[1] ᒣᐧᐢᑕᐢ ᐃᔨᑯᕽ ᒫᑲ ᐅᐦᐃ ᓂ ᑭ ᐯᐦᑌᐣ ᑖᐱᐢᑯᐨ ᐁ ᑭᐦᒋ ᑭᓯᐁᐧᒋᐠ ᐁ ᐅᓵᒣᔭᑎᒋ ᑭᐦᒋ ᑭᓯᑯᕽ ᐁ ᐃᑌᐧᒋᐠ, ᐋᓬᐃᓬᐅᔭ; ᐱᒫᒋᐦᐃᐁᐧᐃᐧᐣ ᒥᓇ ᑭᐢᑌᔨᑖᑯᓯᐃᐧᐣ ᒥᓇ ᒪᐢᑲᐃᐧᓯᐃᐧᐣ ᐊᔮᐤ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒥᓇᐤ;
[2] ᒋᑫᒫ ᑖᐯᐧᐃᐧᓂᐊᐧᓂᔨᐊᐧ ᒥᓇ ᑲᐧᔭᐢᑲᐧᓂᔨᐊᐧ ᐅᔭᓱᐁᐧᐃᐧᓇ; ᐊᔨᐢ ᑭ ᐅᔭᓱᐋᐧᑌᐤ ᐊᓂᐦᐃ ᑭᐦᒋ ᐱᓯᑳᐧᑎᐢᑫᐧᐊᐧ, ᑳ ᑭ ᓂᓯᐊᐧᓈᒋᑖᔨᐟ ᐊᐢᑭ ᐅ ᐱᓯᑳᐧᑎᓯᐃᐧᐣ ᐅᐦᒋ, ᐁᑯᓯ ᑭ ᐋᐯᐅ ᐅ ᒥᐦᑯᔨᐤ ᐅᐟ ᐊᑐᐢᑫᔮᑲᓇ ᐅᒋᐦᒋᔨᕽ.
[3] ᑭᑖᐧᑦ ᒫᑲ ᐃᑌᐧᐊᐧᐠ, ᐋᓬᐃᓬᐅᔭ. ᐊᓂᒪ ᒫᑲ ᐅ ᑲᐢᑳᐸᓱᐃᐧᐣ ᑭ ᐃᐢᐹᑫᐸᔨᔨᐤ ᑳᑭᑫ ᒥᓇ ᑳᑭᑫ.
[4] ᐊᓂᑭ ᒫᑲ ᓂᓯᑕᓇᐤ ᓀᐅ ᐊᔨᐋᐧᐠ ᑳ ᓂᑳᓀᔨᑖᑯᓯᒋᐠ ᒥᓇ ᐊᓂᑭ ᓀᐅ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᑭ ᐸᑕᐱᐸᔨᐅᐊᐧᐠ ᒥᓇ ᑭ ᐊᔭᒥᐦᐋᐃᐧ ᐊᑐᐢᑲᐁᐧᐊᐧᐠ ᑭᓭᒪᓂᑐᐊᐧ ᑳ ᐊᐱᔨᐟ ᑭᐦᒋ ᐊᐱᐃᐧᓂᕽ, ᐁ ᐃᑌᐧᒋᐠ, ᐋᒣᐣ; ᐋᓬᐃᓬᐅᔭ.
[5] ᐃᑌᐧᐃᐧᐣ ᒫᑲ ᑭᐦᒋ ᐊᐱᐃᐧᓂᕽ ᑭ ᐯ ᐅᐦᒋᐸᔨᐤ, ᐁ ᐃᑌᐧᒪᑲᕽ, ᒪᒥᒋᒥᕽ ᑭ ᑭᓭᒪᓂᑐᒥᓇᐤ, ᑲᐦᑭᔭᐤ ᑭᔭᐋᐧᐤ ᐅᐟ ᐊᑐᐢᑫᔮᑲᓇ, ᑭᔭᐋᐧᐤ ᑳ ᑯᓯᑫᐧᔨᒫᔦᐠ, ᑳ ᐊᐱᐢᑌᔨᑖᑯᓯᔦᐠ ᒥᓇ ᑳ ᑭᐦᒉᔨᑖᑯᓯᔦᐠ.
[6] ᓂ ᑭ ᐯᐦᑌᐣ ᒫᑲ ᑖᐱᐢᑯᐨ ᐁ ᐯᐦᑖᑯᓯᒋᐠ ᐁ ᐅᓵᒣᔭᑎᒋᐠ ᒥᓇ ᑖᐱᐢᑯᐨ ᐁ ᐯᑖᑲᐧᑭ ᒥᐦᒉᐟ ᓂᐱᔭ, ᒥᓇ ᑖᐱᐢᑯᐨ ᐁ ᐯᐦᑖᑯᓯᒋᐠ ᒥᐢᑕᐦᐃ ᐁ ᑭᑐᒋᐠ, ᐁ ᐃᑌᐧᒋᐠ, ᐋᓬᐃᓬᐅᔭ, ᒋᑫᒫ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒥᓇᐤ, ᒫᒪᐁᐧᔭᐢ ᓯᔪᑳᑎᓯᐟ ᑎᐯᔨᐦᒋᑫᐤ.
