[1] ᑭ ᓂᐸᐃᐧᐤ ᒫᑲ ᐁ ᔦᑲᐃᐧᐢᑳᐠ ᑭᐦᒋᑲᒥᕽ. ᐁᑯᓯ ᓂ ᑭ ᐋᐧᐸᒫᐤ ᐱᓯᐢᑭᐤ ᐁ ᐯ ᑲᐸᐟ ᑭᐦᒋᑲᒥᕽ ᐅᐦᒋ, ᒥᑖᑕᐟ ᐁ ᐃᑕᑐᐃᐧᑌᐟ ᒥᓇ ᑌᐸᑯᑊ ᐁ ᐃᑕᑎᓂᔨᑭ ᐅᐢᑎᑳᐧᓇ, ᐅᐟ ᐁᐢᑲᓂᕽ ᒫᑲ ᒥᑖᑕᐟ ᐅᑭᒫᐊᐧᐢᑐᑎᓇ, ᐁᑯᓯ ᐃᐧᔭ ᐅᐢᑎᑳᐧᓂᕽ ᐹᐢᑖᒧᐃᐧ ᐃᐧᔪᐃᐧᓇ.
[2] ᐊᓇ ᒫᑲ ᐱᓯᐢᑭᐤ ᑳ ᐋᐧᐸᒪᐠ ᒥᓯᐱᓯᐤ ᑭ ᐃᓯᓈᑯᓯᐤ, ᒥᓇ ᐅᓯᑕ ᑖᐱᐢᑯᐨ ᒪᐢᑯᓯᑕ, ᐁᑯᓯ ᐅᑐᐣ ᑖᐱᐢᑯᐨ ᒥᐢᑕᑫᓯᐤ ᐅᑐᐣ; ᐊᓇ ᒫᑲ ᑕᕒᐋᑲᐣ ᑭ ᒥᔦᐤ ᐅ ᒪᐢᑲᐃᐧᓯᐃᐧᐣ ᒥᓇ ᐅ ᑭᐦᒋ ᐊᐱᐃᐧᐣ ᒥᓇ ᑭᐦᒋ ᑎᐯᔨᐦᒋᑫᐃᐧᐣ.
[3] ᓂ ᑭ ᐋᐧᐸᐦᑕᒫᐧᐣ ᒫᑲ ᐯᔭᐠ ᐅᐢᑎᑳᐧᐣ ᑖᐱᐢᑯᐨ ᐁ ᑭ ᒥᓵᐧᑲᓂᑳᑌᔨᐠ ᑭᑕ ᑭ ᓂᐸᐃᑯᐟ; ᐁᑯᓯ ᑭ ᐃᔨᓂᑲᐦᐋᐤ ᐊᓂᒪ ᑳ ᑭ ᐸᑲᒪᐅᐦᐟ ᐃᔨᑯᕽ ᑭᑕ ᑭ ᓂᐸᐃᑯᐟ; ᒥᓯᐁᐧᐢᑲᒥᐠ ᒫᑲ ᑭ ᒫᒪᐢᑳᑖᐤ ᐊᓇ ᐱᓯᐢᑭᐤ;
[4] ᑭ ᐊᔭᒥᐦᐋᐃᐧ ᐊᑐᐢᑲᐁᐧᐊᐧᐠ ᒫᑲ ᐊᓂᐦᐃ ᑕᕒᐋᑲᓇ ᒋᑫᒫ ᐁ ᑭ ᒥᔮᔨᐟ ᐅ ᑎᐯᔨᐦᒋᑫᐃᐧᓂᔨᐤ ᐊᓂᐦᐃ ᐱᓯᐢᑭᐊᐧ; ᐁᑯᓯ ᑭ ᐊᔭᒥᐦᐋᐃᐧ ᐊᑐᐢᑲᐁᐧᐊᐧᐠ ᐊᓂᐦᐃ ᐱᓯᐢᑭᐊᐧ, ᐁ ᐃᑌᐧᒋᐠ, ᐊᐁᐧᓇ ᐁᓯ ᐊᔮᐟ ᑖᐱᐢᑯᐨ ᐊᓇ ᐱᓯᐢᑭᐤ? ᒥᓇ ᐊᐁᐧᓇ ᑫ ᑲᐢᑭᑖᐟ ᑭᑕ ᓇᑐᐸᔨᐢᑕᐋᐧᐟ?
