[1] ᓂ ᑭ ᐋᐧᐸᐦᑕᒫᐧᐣ ᒫᑲ ᐅ ᑭᐦᒋᓂᐢᑭᕽ ᐊᓇ ᑳ ᐊᐱᐟ ᑭᐦᒋ ᐊᐱᐃᐧᓂᕽ ᒪᓯᓇᐦᐃᑲᐣ ᐁ ᒪᓯᓇᐃᑳᑌᐠ ᐱᐦᒋ ᒥᓇ ᐊᐧᐢᑭᐨ ᐁ ᐊᑯᐢᑭᐊᐧᓯᑳᑌᐠ ᑌᐸᑯᑊ ᐊᑯᐢᑭᐊᐧᓯᑲᓇ.
[2] ᐁᑯᓯ ᓂ ᐋᐧᐸᒫᐤ ᐁ ᒪᐢᑲᐃᐧᓯᐟ ᐅᑭᓯᑯ ᐁ ᑌᐸᐧᑕᕽ ᐁ ᑭᓯᐁᐧᐟ, ᐊᐁᐧᓇ ᑎᔦᐸᑫᔨᑖᑯᓯᐟ ᑭᑕ ᐹᐢᑫᑭᓇᕽ ᐊᓂᒪ ᒪᓯᓇᐦᐃᑲᐣ, ᒥᓇ ᑭᑕ ᐋᐸᐊᕽ ᐊᑯᐢᑭᐊᐧᓯᑲᓇ?
[3] ᓇᒪᐃᐧᔭ ᒫᑲ ᐊᐃᐧᔭᐠ ᑭᐦᒋ ᑭᓯᑲᐣ ᐊᐦᐳ ᐊᐢᑭᕽ ᐊᐦᐳ ᐊᑖᒥᕽ ᐊᐢᑭᕽ ᑭ ᑲᐢᑭᑖᐤ ᑭᑕ ᐹᐢᑫᑭᓇᕽ ᐊᓂᒪ ᒪᓯᓇᐦᐃᑲᐣ ᐊᐦᐳ ᑭᑕ ᑲᓇᐋᐧᐸᐦᑕᕽ;
[4] ᐁᑯᓯ ᒥᐢᑕᐦᐃ ᓂ ᑭ ᒫᑐᐣ ᒋᑫᒫ ᐁᑳ ᐊᐃᐧᔭᐠ ᐁ ᒥᐢᑳᐦᐟ ᐁ ᑌᐸᑫᔨᑖᑯᓯᐟ ᑭᑕ ᐹᐢᑫᑭᓇᕽ ᐊᓂᒪ ᒪᓯᓇᐦᐃᑲᐣ ᐊᐦᐳ ᑭᑕ ᑲᓇᐋᐧᐸᐦᑕᕽ;
[5] ᐯᔭᐠ ᒫᑲ ᐊᓂᑭ ᑳ ᓂᑳᓀᔨᑖᑯᓯᒋᐠ ᓂ ᑭ ᐃᑎᐠ, ᐁᑳᐃᐧᔭ ᒫᑐ ᒋᐢᐟ, ᒥᐢᑕᑫᓯᐤ ᐅ ᐱᐢᑭᑐᑌᐃᐧᓯᐃᐧᓂᕽ ᒍᑕ ᐅᐦᒋ, ᐅᒉᐱᑭᐃᐧᐃᐧᐣ ᑌᐱᐟ ᑭ ᓵᑯᑖᐧᐤ ᑭᑕ ᐹᐢᑫᑭᓇᕽ ᐊᓂᒪ ᒪᓯᓇᐦᐃᑲᐣ ᒥᓇ ᑭᑕ ᐋᐸᐊᕽ ᐊᓂᐦᐃ ᑌᐸᑯᑊ ᐊᑯᐢᑭᐊᐧᓯᑲᓇ.
