯᑭᓯᐟ ᐊᐦᒑᕽ, ᒥᓇ ᐅᐟ ᐃᑖᐃᐧᓂᐤ ᑲᐦᑭᔭᐤ ᐁᑳ ᑳ ᐯᑭᓯᐟ ᒥᓇ ᑳ ᐸᑳᐧᑎᑯᓯᐟ ᐱᔦᓯᐤ.
[3] ᒋᑫᒫ ᐁ ᓱᒥᓈᐳᐊᐧᓂᔨᐠ ᐁ ᑭᓯᐋᐧᑖᐧᐟ ᐅ ᐱᓯᑳᐧᑎᓯᐃᐧᓇ ᑭ ᐅᐦᒋ ᐸᐦᑭᓯᓇᐧᐠ ᑲᐦᑭᔭᐤ ᐁ ᐃᑕᑐᐢᑳᓀᓯᒋᐠ ᐊᔨᓯᔨᓂᐊᐧᐠ; ᒥᓇ ᑭᐦᒋ ᐅᑭᒫᐊᐧᐠ ᐊᐢᑭᕽ ᑭ ᐃᐧᒋ ᐱᓯᑳᐧᑎᓯᒣᐊᐧᐠ, ᒥᓇ ᐅᑕᑖᐁᐧᐊᐧᐠ ᐊᐢᑭᕽ ᑭ ᐊᑎ ᐁᐧᔪᑎᓯᐊᐧᐠ ᐁ ᐃᓯ ᐅᓵᒣᔭᑎᓂᔨᑭ ᐅ ᓇᐦᐃᔭᐁᐧᐃᓱᐃᐧᓇ.
[4] ᓂ ᑭ ᐯᐦᑌᐣ ᒫᑲ ᑯᑕᐠ ᐃᑌᐧᐃᐧᐣ ᑭᐦᒋ ᑭᓯᑯᕽ ᐅᐦᒋ ᐁ ᐃᑌᐧᕽ, ᐯ ᐊᐧᔭᐃᐧᐠ ᓂᐟ ᐃᔨᓂᒥᑎᐠ, ᓇᑲᑎᕽ, ᐁᑳ ᑭᑕ ᐅ ᐃᐧᒉᐋᐧᑲᓂᑕᒫᐧᔦᐠ ᐅ ᒪᒋᐃᑎᐃᐧᓇ, ᒥᓇ ᐁᑳ ᑭᑕ ᐊᓯᒋᐸᔨᐃᑲᐃᐧᔦᐠ ᐅ ᑯᑕᑭᐦᐃᑯᐃᐧᓂᕽ;
[5] ᒋᑫᒫ ᐅ ᒪᒋᐃᑎᐃᐧᓇ ᑭ ᐅᑎᑕᒧᒪᑲᓂᔨᐤ ᐊᐦᐳ ᑭᐦᒋ ᑭᓯᐠ, ᒥᓇ ᑭᓭᒪᓂᑐ ᑭ ᑭᐢᑭᓯᑐᑕᒣᐧᐤ ᐅ ᐊᐧᓂᑐᑕᒧᐃᐧᓇ.
[6] ᐃᑐᑖᕽ ᐃᐧᐢᑕ ᑳ ᑭ ᐃᑐᑕᕽ, ᒥᓇ ᓂᓵᐧᐤ ᐃᔨᑯᕽ ᐃᑐᑖᕽ ᐊᓂᒪ ᓂᓵᐧᐤ ᐃᔨᑯᕽ ᑳ ᑭ ᐃᓯᐦᒋᑫᐟ; ᐊᓂᒪ ᒥᓂᑳᐧᑲᐣ ᑳ ᑭ ᒧᐢᑭᓇᑖᐟ ᓂᓵᐧᐤ ᐃᔨᑯᕽ ᒧᐢᑭᓇᑖᐋᐧᕽ.
[7] ᐃᔨᑯᕽ ᐊᓂᒪ ᑳ ᑭ ᑲᑭᐦᒋᒧᐟ, ᒥᓇ ᑳ ᑭ ᑲᑫᐹᑎᓯᐟ, ᐁᑯᔨᑯᕽ ᒥᔨᕽ ᑯᑕᑭᑖᐃᐧᐣ ᒥᓇ ᐱᑫᐧᔨᑕᒧᐃᐧᐣ; ᒋᑫᒫ ᐃᑌᐧᐤ ᐅᑌᐃᕽ, ᓂᐟ ᐊᐱᐣ ᐁ ᑭᐦᒋ ᐅᑭᒫᐢᑫᐧᐃᐧᔮᐣ, ᐁᑯᓯ ᓇᒪᐃᐧᔭ ᓂ ᓯᑳᐃᐧᐢᑫᐧᐃᐧᐣ, ᒥᓇ ᓇᒪᐃᐧᔭ ᓈᐣᑕᐤ ᐃᓯ ᓂ ᑲ ᐋᐧᐸᑌᐣ ᐱᑫᐧᔨᑕᒧᐃᐧᐣ.
