[1] Anuanom, deɛ me koma pere hwehwɛ yɛ me mpaeɛ a mebɔ srɛ Onyankopɔn ma Israelfoɔ sɛ wɔbɛnya nkwagyeɛ.
[2] Mɛtumi madi wɔn ho adanseɛ sɛ wɔyɛ nnipa a wɔde mmɔdemmɔ som Onyankopɔn sɛdeɛ ɛsɛ. Nanso, wɔn som no mfiri nimdeɛ mu.
[3] Wɔammu tenenee a ɛfiri Onyankopɔn no, na mmom wɔpɛɛ sɛ wɔfa wɔn ankasa nimdeɛ so. Yei amma wɔamfa wɔn ho anhyɛ Onyankopɔn pɛ a ɔnam so ma onipa wie pɛyɛ no ase.
[4] Kristo abɛsi mmara no ananmu na obiara a ɔgye no di no dane ɔteneneeni.
[5] Mose kaa sɛ, sɛ onipa di mmara no so a, ɔbɛtumi asɔ Onyankopɔn ani. Deɛ ɔde daa yei adi ne asɛm a ɔtwerɛeɛ sɛ, “Sɛ obi pɛ sɛ ɔnya nkwa a, ɔnyɛ deɛ mmara no ka no nyinaa.”
[6] Nanso wɔn a wɔn gyidie sɔ Onyankopɔn ani no remmisa sɛ, “Hwan na ɔbɛkɔ soro akɔfa Kristo aba?”
[7] Ɛna wɔmmisa sɛ, “Hwan na ɔbɛkɔ awufoɔ asase so akɔnyane no aba nkwa mu”?
[8] Deɛ Atwerɛsɛm no ka ni, “Onyankopɔn asɛm no abɛn wo, ɛda wʼano na ɛwɔ wo koma mu.” Yei ne asɛm a ɛfa gyidie ho a yɛka no.
[9] Sɛ wopae mu ka sɛ, “Yesu ne Awurade”, na wogye di sɛ Onyankopɔn na ɔnyanee no firii awufoɔ mu a, wɔbɛgye wo nkwa.
[10] Na yɛfiri koma mu gye di na wɔabu yɛn bem wɔ Onyankopɔn anim, na yɛde yɛn ano pae mu ka na yɛanya nkwagye.
[11] Na Atwerɛsɛm no ka sɛ, “Obiara a ɔgye no di no anim rengu ase.”
[12] Saa asɛm yi fa obiara ho, ɛfiri sɛ, nsonoeɛ biara nni Yudani ne Amanamanmuni ntam. Onyankopɔn yɛ Awurade korɔ ma nnipa nyinaa na ɔhyira wɔn a wɔfrɛ no nyinaa,
[13] Sɛdeɛ Atwerɛsɛm no ka sɛ, “Obiara a ɔbɔ Awurade din no, wɔbɛgye no nkwa” no.
[14] Sɛ nnipa ntee Awurade ho asɛm da a, ɛbɛyɛ dɛn na wɔagye no adi, abisa no nkwagyeɛ? Na ɛbɛyɛ dɛn na wɔate? Gyesɛ obi ka kyerɛ wɔn.
[15] Na sɛ wɔansoma wɔn nso a, wɔbɛyɛ dɛn na wɔaka Asɛmpa no? Sɛdeɛ wɔatwerɛ sɛ, “Sɛ obi bɛhunu deɛ ɔde Asɛmpa no reba no nan ase mpo yɛ anigyesɛm.”
[16] Nanso ɛnyɛ wɔn nyinaa na wɔagye Asɛmpa no adi, sɛdeɛ Yesaia kaa sɛ, “Awurade, hwan na wagye yɛn asɛnka adi?”
[17] Ɛnneɛ na gyidie no firi asɛnka no tie mu, na asɛnka no nso nam Kristo ho dawurubɔ no so na ɛba.
[18] Nanso, mebisa sɛ, ɛyɛ nokorɛ sɛ Israelfoɔ no ante asɛnka no? Nokorɛm, wɔtee, sɛdeɛ Atwerɛwsɛm no ka sɛ, “Wɔn nne duruu wiase mmaa nyinaa, na afei wɔn nsɛm duruu asase ano.”
[19] Mebisa bio sɛ, na Israelfoɔ nnim anaa? Mose de asɛm a Awurade aka maa mmuaeɛ sɛ, “Mɛma moatwe wɔn a wɔnyɛ ɔman mpo no ho ninkunu. Mɛma mo bo afu ɔman a wɔnni nteaseɛ.”
[20] Na Yesaia de akokoduro ka sɛ, “Wɔn a na wɔnhwehwɛ me no hunuu me. Medaa me ho adi wɔ wɔn a na wɔmmisaa mʼase no anim.”
[21] Na deɛ ɔka faa Israelfoɔ ho ne sɛ, “Daa nyinaa metene me nsa ma nnipa asoɔdenfoɔ a wɔsɔre tia me.”