[6] ᐁᑯᓯ ᒣᑳᐧ ᐊᔨᕽ ᐊᓂᒪ ᑭᐦᒋ ᐊᐱᐃᐧᐣ ᒥᓇ ᐊᓂᑭ ᓀᐤ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᒥᓇ ᒣᑳᐧ ᐊᔨᕽ ᐊᓂᑭ ᑳ ᓂᑳᓀᔨᑖᑯᓯᒋᐠ ᓂ ᐋᐧᐸᒫᐤ ᒫᔭᑎᐦᑯᓯᐢ ᐁ ᓂᐸᐃᐧᐟ, ᑖᐱᐢᑯᐨ ᐁ ᑭ ᓂᐸᐃᐦᐟ, ᑌᐸᑯᑊ ᐁ ᐃᑕᑐᐃᐧᑌᐟ ᒥᓇ ᑌᐸᑯᑊ ᐁ ᐃᑕᑎᓂᔨᑭ ᐅᐢᑭᓯᑲᐧ, ᐁᐊᐧᑯᓂ ᑌᐸᑯᑊ ᑳ ᐃᐦᑕᓯᔨᐟ ᐅᐟ ᐊᐦᒑᐦᑲᐧ ᑭᓭᒪᓂᑐ ᑳ ᐃᓯᑎᓴᐅᐦᒋᐠ ᒥᓯᐁᐧ ᐊᐢᑭᕽ.
[7] ᐁᑯᓯ ᑭ ᐯ ᐃᑐᐦᑌᐤ ᒥᓇ ᑭ ᐅᑎᓇᒣᐧᐤ ᐅ ᑭᐦᒋᓂᐢᑭᔨᕽ ᐅᐦᒋ ᐊᓂᐦᐃ ᑳ ᐊᐱᔨᐟ ᑭᐦᒋ ᐊᐱᐃᐧᓂᕽ.
[8] ᐃᐢᐱ ᒫᑲ ᑳ ᐅᑎᓇᕽ ᒪᓯᓇᐦᐃᑲᐣ, ᐊᓂᑭ ᓀᐤ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᒥᓇ ᐊᓂᑭ ᓂᓯᑕᓇᐤ ᓀᐤ ᐊᔨᐋᐧᐠ ᑳ ᓂᑳᓀᔨᑖᑯᓯᒋᐠ ᑭ ᐸᐦᑭᓯᓇᐧᐠ ᐅᑎᐢᑲᐋᐧᔨᕽ ᐊᓂᐦᐃ ᒫᔭᑎᐦᑯᓯᓴ ᑲᐦᑭᔭᐤ ᐁ ᐊᔮᒋᐠ ᑭᑐᐦᑖᑲᓇ ᒥᓇ ᐅᓵᐃᐧᓱᓂᔭᐃᐧ ᐊᓯᐊᐧᒋᑲᓇ ᐁ ᒧᐢᑭᑲᔨᑭ ᐃᐧᑭᒫᓯᑲᐣ ᐁᐊᐧᑯᓂ ᐅᐟ ᐊᔭᒥᐦᐋᐃᐧᓂᐋᐧᐊᐧ ᐅᑲᓈᑎᓯᐊᐧᐠ.
[9] ᐁᑯᓯ ᑭ ᓂᑲᒧᐊᐧᐠ ᐅᐢᑭ ᓂᑲᒧᐣ ᐁ ᐃᑌᐧᒋᐠ, ᑭ ᑌᐸᑫᔨᑖᑯᓯᐣ ᑭᑕ ᐅᑎᓇᒪᐣ ᐊᓂᒪ ᒪᓯᓇᐦᐃᑲᐣ ᒥᓇ ᑭᑕ ᐋᐸᐊᒪᐣ ᐊᑯᐢᑭᐊᐧᓯᑲᓇ ᐁᑯᑕ ᑳ ᐊᔮᑭ; ᒋᑫᒫ ᑭ ᑭ ᓂᐸᐃᑲᐃᐧᐣ ᐁᑯᓯ ᑭ ᑭ ᑭᐢᐱᓇᑕᒪᐋᐧᐤ ᑭᓭᒪᓂᑐ ᑭ ᒥᐦᑯ ᐅᐦᒋ ᐊᔨᓯᔨᓂᐊᐧ ᑲᐦᑭᔭᐤ ᐁ ᐃᑕᐦᑐᑌᐃᐧᓯᔨᐟ ᒥᓇ ᐁ ᐃᑕᐦᑐ ᐱᑭᐢᑫᐧᐃᐧᓀᔨᐟ ᒥᓇ ᐁ ᐃᑕᐦᑐ ᐊᔨᓯᔨᓂᐃᐧᔨᐟ, ᒥᓇ ᐁ ᐃᑕᐦᑐᐢᑳᓀᓯᔨᐟ,
[10] ᐁᑯᓯ ᑭ ᑭ ᐃᓯᐋᐊᐧᐠ ᑭ ᑭᓭᒪᓂᑐᒥᓇᐤ ᑭᑕ ᐅᐟ ᐅᑌᓇᐃᐧᐃᐧᓂᐟ ᒥᓇ ᑭᑕ ᐅᐟ ᐊᔭᒥᐦᐁᐃᐧᔨᓂᒥᐟ; ᐁᑯᓯ ᐊᐢᑭᕽ ᑎᐯᔨᐦᒋᑫᐊᐧᐠ.