[8] ᐁᐊᐧᑯ ᐅᐦᒋ ᐯᔭᐠ ᑭᓯᑳᐤ ᐅ ᑯᑕᑭᑖᐃᐧᓇ ᑭᑕ ᑕᑯᓯᓄᒪᑲᓂᔨᐊᐧ, ᓂᐳᐃᐧᐣ ᒥᓇ ᐱᑫᐧᔨᑕᒧᐃᐧᐣ, ᒥᓇ ᓄᑌᑲᑌᐃᐧᐣ; ᐁᑯᓯ ᒥᑐᓂ ᑭᑕ ᑭᓯᓱ ᐃᐢᑯᑌᐤ ᐅᐦᒋ; ᒋᑫᒫ ᒪᐢᑲᐃᐧᓯᐤ ᑳ ᑎᐯᔨᐦᒋᑫᐟ ᑭᓭᒪᓂᑐ ᑳ ᐅᔭᓱᐋᐧᑖᐟ.
[9] ᑭᐦᒋ ᐅᑭᒫᐊᐧᐠ ᒫᑲ ᐊᐢᑭᕽ ᑳ ᐊᔮᒋᐠ ᑳ ᑭ ᐃᐧᒋ ᐱᓯᑳᐧᑎᓯᒫᒋᐠ ᒥᓇ ᑳ ᑭ ᐃᐧᒋ ᐱᒫᑎᓯᒫᒋᐠ ᐱᓯᑳᐧᑎᓯᐃᐧᓂᕽ, ᑭᑕ ᒫᑐᐊᐧᐠ ᒥᓇ ᑭᑕ ᒧᐢᑫᐧᔨᑕᒥᐃᑲᐧᐠ ᐃᐢᐱ ᐋᐧᐸᐦᑕᒫᐧᑖᐧᐃᐧ ᑲᐢᑳᐸᑌᐤ ᐁ ᑭᓯᓱᔨᐟ,
[10] ᐋᐧᔭᐤ ᐁ ᓂᐸᐃᐧᒋᐠ ᐁ ᓭᑭᐃᑯᒋᐠ ᐅ ᑯᑕᑭᐦᐃᑯ ᐃᐧᓂᔨᐤ, ᐁ ᐃᑌᐧᒋᐠ, ᐦᐋᐩ, ᐦᐋᐩ, ᑭᐦᒋ ᐅᑌᓇᐤ ᐸᐱᓬᐊᐣ, ᑳ ᓱᑲᕽ ᐅᑌᓇᐤ! ᒋᑫᒫ ᐯᔭᐠ ᑎᐸᐃᑲᐣ ᐃᔨᑯᕽ ᑯᔭᓱᐋᐧᑎᑯᐃᐧᐣ ᑕᑯᐸᔨᐤ.