[7] ᒪᒪᐦᑖᑯᓯᑖᐠ ᒥᓇ ᒥᐢᑕᐦᐃ ᒥᔦᐧᔨᑕᑖᐠ, ᒥᓇ ᐃᐧᔭ ᑭᐢᑕᑭᒫᑖᐠ; ᒋᑫᒫ ᐅ ᑭᐦᒋ ᐃᐧᑭᑐᐃᐧᐣ ᐊᓇ ᒫᔭᑎᐦᑯᓯᐢ ᐁᑲᐧ ᐅᑎᐦᒋᐸᔨᔨᐤ, ᒥᓇ ᐃᐧᐊᐧ ᑭ ᐊᐧᐁᐧᔨᔨᐊᐧ.
[8] ᐁᐊᐧᑯ ᒫᑲ ᑭ ᒥᔮᐤ ᑭᑕ ᑭᑭᐢᑲᕽ ᐁ ᒥᔮᐧᓯᓂᔨᐠ ᐋᐧᐱᐢᑫᑭᐣ ᐁ ᐋᐧᓯᑲᐧᐢᑌᐠ ᒥᓇ ᐁ ᐯᑲᕽ; ᒋᑫᒫ ᑳ ᒥᔮᐧᓯᐠ ᐋᐧᐱᐢᑫᑭᐣ ᐁᐊᐧᑫᐧᔨᐤ ᐅ ᑲᐧᔭᐢᑳᐧᑎᓯᐃᐧᓂᐋᐧᐤ ᐅᑲᓈᑎᓯᐊᐧᐠ.
[9] ᐁᑯᓯ ᓂ ᑭ ᐃᑎᐠ, ᒪᓯᓇᐦᐊ, ᓴᐁᐧᔨᑖᑯᓯᐊᐧᐠ ᐊᓂᑭ ᑳ ᐃᐧᑯᒥᐦᒋᐠ ᐅ ᐃᐧᑭᑐᐃᐧ ᑎᐱᐢᑭᓀᑫᐧᐃᐧᓂᕽ ᐊᓇ ᒫᔭᑎᐦᑯᓯᐢ. ᓂ ᑭ ᐃᑎᐠ ᒫᑲ, ᐁᐊᐧᑯᓂ ᐅᐦᐃ ᑖᐯᐧ ᐅᐟ ᐃᑌᐧᐃᐧᓇ ᑭᓭᒪᓂᑐ.
[10] ᓂ ᑭ ᐸᑕᐱᐸᔨᐅᐋᐧᐣ ᒫᑲ ᐅᓯᑎᕽ ᑭᑕ ᐊᔭᒥᐦᐋᐃᐧ ᐊᑐᐢᑲᐊᐧᐠ. ᐁᑯᓯ ᓂ ᑭ ᐃᑎᐠ, ᐁᑳᐃᐧᔭ ᐁᑯᓯ ᐃᑐᑕ; ᓂᔭ ᐅᒪ ᑭᒋ ᐊᑐᐢᑫᔮᑲᐣ ᒥᓇ ᑭᒋᐋᐧᒪᐠ ᑳ ᐊᔮᒋᐠ ᐅᐟ ᐋᒋᒧᐃᐧᐣ ᒋᓴᐢ; ᑭᓭᒪᓂᑐ ᐊᔭᒥᐦᐋᐃᐧ ᐊᑐᐢᑲᐤ; ᒋᑫᒫ ᐅᐟ ᐋᒋᒧᐃᐧᐣ ᒋᓴᐢ ᐁᐊᐧᑯ ᑭᐢᑭᐁᐧᐦᐃᑫᐃᐧ ᐊᐦᒑᕽ.
[11] ᓂ ᑭ ᐋᐧᐸᑌᐣ ᒫᑲ ᑭᐦᒋ ᑭᓯᐠ ᐁ ᔪᑌᓂᑳᑌᐠ; ᐁᑯᓯ ᐳᑎ ᐁ ᐋᐧᐱᐢᑭᓯᐟ ᒥᐢᑕᑎᑦ, ᐊᓇ ᒫᑲ ᑳ ᑌᑕᐱᐟ ᐅᑕᔮᑳᐧᒥᓯᐤ ᒥᓇ ᐅᑖᐯᐧᐤ ᑳ ᐃᑎᐦᐟ; ᑲᐧᔭᐢᑳᐧᑎᓯᐃᐧᓂᕽ ᒫᑲ ᐅᔭᓱᐁᐧᐤ ᒥᓇ ᓇᑐᐸᔨᐤ.
