[1] በዚያም ወራት መጥምቁ ዮሐንስ በይሁዳ ምድረ በዳ እየሰበከ መጣ።
[2] እንዲህ ሲል ፥ “መንግሥተ ሰማያት ቀርባለችና ንስሓ ግቡ።
[3] የእግዚአብሔርን መንገድ አዘጋጁ፤ ጥርጊያውንም አስተካክሉ እያለ በምድረ በዳ የሚያስተምር የዐዋጅ ነጋሪ ቃል ” ተብሎ በነቢዩ በኢሳይያስ የተነገረለት ይህ ነውና።
[4] የዮሐንስም ልብሱ የግመል ጠጕuር ነበር፤ በወገቡም የጠፍር መታጠቂያ ነበር፤ ምግቡም አንበጣና የጣዝማ ማር ነበር።
[5] ያን ጊዜ በይሁዳና በኢየሩሳሌም፥ በዮርዳኖስም አውራጃዎች ያሉ ሰዎች ሁሉ ወደ እርሱ ይሄዱ ነበር።
[6] ኀጢአታቸውንም እየተናዘዙ ሁሉም በዮርዳኖስ ወንዝ ከእርሱ ይጠመቁ ነበር።
[7] ነገር ግን፥ ከፈሪሳውያንና ከሰዱቃውያን ወገን ወደ ጥምቀቱ ሲመጡ ብዙ ሰዎችን ባየ ጊዜ እንዲህ አላቸው ፥ “እናንተ የእፉኝት ልጆች፥ ከሚመጣው ቐጣ ትሸሹ ዘንድ ማን አመለከታችሁ?
[8] እንግዲህስ ለንስሓ የሚያበቃችሁን በጎ ሥራ ሥሩ።
[9] አብርሃም አባት አለን በማለት የምታመልጡ አይምሰላችሁ፤ እግዚአብሔር ከእነዚህ ድንጋዮች ለአብርሃም ልጆች ማስነሣት እንዲቻለው እነግራችኋለሁ።
[10] እነሆ፥ ምሳር በዛፎች ግንድ ላይ ሊወድቅ ተቃጥቶአልና፥ መልካም ፍሬ የማያፈራ ዛፍ ሁሉ ይቈረጣል፤ ወደ እሳትም ይጣላል።
[11] “እኔ ለንስሓ በውኃ አጠምቃችኋለሁ፤ ጫማውን ለመሸከም የማይገባኝ ከእኔ በኋላ የሚመጣው እርሱ ግን ከእኔ ይልቅ ይበረታል፤ እርሱ በመንፈስ ቅዱስ፥ በእሳትም ያጠምቃችኋል።
[12] ዐውድማውን የሚያጠራበት መንሽ በእጁ ነው፤ ስንዴውንም በጎተራ ይሰበስባል፤ ገለባውን ግን በማይጠፋ እሳት ያቃጥላል።”
[13] ያን ጊዜ ጌታችን ኢየሱስ በዮሐንስ ሊጠመቅ ከገሊላ ወደ ዮርዳኖስ መጣ።
[14] ዮሐንስ ግን “እኔ በአንተ ልጠመቅ እሻለሁ፤ አንተ ወደ እኔ ትመጣለህን?” ብሎ አይሆንም አለው።
[15] ጌታችን ኢየሱስም መልሶ ፥ “አሁንስ ተው፤ እንዲህ ጽድቅን ሁሉ ልንፈጽም ይገባናልና ” አለው፤ ከዚህም በኋላ ተወው።
[16] ጌታችን ኢየሱስም ከተጠመቀ በኋላ፥ ወዲያው ከውኃ ወጣ፤ እነሆ፥ ሰማይም ተከፈተለት፤ የእግዚአብሔርም መንፈስ በርግብ አምሳል ወርዶ በራሱ ላይ ሲቀመጥ አየ።
[17] እነሆም፥ “በእርሱ ደስ የሚለኝ የምወድደው ልጄ ይህ ነው ” የሚል ድምፅ ከሰማይ መጣ።