[5] ᑭ ᒥᔮᐤ ᒫᑲ ᒥᑐᐣ ᑭᑕ ᑲᑭᐦᒋᒧᐟ ᒥᓇ ᑭᑕ ᐸᐹᐢᑖᒧᐃᐧ ᐱᑭᐢᑫᐧᐟ; ᒥᓇ ᑭ ᒥᔮᐤ ᑎᐯᔨᐦᒋᑫᐃᐧᐣ ᑭᑕ ᐊᔮᐟ ᓀᒥᑕᓇᐤ ᓂᓱ ᐊᔨᐋᐧᐠ ᑕᐦᑐ ᐱᓯᑦ.
[6] ᑭ ᐹᐢᑭᑐᓀᔨᐤ ᒫᑲ ᑭᑕ ᐹᐢᑖᒧᐃᐧ ᐱᑭᐢᑳᐧᑖᐟ ᑭᓭᒪᓂᑐᐊᐧ, ᑭᑕ ᐹᐢᑖᒧᐃᐧ ᐱᑭᐢᑳᐧᑕᒫᐧᐟ ᐅ ᐃᐧᔪᐃᐧᓂᔨᐤ ᒥᓇ ᐃᐧᑭᔨᐤ, ᐊᓂᐦᐃ ᐅᑎ ᑭᐦᒋ ᑭᓯᑯᕽ ᑳ ᐃᐧᑭᔨᐟ.
[7] ᑭ ᒥᔮᐤ ᒫᑲ ᑭᑕ ᓇᑐᐸᔨᐢᑕᐋᐧᐟ ᐅᑲᓈᑎᓯᐊᐧ ᒥᓇ ᑭᑕ ᓵᑯᒋᐋᐟ; ᐁᑯᓯ ᑭ ᒥᔮᐤ ᑭᑕ ᑎᐯᔨᒫᐟ ᑲᐦᑭᔭᐤ ᐁ ᐃᑕᑐᑌᐃᐧᓯᔨᐟ ᒥᓇ ᐊᔨᓯᔨᓂᐊᐧ ᒥᓇ ᐁ ᐊᐃᓯ ᐱᑭᐢᑫᐧᔨᐟ ᒥᓇ ᐁ ᐃᑕᑐᐢᑳᓀᓯᔨᐟ.
[8] ᑲᐦᑭᔭᐤ ᒫᑲ ᐊᐢᑭᕽ ᑳ ᐊᔮᒋᐠ ᑭᑕ ᐊᔭᒥᐦᐋᐃᐧ ᐊᑐᐢᑲᐁᐧᐊᐧᐠ ᑲᐦᑭᔭᐤ ᐊᐃᐧᔭᐠ ᐁᑳ ᑳ ᒪᓯᓇᐃᑳᑌᔨᐠ ᐅ ᐃᐧᔪᐃᐧᐣ ᐅ ᐱᒫᑎᓯᐃᐧ ᒪᓯᓂᐃᑲᓂᔨᕽ ᐊᓂᐦᐃ ᒫᔭᑎᐦᑯᓯᓴ ᑳ ᑭ ᓂᐸᐃᒥᐦᐟ ᐁ ᐅᔭᐢᑌᐠ ᐊᐢᑭ ᐅᐦᒋ.
[9] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐁᐧᑕᐊᐧᑳᑫᐧ ᑭᑕ ᐯᐦᑕᕽ ᑭᔮᑦ ᑭᑕ ᐯᐦᑕᑦ.
[10] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᓇᑐᓇᑦ ᐊᐊᐧᑳᓯᐁᐧᐃᐧᐣ ᐊᐊᐧᑳᑎᑯᐃᐧᓂᕽ ᐃᑐᐦᑌᐤ; ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐃᓴᐁᐧᐢᐠ ᐅᐦᒋ ᓂᐸᑖᑫᒋ, ᐃᓴᐁᐧᐢᐠ ᑭᑕ ᐅᐦᒋ ᓂᐸᐦᐋᐤ. ᐁᑯᑕ ᐅᒪ ᐅ ᓯᐯᔨᑕᒧᐃᐧᓂᐋᐧᐤ ᒥᓇ ᐅ ᑖᐯᐧᔦᔨᑕᒧᐃᐧᓂᐋᐧᐤ ᐅᑲᓈᑎᓯᐊᐧᐠ.