[11] ᐁᑯᓯ ᐅᑕᑖᐁᐧᐊᐧᐠ ᐊᐢᑭᕽ ᒫᑐᐊᐧᐠ ᒥᓇ ᐱᑫᐧᔨᑕᒥᐃᑲᐧᐠ, ᒋᑫᒫ ᓇᒪᐃᐧᔭ ᐊᐃᐧᔭ ᐊᑖᐁᐧᔨᐊᐧ ᐁᑲᐧ ᐅᐟ ᐊᑖᐋᐧᑲᓂᐋᐧᐊᐧ;
[12] ᐊᑖᐊᐧᑲᓇ ᐅᓵᐃᐧ ᓱᓂᔮᐤ ᒥᓇ ᐋᐧᐱᐢᑭ ᓱᓂᔮᐤ, ᒥᓇ ᓱᓂᔮᐊᐧᓯᓂᔭᐠ ᒥᓇ ᓱᓂᔮᐁᐧᓴᐠ, ᒥᓇ ᐁ ᒥᔮᐧᓯᐠ ᐋᐧᐱᐢᑫᑭᐣ ᒥᓇ ᐁ ᒥᔮᐧᓯᐠ ᒋᐯᑕᑫᐧᑭᐣ, ᒥᓇ ᓯᓂᐸᐣ, ᒥᓇ ᒥᐦᑫᐧᑭᐣ; ᒥᓇ ᑲᐦᑭᔭᐤ ᑕᔨᓈᐧᑎᐠ, ᒥᓇ ᑲᐦᑭᔭᐤ ᐋᐧᐱᑲᐣ ᐊᓯᐊᐧᒋᑲᓇ, ᒥᓇ ᑲᐦᑭᔭᐤ ᐊᓯᐊᐧᒋᑲᐣ ᐁ ᐋᑲᐧᑭᑌᐠ ᒥᐢᑎᐠ ᐁ ᐅᐦᒋ ᐅᓯᒋᑳᑌᐠ, ᒥᓇ ᐅᓵᐋᐧᐱᐢᐠ, ᒥᓇ ᐃᔨᓇᑐ ᐱᐋᐧᐱᐢᐠ, ᒥᓇ ᐋᐧᐱᐢᑲᓯᓂ;
[13] ᒥᓇ ᓯᓂᒪᐣ, ᒥᓇ ᐊᐢᐸᒋᑲᐣ, ᒥᓇ ᐃᐧᑭᒫᓯᑲᐣ, ᒥᓇ ᑕᒪᐢᑯᐃᐧᐣ, ᒥᓇ ᑭᐦᒋ ᐃᐧᑭᒫᓯᑲᐣ, ᒥᓇ ᓱᒥᓈᐳ, ᒥᓇ ᐱᒥ, ᒥᓇ ᐁ ᒥᔪᓯᐟ ᐸᑫᐧᓯᑲᐣ, ᒥᓇ ᐸᑫᐧᓯᑲᓂᑳᐣ, ᒥᓇ ᒧᐢᑐᓴᐧᐠ, ᒥᓇ ᒫᔭᑎᐦᑲᐧᐠ; ᒥᓇ ᐁ ᐊᑖᑐᕽ ᒥᐢᑕᑎᒪᐧᐠ ᒥᓇ ᑎᑎᐱᑖᐹᓈᐢᑲᐧᐠ ᒥᓇ ᐊᐊᐧᑳᓇᐠ; ᒥᓇ ᐅᐟ ᐊᐦᒑᑯᐋᐧᐊᐧ ᐊᔨᓯᔨᓂᐊᐧᐠ.
[14] ᒥᓇ ᒥᓂᓴ ᑭᐟ ᐊᐦᒑᕽ ᑳ ᒧᐢᑕᐁᐧᔨᑕᕽ ᑭ ᓇᑲᑎᑯᐣ, ᒥᓇ ᑲᐦᑭᔭᐤ ᑫᑲᐧᐩ ᑳ ᑭ ᑲᑕᐊᐧᓯᓯᑭ ᒥᓇ ᑳ ᑭ ᒥᔮᐧᓯᑭ ᑭ ᓇᑲᑎᑯᐣ, ᓇᒪᐃᐧᑳᐨ ᒫᑲ ᒥᓇ ᑭ ᑲ ᒥᐢᑫᐣ.
[15] ᐊᓂᑭ ᐊᑖᐋᐧᑫᒋᐠ ᐁᐊᐧᑯᓂ ᐅᐦᐃ ᑳ ᑭ ᐅᐦᒋ ᐁᐧᔪᑎᓯᒋᐠ, ᐋᐧᔭᐤ ᑭᑕ ᓂᐸᐃᐧᐊᐧᐠ ᐁ ᐃᐢᐱᒋ ᑯᐢᑕᑭᐠ ᐅ ᑯᑕᑭᐦᐃᑯᐃᐧᓂᔨᐤ, ᐁ ᒫᑐᒋᐠ ᒥᓇ ᐁ ᑲᑳᐧᑕᑲᑌᐧᒧᒋᐠ;
[16] ᐁ ᐃᑌᐧᒋᐠ, ᐦᐋᐩ, ᐦᐋᐩ, ᐊᓂᒪ ᑭᐦᒋ ᐅᑌᓇᐤ, ᐊᓇ ᑳ ᑭ ᑭᑭᐢᑲᕽ ᐁ ᒥᔮᐧᓯᐠ ᐋᐧᐱᐢᑫᑭᐣ ᒥᓇ ᒋᐯᑕᑫᐧᑭᐣ ᒥᓇ ᒥᑫᐧᑭᐣ ᒥᓇ ᑳ ᑭ ᐊᐧᐁᐧᓯᐟ ᐅᓵᐃᐧ ᓱᓂᔮᐊᐧ ᒥᓇ ᓱᓂᔮᐊᐧᓯᓂᔭ ᒥᓇ ᓱᓂᔮᐁᐧᓴ!