[12] ᐅᐢᑭᓯᑲᐧ ᑖᐱᐢᑯᐨ ᐁ ᑳᐧᑯᑌᐟ ᐃᐢᑯᑌᐤ, ᒥᓇ ᐅᐢᑎᑳᐧᓂᕽ ᒥᐦᒉᐟ ᑭᐦᒋ ᐅᑭᒫᐊᐧᐢᑐᑎᓇ; ᐁᑯᓯ ᐊᔮᐤ ᐃᐧᔪᐃᐧᐣ ᐁ ᒪᓯᓇᐃᑳᑌᔨᐠ, ᐁᑳ ᐊᐃᐧᔭ ᐁ ᑭᐢᑫᔨᑕᒥᔨᐟ ᐱᑯ ᐃᐧᔭ.
[13] ᑭᑭᐢᑲᑦ ᒫᑲ ᒥᐢᑯᑖᑲᐩ ᐁ ᑭ ᑭᐦᑖᓇᒥᕽ ᒥᐦᑯᕽ; ᐁᑯᓯ ᐅ ᐃᐧᔪᐃᐧᐣ ᐃᓯᔨᐦᑳᑖᐤ ᐅᐟ ᐃᑌᐧᐃᐧᐣ ᑭᓭᒪᓂᑐ.
[14] ᐊᓂᑭ ᒫᑲ ᐅᓄᑎᓂᑫᐊᐧᐠ ᑭᐦᒋ ᑭᓯᑯᕽ ᑳ ᐊᔮᒋᐠ ᑭ ᐱᒥᑎᓴᐦᐅᐠ ᐁ ᑌᑕᐱᔨᐟ ᐁ ᐋᐧᐱᐢᑭᓯᔨᐟ ᒥᐢᑕᑎᒪᐧ. ᐁ ᐅ ᑭᑭᐢᑳᒋᑲᓂᒋᐠ ᑳ ᒥᔮᐧᓯᐠ ᐋᐧᐱᐢᑫᑭᐣ, ᐁ ᐋᐧᐱᐢᑳᐠ ᒥᓇ ᐁ ᐯᑲᕽ.
[15] ᐅᑐᓂᕽ ᒫᑲ ᑭ ᐅᐦᒋᐸᔨᔨᐤ ᐁ ᑳᓯᓯᓂᔨᐠ ᐃᓴᐁᐧᐢᐠ, ᐁᐊᐧᑫᐧᔨᐤ ᑭᑕ ᐅᐦᒋ ᐸᑲᒪᐋᐧᐟ ᑳ ᓇᓈᑐᑯᐢᑳᓀᓯᔨᐟ; ᑭᑕ ᐅᔭᓱᐋᐧᑌᐤ ᒫᑲ ᐱᐋᐧᐱᐢᑯ ᑎᐯᔨᒋᑳᑲᐣ ᐅᐦᒋ; ᒥᓇ ᒫᒫᑯᐢᑲᒣᐧᐤ ᐁ ᓱᒥᓈᐳᐃᐧ ᒫᑯᐃᑲᓂᐃᐧᔨᐠ ᐅ ᑭᓯᐋᐧᓱᐃᐧᓂᔨᐤ ᒫᒪᐁᐧᔭᐢ ᓯᔪᑳᑎᓯᔨᐟ ᑭᓭᒪᓂᑐᐊᐧ.
[16] ᐊᔮᐤ ᒫᑲ ᐅᐸᐧᒥᕽ ᒥᓇ ᐅᐢᑯᑖᑳᕽ ᐃᐧᔪᐃᐧᐣ ᐁ ᒪᓯᓇᐃᑳᑌᔨᐠ, ᐅ ᑭᐦᒋ ᐅᑭᒫᒥᐋᐧᐊᐧ ᑭᐦᒋ ᐅᑭᒫᐊᐧᐠ ᒥᓇ ᑳ ᑎᐯᔨᒫᐟ ᐅᑎᐯᔨᒋᑫᐊᐧ.