[11] ᓂ ᑭ ᐋᐧᐸᒫᐤ ᒫᑲ ᑯᑕᐠ ᐱᓯᐢᑭᐤ ᐊᐢᑭᕽ ᐁ ᐯ ᐅᐦᒋ ᒧᐢᑭᐟ; ᐁᑯᓯ ᑭ ᓂᓱᐃᐧᑌᐤ ᑖᐱᐢᑯᐨ ᒫᔭᑎᐦᑯᐢ, ᑖᐱᐢᑯᐨ ᒫᑲ ᑕᕒᐋᑲᐣ ᑭ ᐃᓯ ᐱᑭᐢᑫᐧᐤ.
[12] ᑲᐦᑭᔭᐤ ᒫᑲ ᐅ ᑎᐯᔨᐦᒋᑫᐃᐧᓂᔨᐤ ᐊᓂᐦᐃ ᓂᐢᑕᑦ ᐱᓯᐢᑭᐊᐧ ᐋᐸᒋᑖᐁᐧᐤ ᐁ ᑲᓇᐋᐧᐸᒥᑯᐟ. ᐁᑯᓯ ᑭ ᑲᐢᑭᑖᐤ ᐊᐢᑭ ᒥᓇ ᐊᓂᐦᐃ ᐁᑯᑕ ᑳ ᐊᔮᔨᐟ ᑭᑕ ᐊᔭᒥᐦᐋᐃᐧ ᐊᑐᐢᑲᐋᐧᔨᐟ ᐊᓂᐦᐃ ᓂᐢᑕᑦ ᐱᓯᐢᑭᐊᐧ, ᐊᓂᐦᐃ ᐅ ᐸᑲᒪᐅᑯᐃᐧᓂᔨᐤ ᑭᑕ ᑭ ᓂᐸᐃᑯᐟ ᑳ ᑭ ᐃᔨᓂᑲᐃᐦᐟ.
[13] ᐁᑯᓯ ᐃᑐᑕᑦ ᑭᐦᒋ ᑭᐢᑭᓇᐋᐧᒋ ᐋᐧᐸᐦᑕᐦᐃᐁᐧᐃᐧᓇ ᐋᐧᐋᐧᐨ ᑭᑕ ᑭ ᐯ ᔮᓯᐸᔨᑖᐟ ᐃᐢᑯᑌᐤ ᐊᐢᑭᕽ, ᑭᓯᑯᕽ ᐅᐦᒋ ᐁ ᑲᓇᐋᐧᐸᒥᑯᐟ ᐊᔨᓯᔨᓂᐊᐧ,
[14] ᐁᑯᓯ ᐊᐧᔦᓯᐁᐤ ᐊᓂᐦᐃ ᐊᐢᑭᕽ ᑳ ᐊᔮᔨᐟ ᐊᓂᐦᐃ ᑭᐢᑭᓇᐋᐧᒋ ᐋᐧᐸᐦᑕᐦᐃᐁᐧᐃᐧᓇ ᑳ ᑭ ᒥᔨᐦᐟ ᑭᑕ ᐃᑐᑕᕽ ᐁ ᐋᐧᐸᒥᑯᐟ ᐊᓂᐦᐃ ᐱᓯᐢᑭᐊᐧ; ᐁ ᐃᐧᐦᑕᒪᐋᐧᐟ ᐊᓂᐦᐃ ᐊᐢᑭᕽ ᑳ ᐊᔮᔨᐟ ᓇᐢᐱᓯᒋᑲᐣ ᑭᑕ ᐅᓯᑐᐋᐧᔨᐟ ᐊᓂᐦᐃ ᐱᓯᐢᑭᐊᐧ ᐃᓴᐁᐧᐢᐠ ᑳ ᑭ ᐅᐦᒋ ᒥᓵᐧᑲᓂᑳᑎᒥᐦᐟ, ᐁᑯᓯ ᑳ ᐱᒫᑎᓯᔨᐟ.