[17] ᒋᑫᒫ ᐯᔭᐠ ᑎᐸᐃᑲᐣ ᐃᔨᑯᕽ ᓂᓯᐊᐧᓈᑕᓇᐧ ᑖᓂᔨᑯᕽ ᑭᐦᒋ ᐁᐧᔪᑎᓯᐃᐧᓇ ᑲᐦᑭᔭᐤ ᒫᑲ ᓈᐱᑳᐧᓂᑭᒫᐤ ᒥᓇ ᑲᐦᑭᔭᐤ ᐊᐃᐧᔭᐠ ᓈᐣᑕᐤ ᐃᑌ ᑳ ᐊᔨᑖᓯᐟ, ᒥᓇ ᓈᐱᑳᐧᐣ ᐃᔨᓂᐊᐧᐠ, ᒥᓇ ᑲᐦᑭᔭᐤ ᑳ ᑲᐢᑭᒋᑫᒋᐠ ᑭᐦᒋᑲᒥᕽ, ᐋᐧᔭᐤ ᐅᐦᒋ ᑭ ᓂᐸᐃᐧᐊᐧᐠ,
[18] ᐁᑯᓯ ᑭ ᑌᐯᐧᐊᐧᐠ ᐁ ᑲᓇᐋᐧᐸᐦᑕᑭᐠ ᑲᐢᑳᐸᑌᐤ ᐁ ᑭᓯᑌᔨᐠ, ᐁ ᐃᑌᐧᒋᐠ, ᑫᑯ ᐅᑌᓇᐤ ᐁᓯ ᐊᔮᐠ ᑖᐱᐢᑯᐨ ᐊᓂᒪ ᑭᐦᒋ ᐅᑌᓇᐤ?
[19] ᐁᑯᓯ ᐊᓯᐢᑭ ᑭ ᐃᓯᐁᐧᐱᓇᒪᐧᐠ ᐅᐢᑎᑳᐧᓂᐋᐧᕽ ᒥᓇ ᑭ ᑌᐯᐧᐊᐧᐠ ᐁ ᒫᑐᒋᐠ ᒥᓇ ᐁ ᑲᑳᐧᑕᑲᑌᐧᒧᒋᐠ, ᐁ ᐃᑌᐧᒋᐠ, ᐦᐋᐩ, ᐦᐋᐩ, ᐊᓂᒪ ᑭᐦᒋ ᐅᑌᓇᐤ ᐃᑕ ᑳ ᑭ ᐁᐧᔪᑎᓯᐃᐦᒋᐠ ᑲᐦᑭᔭᐤ ᑳ ᐊᔮᒋᐠ ᐅ ᓈᐱᑳᐧᓂᐋᐧᐊᐧ ᑭᐦᒋᑲᒥᕽ ᐁ ᐃᓯ ᒥᐢᑕᐦᐃ ᐃᑕᑭᑕᒫᑫᐟ! ᒋᑫᒫ ᐯᔭᐠ ᑎᐸᐃᑲᐣ ᐃᔨᑯᕽ ᒣᐦᒋ ᓂᓯᐊᐧᓈᒋᐋᐤ.
[20] ᒪᒪᐦᑖᑯᓯᐠ ᒫᑲ ᐁᐊᐧᑯ ᐅᐦᒋ ᑭᔭ ᑭᐦᒋ ᑭᓯᐠ, ᒥᓇ ᑭᔭᐋᐧᐤ ᐅᑲᓈᑎᓯᐊᐧᐠ, ᒥᓇ ᑭᔭᐋᐧᐤ ᐊᐹᐢᑎᓬᐊᐠ, ᒥᓇ ᑭᔭᐋᐧᐤ ᐅᑭᐢᑭᐁᐧᐦᐃᑫᐊᐧᐠ; ᒋᑫᒫ ᑭᓭᒪᓂᑐ ᑭ ᐅᔭᓱᐋᐧᑌᐤ ᑭᐟ ᐃᑕᓱᐁᐧᐃᐧᓂᐋᐧᐤ.
