<Revelation ᑭᐢᑫᔨᑖᑯᑫᐃᐧᐣ 6

[1] ᓂ ᑭ ᐋᐧᐸᐦᑌᐣ ᒫᑲ ᐃᐢᐱ ᒫᔭᑎᐦᑯᓯᐢ ᑳ ᐋᐸᐊᕽ ᐯᔭᐠ ᐊᓂᐦᐃ ᑌᐸᑯᑊ ᐊᑯᐢᑭᐊᐧᓯᑲᓇ, ᐁᑯᓯ ᓂ ᐯᑕᐋᐧᐤ ᐯᔭᐠ ᐊᓂᑭ ᑳ ᓀᐃᐧᒋᐠ ᐁ ᐱᒫᑎᓯᒋᐠ ᐅᓯᐦᒋᑲᓇᐠ ᐁ ᐃᑎᑖᑯᓯᐟ ᑖᐱᐢᑯᐨ ᐁ ᑭᑐᒋᐠ, ᐁ ᐃᑌᐧᐟ, ᐯ ᐋᐧᐸᐦᑕ.

[2] ᐁᑯᓯ ᓂ ᐋᐧᐸᑌᐣ ᐳᑎ ᐁ ᐋᐧᐱᐢᑭᓯᐟ ᒥᐢᑕᑎᑦ ᐊᓇ ᒫᑲ ᑳ ᑌᑕᐱᐟ ᑭ ᐅᑕᒑᐱᐤ; ᑭ ᒥᔮᐤ ᒫᑲ ᑭᐦᒋ ᐅᑭᒫᐊᐧᐢᑐᑎᐣ; ᐁᑯᓯ ᑭ ᐯ ᓵᑯᑖᐧᐤ ᒥᓇ ᑭ ᐊᑎ ᓵᑯᑖᐧᐤ.

[3] ᐃᐢᐱ ᒫᑲ ᑳ ᐋᐸᐊᕽ ᑯᑕᐠ ᐊᑯᐢᑭᐊᐧᓯᑲᐣ, ᐁᑲᐧ ᓂᓱ, ᓂ ᑭ ᐯᑕᐋᐧᐤ ᐊᓇ ᑯᑕᐠ ᑳ ᐱᒫᑎᓯᐟ ᐅᓯᐦᒋᑲᐣ ᐁ ᐃᑌᐧᐟ, ᐯ ᐋᐧᐸᐦᑕ.

[4] ᑯᑕᐠ ᒫᑲ ᑭ ᐯ ᓄᑯᓯᐤ, ᐁ ᒥᐦᑯᐁᐧᐟ ᒥᐢᑕᑎᑦ; ᐊᓇ ᒫᑲ ᑳ ᑌᑕᐱᐟ ᐁᐊᐧᑯ ᑭ ᒥᔮᐤ ᑭᑕ ᐅᑎᓇᕽ ᐃᐧᑕᐢᑭᑐᐃᐧᐣ ᐊᐢᑭᕽ ᐅᐦᒋ ᐁᑯᓯ ᑭᑕ ᓂᐸᐃᑐᐃᐧᐦᐟ; ᑭ ᒥᔮᐤ ᒫᑲ ᑭᐦᒋ ᐃᓴᐁᐧᐢᐠ.

[5] ᐃᐢᐱ ᒫᑲ ᑳ ᐋᐸᐊᕽ ᑯᑕᐠ ᐊᑯᐢᑭᐊᐧᓯᑲᐣ, ᐁᑲᐧ ᓂᐢᑐ, ᓂ ᐯᑕᐋᐧᐤ ᒥᓇ ᑯᑕᐠ ᑳ ᐱᒫᑎᓯᐟ ᐅᓯᐦᒋᑲᐣ ᐁ ᐃᑌᐧᐟ, ᐯ ᐋᐧᐸᐦᑕ. ᐁᑯᓯ ᓂ ᐋᐧᐸᒫᐤ ᐳᑎ ᐁ ᑲᐢᑭᑌᓯᐟ ᒥᐢᑕᑎᑦ; ᒫᑲ ᐊᓇ ᑳ ᑌᑕᐱᐟ ᑎᐹᐯᐢᑯᒋᑲᐣ ᑕᐦᑯᓇᑦ ᐅᒋᐦᒋᕽ.

[6] ᐁᑯᓯ ᓂ ᑭ ᐯᑌᐣ ᑖᐱᐢᑯᐨ ᐃᑌᐧᐃᐧᐣ ᒣᑳᐧ ᐊᔨᕽ ᐊᓂᑭ ᓀᐤ ᑳ ᐱᒫᑎᓯᒋᐠ ᐅᓯᐦᒋᑲᓇᐠ ᐁ ᐃᑌᐧᐟ, ᐯᔭᐠ ᑳᐧᐸᐃᑲᐣ ᐸᑫᐧᓯᑲᓂᑳᐣ ᐯᔭᐠ ᓱᓂᔮᐢ ᒥᓇ ᓂᐢᑐ ᑳᐧᐸᐃᑲᐣ ᐃᐢᑫᐧᓯᓯᑳᐣ ᐯᔭᐠ ᓱᓂᔮᐢ; ᐱᒥ ᒫᑲ ᐃᐧᔭ ᒥᓇ ᓱᒥᓈᐳ ᐁᑳᐃᐧᔭ ᓈᐣᑕᐤ ᐃᑐᑕ.