[15] ᑭ ᐃᓯ ᒥᔮᐤ ᒫᑲ ᔦᔦᐃᐧᐣ ᑭᑕ ᒥᔮᐟ, ᐊᓂᐦᐃ ᐅᑎ ᐱᓯᐢᑭᐤ ᐅ ᓇᐢᐱᓯᒋᑲᓇ, ᐊᓇ ᐱᓯᐢᑭᐤ ᐅ ᓇᐢᐱᓯᒋᑲᓇ ᑭᑕ ᐱᑭᐢᑫᐧᔨᐟ ᐁᑯᓯ ᒥᓇ ᑕᐦᑐ ᐁᑳ ᐁ ᐊᔮᒥᐋᐃᐧ ᐊᑐᐢᑲᐋᐧᔨᐟ ᐊᓇ ᐱᓯᐢᑭᐤ ᐅ ᓇᐢᐱᓯᒋᑲᓇ ᑭᑕ ᓂᐸᐃᒥᐦᐟ.
[16] ᐁᑯᓯ ᒥᓇ ᐃᓯᐦᒋᑫᐤ ᑲᐦᑭᔭᐤ ᑳ ᐊᐱᐢᑌᔨᑖᑯᓯᔨᐟ ᒥᓇ ᑳ ᑭᐦᒉᔨᑖᑯᓯᔨᐟ, ᑳ ᐁᐧᔪᑎᓯᔨᐟ ᒥᓇ ᑳ ᑭᑎᒫᑭᓯᔨᐟ, ᑳ ᑎᐯᔨᒥᓱᔨᐟ ᒥᓇ ᑳ ᑎᐯᔨᒥᒥᐦᐟ, ᑭᑕ ᑭᐢᑭᓇᐋᐧᒋᐃᐦᒋᐠ ᐅ ᑭᐦᒋᓂᐢᑭᐋᐧᕽ ᐊᐦᐳ ᐅᐢᑲᑎᑯᐋᐧᕽ;
[17] ᐁᑯᓯ ᐁᑳ ᐊᐃᐧᔭᐠ ᑫᑲᐧᐩ ᑭᑕ ᑭ ᐊᑖᐁᐧᐟ ᐊᐦᐳ ᑭᑕ ᑭ ᐊᑖᐋᐧᑫᐟ ᐱᑯ ᐊᓇ ᑳ ᐊᔮᐟ ᐊᓂᒪ ᑭᐢᑭᓇᐋᐧᒋᐦᒋᑲᐣ ᐅ ᐃᐧᔪᐃᐧᓂᔨᐤ ᐅᑎ ᐊᓂᐦᐃ ᐱᓯᐢᑭᐊᐧ ᐊᐦᐳ ᐁ ᐃᑕᑕᐧᑭᑌᔨᐠ ᐅ ᐃᐧᔪᐃᐧᐣ.
[18] ᐁᐊᐧᑯ ᐅᒪ ᐃᔨᓂᓯᐃᐧᐣ. ᐊᓇ ᑳ ᐅ ᓂᓯᑐᐦᑕᒧᐃᐧᓂᐟ ᑭᔮᑦ ᑭᑕ ᐊᑭᑕᑦ ᐁ ᐃᑕᑕᐧᑭᒥᒥᐦᐟ ᐊᓂᐦᐃ ᐱᓯᐢᑭᐊᐧ; ᒋᑫᒫ ᐊᔨᓯᔨᓂᐤ ᐁ ᐃᓯ ᐊᑭᑖᓱᐟ; ᐁᐊᐧᑯ ᒫᑲ ᐅᒪ ᐅᐟ ᐃᑕᑕᐧᑭᒋᑳᓱᐃᐧᐣ, ᓂᑯᑖᐧᓵᐧᐤ ᒥᑖᑕᐦᑐᒥᑕᓇᐤ ᒥᓇ ᓂᑯᑖᐧᓱᒥᑕᓇᐤ ᓂᑯᑖᐧᓯᐠ ᐊᔨᐋᐧᐠ.