[21] ᐁᑯᓯ ᐁ ᒪᐢᑲᐃᐧᓯᐟ ᐅᑭᓯᑯ ᑭ ᐅᑎᓀᐤ ᐊᓯᓂᔭ ᑖᐱᐢᑯᐨ ᑭᐦᒋ ᐱᓂᐳᒋᑲᓇᓯᓂᔭ, ᐁᑯᓯ ᑭᐦᒋᑲᒥᕽ ᑭ ᐸᑲᐢᑕᐁᐧᐁᐧᐱᓀᐤ ᐁ ᐃᑌᐧᐟ, ᐁᑯᓯ ᐅᒪ ᐁ ᐃᓯ ᐸᑲᒥ ᐸᑭᑎᕽ ᐊᓂᒪ ᐹᐱᓬᐊᐣ, ᑭᐦᒋ ᐅᑌᓇᐤ ᑫ ᐃᓯ ᓂᐦᒋᐁᐧᐱᓂᑳᑌᐠ, ᐁᑯᓯ ᓇᒪᐃᐧᔭ ᓈᐣᑕᐤ ᒥᓇ ᑭᑕ ᒥᐢᑭᑲᑌᐤ.
[22] ᐊᓂᑭ ᒫᑲ ᐅᑭᑐᒋᑫᐊᐧᐠ ᒥᓇ ᐅᓂᑲᒧᐊᐧᐠ ᒥᓇ ᐅᐳᑖᒋᑫᐊᐧᐠ ᒥᓇ ᐱᐱᑲᐧᓇ ᑳ ᑭᑐᑖᒋᐠ ᓇᒪᐃᐧᑳᐨ ᒥᓇ ᑭᑕ ᐯᐦᑖᑯᓯᐊᐧᐠ ᐃᑕ ᑳ ᐊᔮᔭᐣ; ᓇᒪᐃᐧᔭ ᒥᓇ ᐃᐧᑳᐨ ᐅᓯᐦᒋᑫᐤ ᓈᐣᑕᐤ ᑫᑲᐧᐩ ᑳ ᐊᔭᑐᐢᑳᑕᕽ ᑭᑕ ᒥᐢᑲᐋᐧᐤ ᐃᑕ ᑳ ᐊᔮᔭᐣ; ᓇᒪᐃᐧᔭ ᒥᓇ ᐃᐧᑳᐨ ᐱᓂᐳᒋᑲᓇᓯᓂ ᑭᑕ ᐯᑕᐋᐧᐤ ᐃᑕ ᑳ ᐊᔮᔭᐣ;
[23] ᒥᓇ ᐁ ᐋᐧᐢᑌᐠ ᐋᐧᓴᐢᑯᑌᓂᑲᐣ ᓇᒪᐃᐧᑳᐨ ᒥᓇ ᑭ ᑲ ᐋᐧᓭᐢᑲᒫᑯᐣ: ᒥᓇ ᓇᒪᐃᐧᑳᐨ ᑭᑕ ᐯᑕᐋᐧᐤ ᐅᐢᑭᐢᑫᐧᐁᐧᐤ ᒥᓇ ᐅᐢᑭᐢᑫᐧᐋᐧᐣ ᐃᑕ ᑳ ᐊᔮᔭᐣ; ᒋᑫᒫ ᑭᐟ ᐊᑖᐁᐧᐃᐧᔨᓂᒪᐠ ᑭ ᐅᑭᒫᐃᐧᐊᐧᐠ ᐊᐢᑭᕽ; ᐊᔨᐢ ᑭ ᒥᑌᐃᐧᐃᐧᓇ ᑭ ᐅᐦᒋ ᐊᐧᔦᓯᐋᐊᐧᐠ ᑲᐦᑭᔭᐤ ᐁ ᐃᑕᑐᐢᑳᓀᓯᒋᐠ ᐊᔨᓯᔨᓂᐊᐧᐠ ᐊᐢᑭᕽ.
[24] ᐃᐧᔭ ᒫᑲ ᑭ ᒥᐢᑲᒫᐧᐣ ᐁ ᑭᑭᐢᑳᑯᐟ ᐅ ᒥᐦᑯᔨᐤ ᐅᑭᐢᑭᐁᐧᐦᐃᑫᐊᐧ ᒥᓇ ᐅᑲᓈᑎᓯᐊᐧ, ᒥᓇ ᑲᐦᑭᔭᐤ ᑳ ᑭ ᓂᐸᐃᒥᐦᐟ ᐊᐢᑭᕽ.