[7] ᐃᐢᐱ ᒫᑲ ᑳ ᐋᐸᐊᕽ ᑯᑕᐠ ᐊᑯᐢᑭᐊᐧᓯᑲᐣ, ᐁᑳᐧ ᓀᐤ, ᓂ ᑭ ᐯᑕᒫᐧᐣ ᐅᐟ ᐃᑌᐧᐃᐧᐣ ᐊᓇ ᒥᓇ ᑯᑕᐠ ᑳ ᐱᒫᑎᓯᐟ ᐅᓯᐦᒋᑲᐣ ᐁ ᐃᑌᐧᐟ, ᐯ ᐋᐧᐸᐦᑕ.

[8] ᐁᑯᓯ ᓂ ᐋᐧᐸᑌᐣ, ᐳᑎ ᒫᑲ ᐁ ᐋᐧᐳᑭᓯᐟ ᒥᐢᑕᑎᑦ; ᐁᑯᓯ ᐊᓇ ᑳ ᑌᑕᐱᐟ ᓂᐳᐃᐧᐣ ᐁ ᐃᓯᔨᐦᑳᓱᐟ; ᐦᐁᑎᐢ ᒫᑲ ᐱᒥᑎᓴᐦᐅᐠ. ᑭ ᒥᔮᐊᐧᐠ ᒫᑲ ᑭᑕ ᑎᐯᔨᑕᐦᑭᐠ ᐯᔭᐠ ᐁ ᑭ ᓀᐅᑖᕽ ᐊᐢᑭ, ᑭᑕ ᓂᐸᑖᑫᒋᐠ ᐁ ᐋᐸᒋᑖᒋᐠ ᐃᓴᐁᐧᐢᐠ ᒥᓇ ᓄᑌᑲᑌᐃᐧᐣ, ᒥᓇ ᐋᔨᒫᐢᐱᓀᐃᐧᐣ, ᒥᓇ ᐱᑲᐧᒋ ᐱᓯᐢᑭᐊᐧᐠ ᐊᐢᑭᕽ ᑳ ᐊᔮᒋᐠ.

[9] ᐃᐢᐱ ᒫᑲ ᑳ ᐋᐸᐊᕽ ᑯᑕᐠ ᐊᑯᐢᑭᐊᐧᓯᑲᐣ, ᐁᑲᐧ ᓂᔮᓇᐣ, ᓂ ᐋᐧᐸᒫᐊᐧᐠ ᓯᐹ ᐸᑭᑎᓈᓱᐃᐧᓈᐱᐢᑯᕽ ᐅᐟ ᐊᐦᒑᐦᑯᐋᐧᐊᐧ ᐊᓂᑭ ᑳ ᑭ ᓂᐸᐃᐦᒋᐠ ᐅᐟ ᐃᑌᐧᐃᐧᐣ ᑭᓭᒪᓂᑐ ᐅᐦᒋ ᒥᓇ ᐊᓂᒪ ᐋᒋᒧᐃᐧᐣ ᑳ ᒥᒋᒥᓇᑭᐠ;

[10] ᑭ ᑌᐯᐧᐊᐧᐠ ᒫᑲ ᐁ ᑭᐦᒋ ᑭᓯᐁᐧᒋᐠ ᐁ ᐃᑌᐧᒋᐠ, ᑖᓂᔨᑯᕽ ᑭᓀᐧᐢ ᑌᐯᔨᐦᒋᑫᔭᐣ ᑳ ᑲᓈᑎᓯᔭᐣ ᒥᓇ ᑳ ᑖᐯᐧᔭᐣ ᐁᑳ ᑳ ᐅᔭᓱᐋᐧᑕᒋᐠ ᒥᓇ ᑳ ᓇᑐᐢᑲᒪᐊᐧᒋᐠ ᓂ ᒥᐦᑯᓈᐣ ᐊᓂᑭ ᐊᐢᑭᕽ ᑯᑕᐢᑭᒋᐠ?

[11] ᐁᑯᓯ ᑲᐦᑭᔭᐤ ᑳ ᐃᐦᑕᓯᒋᐠ ᑭ ᒥᔮᐊᐧᐠ ᐋᐧᐱᐢᑭ ᐊᑯᐅᓇ; ᑭ ᐃᑖᐊᐧᐠ ᒫᑲ ᑭᑕ ᐊᔦᐧᐱᒋᐠ ᑫᔮᐱᐨ ᐊᒋᔭᐤ ᐃᐢᑯ ᐃᐧᒋ ᐊᑐᐢᑫᔮᑲᓂᐋᐧᐊᐧ ᒥᓇ ᐅᒋᐋᐧᒥᐋᐧᐊᐧ ᑫ ᓂᐸᐃᒥᐦᐟ ᑖᐱᐢᑯᐨ ᐃᐧᔭᐋᐧᐤ ᑭᑕ ᑎᐱᐸᔨᔨᐟ.