[11] ᓂ ᐋᐧᐸᒫᐊᐧᐠ ᒫᑲ ᒥᓇ ᓂ ᐯᑕᒫᐧᐣ ᐅᐟ ᐃᑌᐧᐃᐧᓂᐋᐧᐤ ᒥᐦᒉᐟ ᐅᑭᓯᑯᐊᐧᐠ ᐋᐧᐢᑳ ᐊᓂᒪ ᑭᐦᒋ ᐊᐱᐃᐧᐣ ᒥᓇ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᒥᓇ ᑳ ᓂᑳᓀᔨᑖᑯᓯᒋᐠ; ᐁ ᐃᐦᑕᓯᒋᐠ ᒫᑲ ᒥᑖᑕᑖᐧᐤ ᑭᐦᒋ ᒥᑖᑕᑐᒥᑕᓇᐋᐧᐤ ᒥᑖᑕᑖᐧᐤ ᑭᐦᒋ ᒥᑖᑕᐦᑐᒥᑕᓇᐤ, ᒥᓇ ᑭᐦᒋ ᒥᑖᑕᑐᒥᑕᓇᐋᐧᐤ ᑭᐦᒋ ᒥᑖᑕᑐᒥᑕᓇᐊᐧ;
[12] ᐁ ᐃᑌᐧᒋᐠ ᐁ ᑭᐦᒋ ᑭᓯᐁᐧᒋᐠ ᑌᐸᑫᔨᑖᑯᓯᐤ ᒫᔭᑎᐦᑯᓯᐢ ᑳ ᑭ ᓂᐸᐃᐦᐟ ᑭᑕ ᒥᔨᐦᐟ ᐊᓂᒪ ᑲᐢᑭᐦᐁᐃᐧᓯᐃᐧᐣ ᒥᓇ ᐁᐧᔪᑎᓯᐃᐧᐣ ᒥᓇ ᐃᔨᓂᓯᐃᐧᐣ ᒥᓇ ᒪᐢᑲᐃᐧᓯᐃᐧᐣ ᒥᓇ ᑭᐦᒑᔨᐃᐧᐃᐧᐣ ᒥᓇ ᑭᐢᑌᔨᑖᑯᓯᐃᐧᐣ ᒥᓇ ᑭᐢᑕᑭᒥᑯᐃᐧᐣ.
[13] ᑲᐦᑭᔭᐤ ᒫᑲ ᐅᓯᐦᒋᑲᐣ ᑳ ᐊᔮᐟ ᑭᐦᒋ ᑭᓯᑯᕽ ᒥᓇ ᐊᐢᑭᕽ ᒥᓇ ᐊᑖᒥᕽ ᐊᐢᑭᕽ ᒥᓇ ᑭᐦᒋᑲᒥᕽ ᒥᓇ ᑲᐦᑭᔭᐤ ᑫᑲᐧᐩ ᐁᑯᑕ ᑳ ᐊᔮᐠ ᓂ ᑭ ᐯᑕᐋᐧᐊᐧᐠ ᐁ ᐃᑌᐧᒋᐠ, ᐊᓇ ᑳ ᐊᐱᐟ ᑭᐦᒋ ᐊᐱᐃᐧᓂᕽ ᒥᓇ ᐊᓇ ᒫᔭᑎᐦᑯᓯᐢ ᑭᐢᑕᑭᒥᑯᐃᐧᐣ ᒥᓇ ᑭᐦᒑᔨᐃᐧᐃᐧᐣ ᒥᓇ ᑭᐢᑌᔨᑖᑯᓯᐃᐧᐣ ᒥᓇ ᑎᐯᔨᐦᒋᑫᐃᐧᐣ ᑭᑕ ᐊᔮᐤ ᑳᑭᑫ ᒥᓇ ᑳᑭᑫ.
[14] ᐁᑯᓯ ᐊᓂᑭ ᓀᐤ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᑭ ᐃᑌᐧᐊᐧᐠ, ᐋᒣᐣ. ᐊᓂᑭ ᒫᑲ ᑳ ᓂᑳᓀᔨᑖᑯᓯᒋᐠ ᑭ ᐸᐦᑭᓯᓇᐧᐠ ᒥᓇ ᑭ ᐊᔭᒥᐦᐋᐃᐧ ᐊᑐᐢᑲᐁᐧᐊᐧᐠ.