[17] ᓂ ᑭ ᐋᐧᐸᒫᐤ ᒫᑲ ᐅᑭᓯᑯ ᐁ ᓂᐸᐃᐧᐟ ᐱᓯᒧᕽ; ᐁᑯᓯ ᑭ ᑌᐯᐧᐤ ᐁ ᑭᓯᐁᐧᐟ, ᐁ ᐃᑖᐟ ᑲᐦᑭᔭᐤ ᐱᔦᓯᐊᐧ ᑳ ᐸᐸᒥᔮᔨᐟ ᓇᔦᐊᐧᒋ ᑭᓯᑯᕽ, ᐯ ᓇᑕᐃᐧ ᒫᐊᐧᒋᐃᑐᐠ ᐅ ᑭᐦᒋ ᑎᐱᐢᑭᓀᑫᐧᐃᐧᓂᕽ ᑭᓭᒪᓂᑐ;
[18] ᑭᑕ ᑭ ᒥᒋᐋᐧᔦᐠ ᐅ ᐃᐧᔮᓯᐋᐧᐤ ᑭᐦᒋ ᐅᑭᒫᐊᐧᐠ, ᒥᓇ ᐅ ᐃᐧᔮᓯᐋᐧᐤ ᓯᒫᑲᓂᓯᐃᐧᑭᒫᐊᐧᐠ, ᒥᓇ ᐅ ᐃᐧᔮᓯᐋᐧᐤ ᒥᐢᑕᑎᒪᐧᐠ ᒥᓇ ᐊᓂᑭ ᑳ ᑌᑕᐱᒋᐠ, ᑳ ᑎᐯᔨᒥᓱᒋᐠ ᒥᓇ ᑳ ᑎᐯᔨᒥᐦᒋᐠ ᑳ ᐊᐱᐢᑌᔨᑖᑯᓯᒋᐠ ᒥᓇ ᑳ ᑭᐢᑌᔨᑖᑯᓯᒋᐠ.
[19] ᐁᑯᓯ ᓂ ᑭ ᐋᐧᐸᒫᐤ ᐊᓇ ᐱᓯᐢᑭᐤ ᒥᓇ ᑭᐦᒋ ᐅᑭᒫᐊᐧᐠ ᐊᐢᑭᕽ, ᒥᓇ ᐅᓄᑎᓂᑫᒥᐋᐧᐊᐧ, ᐁ ᒫᐊᐧᒋᐃᑐᒋᐠ ᑭᑕ ᓄᑎᓈᒋᐠ ᐊᓂᐦᐃ ᑳ ᑌᑕᐱᔨᐟ ᒥᐢᑕᑎᒪᐧ ᒥᓇ ᐅᓄᑎᓂᑫᒥᔨᐋᐧ.
[20] ᐊᓇ ᒫᑲ ᐱᓯᐢᑭᐤ ᑭ ᐅᑎᓈᐤ ᐁᑯᓯ ᐊᓯᒋ ᐊᓇ ᓇᐢᐸᐨ ᐅᑭᐢᑭᐁᐧᐦᐃᑫᐤ ᑳ ᑭ ᐊᑐᐢᑳᑕᒥᔨᐟ ᑳ ᑭ ᒪᒫᑖᐃᐧ ᐃᓯᐦᒋᑫᔨᐟ ᐁ ᐋᐧᐸᐦᑕᕽ, ᐃᑕ ᑳ ᑭ ᐅᐦᒋ ᐊᐧᔦᓯᐋᐟ ᐊᓂᐦᐃ ᑳ ᑭ ᐊᔮᔨᐟ ᐅ ᑭᐢᑭᓇᐋᐧᒋᐃᐁᐧᐃᐧᓂᔨᐤ ᐊᓂᐦᐃ ᐱᓯᐢᑭᐊᐧ, ᒥᓇ ᐊᓂᐦᐃ ᑳ ᑭ ᐊᔭᒥᐦᐋᐃᐧ ᐊᑐᐢᑳᑕᒥᔨᐟ ᐅ ᓇᐢᐱᓯᒋᑲᐣ; ᐁ ᐃᓯ ᓂᓯᒋᐠ ᑭᑭ ᐱᒫᑎᐢ ᑭ ᐸᑲᐢᑕᐁᐧ ᐁᐧᐱᓈᐊᐧᐠ ᐃᐢᑯᑌᐃᐧ ᓵᑲᐦᐃᑲᓂᕽ ᐃᑕ ᑳ ᑳᐧᑯᑌᐠ ᐃᐢᑯᑌᓯᑲᐣ;
[21] ᑯᑕᑲᐠ ᒫᑲ ᑭ ᓂᐸᐃᑲᐧᐠ ᐊᓂᒪ ᐃᓴᐁᐧᐢᐠ ᑳ ᐊᔮᐟ ᐊᓇ ᑳ ᑌᑕᐱᐟ ᒥᐢᑕᑎᒪᐧ, ᐊᓂᒪ ᐅᑎ ᐅᑐᓂᕽ ᑳ ᐅᐦᒋᐸᔨᔨᐠ; ᐁᑯᓯ ᑲᐦᑭᔭᐤ ᐱᔦᓯᐊᐧ ᑭ ᑭᐢᐳᑐᑕᒥᔨᐊᐧ ᐅ ᐃᐧᔮᓯᐋᐧᐤ.