[12] ᐁᑯᓯ ᓂ ᐋᐧᐸᑌᐣ ᐃᐢᐱ ᐁ ᐋᐸᐊᕽ ᑯᑕᐠ ᐊᑯᐢᑭᐊᐧᓯᑲᐣ, ᐁᑲᐧ ᓂᑯᑖᐧᓯᐠ, ᑭ ᒥᐢᑕᐦᐃ ᑮᑲᐧᐣ; ᐱᓯᑦ ᒫᑲ ᑭ ᐊᑎ ᑲᐢᑭᑌᓯᐤ ᑖᐱᐢᑯᐨ ᐊᓯᓯᐁᐧᑭᐣ ᐅᐱᐊᐧᔭ ᑳ ᐅᐦᒋ ᐅᓯᒋᑳᑌᐠ, ᐁᑯᓯ ᒥᓯᐁᐧ ᑎᐱᐢᑳᐃᐧ ᐱᓯᑦ ᑭ ᐃᓯᓈᑯᓯᐤ ᑖᐱᐢᑯᐨ ᒥᐦᑯ;

[13] ᐊᒐᐦᑯᓴᐠ ᒫᑲ ᑭᓯᑯᕽ ᐅᐦᒋ ᐊᐢᑭᕽ ᑭ ᐃᓯ ᐸᐦᑭᓯᓇᐧᐠ, ᑖᐱᐢᑯᐨ ᒥᓯ ᓱᒥᓈᑎᐠ ᑳ ᐃᓯ ᐸᑭᑎᑖᐟ ᐁᑳ ᐁ ᐊᑎᑌᔨᑭ ᒥᓯ ᓱᒥᓇ, ᐁ ᐁᐧᐁᐧᐹᓯᐟ ᐁ ᑭᐦᒋ ᔪᑎᓂᔨᐠ.

[14] ᐁᑯᓯ ᑭᓯᐠ ᑭ ᓯᐯᐧᑌᒪᑲᐣ ᑖᐱᐢᑯᐨ ᑎᑎᐯᑭᓂᑲᐣ ᐁ ᑎᑎᐯᑭᓂᑳᑌᐠ; ᐁᑯᓯ ᑲᐦᑭᔭᐤ ᐊᐧᒋᔭ ᒥᓇ ᒥᓂᐢᑎᑲᐧ ᑭ ᐋᐦᒋᐸᔨᐋᐧ ᐃᑕ ᐊᓂᒪ ᑳ ᑭ ᐊᔮᑭ.

[15] ᑭᐦᒋ ᐅᑭᒫᐊᐧᐠ ᒫᑲ ᐊᐢᑭᕽ ᑳ ᐊᔮᒋᐠ ᒥᓇ ᐅᑭᒫᐊᐧᐠ ᒥᓇ ᑭᐦᒋ ᓯᒫᑲᓂᓯᐃᐧᑭᒫᐊᐧᐠ ᒥᓇ ᑲᐦᑭᔭᐤ ᑎᐯᔨᒫᑲᐣ ᒥᓇ ᐅᑎᐯᔨᒥᓱ, ᑭ ᑳᓱᐊᐧᐠ ᐋᐧᑎᕽ ᒥᓇ ᑭᐢᑖᐱᐢᑳᕽ ᐊᐧᒋᕽ;

[16] ᐁᑯᓯ ᑭ ᑭᑐᑕᒪᐧᐠ ᐊᐧᒋᔭ ᒥᓇ ᑭᐢᑖᐱᐢᑲᐧ ᐁ ᐃᑌᐧᒋᐠ, ᐹᑕᑯᐢᑲᐃᐧᓈᐣ ᒥᓇ ᑳᓯᓈᐣ ᐁᑳ ᑭᑕ ᐋᐧᐸᒥᑯᔮᕽ ᐊᓇ ᑭᐦᒋ ᐊᐱᐃᐧᓂᕽ ᑳ ᐊᐱᐟ, ᒥᓇ ᐊᓇ ᒫᔭᑎᐦᑯᓯᐢ ᐅ ᑭᓯᐋᐧᓯᐃᐧᓂᕽ;

[17] ᒋᑫᒫ ᐁ ᑭᐦᒋ ᑭᓯᑳᔨᐠ ᐅ ᑭᓯᐋᐧᓯᐃᐧᓂᐋᐧᐤ ᐅᑎᐦᒋᐸᔨᔨᐤ ᐊᐁᐧᓇ ᒫᑲ ᑫ ᑭ ᓂᐸᐃᐧᐟ?