[1] ጌታችን ኢየሱስ ዳግመኛ መልሶ በምሳሌ ነገራቸው፤ እንዲህም አለ ፥
[2] “መንግሥተ ሰማያት ለልጁ ሰርግ ያደረገ ንጉሥን ትመስላለች።
[3] ለሰርጉም የታደሙትን ይጠሩአቸው ዘንድ አገልጋዮቹን ላከ፤ ሊመጡም አልወደዱም።
[4] ዳግመኛም ሌሎችን አገልጋዮች እንዲህ ብሎ ላከ፤ የታደሙትን እንዲህ በሉአቸው ፥ እነሆ ድግሴን አዘጋጅቻለሁ፤ ኮርማዎቼና የሰቡ ከብቶቼ ታርደዋል፥ ሁሉም ተዘጋጅቶአል። ወደ ሰርጉ ኑ።
[5] እነርሱ ግን ቸል ብለው ሄዱ፤ ወደ እርሻው የሄደ አለ፤ ወደ ንግዱም የሄደ አለ።
[6] የቀሩትም አገልጋዮቹን ይዘው ሰደቡአቸው፤ ገደሉአቸውም፤
[7] ንጉሡም ተቈጣ፤ ጭፍሮቹንም ልኮ እነዚያን ገዳዮች አጠፋ፤ ከተማቸውንም አቃጠለ።
[8] ከዚህም በኋላ አገልጋዮቹን እንዲህ አላቸው፤ ሰርጌስ ተዘጋጅቶአል፤ ነገር ግን ለአደምናቸው አልተገባቸውም።
[9] እንግዲህ ወደ ሜዳዎችና ወደ አደባባይም ሂዱና ያገኛችሁትን ሁሉ ወደ ሰርጉ ጥሩ።
[10] እነዚያ አገልጋዮችም ወደ መንገዶች ወጥተው ያገኙትን ሁሉ ክፉዎችንም፥ በጎዎችንም ሰበሰቡ፤ የሰርጉም ቤት በተጋባዦች ሞላ።
[11] ንጉሡም ተጋባዦቹን ሊያይ በገባ ጊዜ በዚያ የሰርግ ልብስ ያልለበሰ አንድ ሰው አገኘ።
[12] ወዳጄ ሆይ የሰርግ ልብስ ሳትለብስ እንዴት ወደዚህ ገባህ? አለው፤ ያም ሰው ምላሽ አጣ።
[13] ከዚህም በኋላ ንጉሡ አገልጋዮቹን፥ እጁንና እግሩን አስረው በውጭ ወደ አለ ጨለማ ይጥሉት ዘንድ አዘዘ፤ በዚያም ልቅሶና ጥርስ ማፋጨት ይሆናል።
[14] የተጠሩ ብዙዎች፥ የተመረጡ ግን ጥቂቶች ናቸውና።”
[15] ከዚህም በኋላ ፈሪሳውያን ሄዱ፤ በአነጋገሩም ያጠምዱት ዘንድ ተማከሩ።
[16] ደቀ መዛሙርቶቻቸውንም ከሄሮድስ ቤተ ሰቦች ጋር ወደ እርሱ ላኩ፤ እነርሱም እንዲህ አሉት ፥ “መምህር ሆይ፥ አንተ እውነተኛ እንደ ሆንህ፥ የእግዚአብሔርንም መንገድ በእውነት እንደምታስተምር እናውቃለን፤ ማንንም አትፈራም፤ የሰውንም ፊት አይተህ አታደላም።
[17] እንግዲህ የሚገባውን ንገረን፤ ምን ትላለህ? ለቄሣር ግብር መስጠት ይገባልን? ወይስ አይገባም?” አሉት።
[18] ጌታችን ኢየሱስም ክፋታቸውን ዐወቀባቸውና ፥ “እናንት ግብዞች ለምን ትፈትኑኛላችሁ? የግብሩን ገንዘብ አሳዩኝ ” አላቸው።
[19] ገንዘቡንም አመጡለት።
[20] ጌታችን ኢየሱስም ፥ “ይህ መልኩ፥ ጽሕፈቱስ የማን ነው?” አላቸው።
[21] እነርሱም “የቄሣር ነው ” አሉት፤ እርሱም “እንኪያስ የቄሣርን ለቄሣር፤ የእግዚአብሔርንም ለእግዚአብሔር ስጡ ” አላቸው።
[22] ይህንም ሰምተው አደነቁ፤ ትተውትም ሄዱ።
[23] በዚያችም ቀን ትንሣኤ ሙታን የለም የሚሉ ሰዱቃውያን ወደ እርሱ መጡ።
[24] እንዲህም ብለው ጠየቁት ፥ “መምህር ሆይ፥ ሙሴ ልጅ ሳይወልድ የሞተ ሰው ቢኖር ወንድሙ ሚስቱን አግብቶ ለወንድሙ ዘር ይተካለት ብሎአል።
[25] እንግዲህ ሰባት ወንድማማቾች በእኛ ዘንድ ነበሩ፤ ታላቁም ሚስት አገባና ልጅ ሳይወልድ ሞተ፤ ለወንድሙም ሚስቱን ተወ።
[26] እንዲሁ ደግሞ ሁለተኛው፥ ሦስተኛውም፥ እስከ ሰባተኛው ድረስ።
[27] ከሁሉም በኋላ ያቺ ሴት ሞተች።
[28] እንግዲህ ሙታን በሚነሡበት ጊዜ ከሰባቱ ለማንኛው ሚስት ትሆናለች? ሁሉም አግብተዋት ነበርና።”
[29] ጌታችን ኢየሱስም መልሶ እንዲህ አላቸው ፥ “መጻሕፍትንና የእግዚአብሔርን ኀይል ባለ ማወቅ ትስታላችሁ።
[30] ሙታንስ በሚነሡበት ጊዜ በሰማያት እንደ እግዚአብሔር መላእክት ሆነው ይኖራሉ እንጂ አያገቡም፤ አይጋቡምም።
[31] ስለ ሙታን መነሣት ግን ከእግዚአብሔር ዘንድ ለእናንተ እንዲህ ተብሎ የተነገረውን አላነበባችሁምን?
[32] እኔ እግዚአብሔር የአብርሃም አምላክ የይስሐቅም አምላክ የያዕቆብም አምላክ ነኝ እንግዲህ የሕያዋን አምላክ እንጂ የሙታን አምላክ አይደለም።”
[33] ሕዝቡም ሰምተው ትምህርቱን አደነቁ።
[34] ፈሪሳውያንም ሰዱቃውያንን ምላሽ እንዳሳጣቸው በሰሙ ጊዜ በአንድነት ወደ እሱ ተሰበሰቡ።
[35] ከመካከላቸውም አንድ ሕግ ዐዋቂ ሊፈትነው ጠየቀው።
[36] “መምህር ሆይ፥ ከኦሪት ማንኛይቱ ትእዛዝ ትበልጣለች?” አለው።
[37] ጌታችን ኢየሱስም እንዲህ አለው ፥ “አምላክህ እግዚአብሔርን በፍጹም ልብህ፥ በፍጹም ነፍስህ፥ በፍጹም ኀይልህ ውደደው።
[38] ታላቂቱና የመጀመሪያይቱ ትእዛዝ ይህች ናት።
[39] የምትመስላት ሁለተኛይቱም ባልንጀራህን እንደ ራስህ ውደድ የምትለው ናት።
[40] ኦሪትና ነቢያት ሁሉ በእነዚህ በሁለቱ ትእዛዛት ጸንተዋል።”
[41] ፈሪሳውያንም ተሰብስበው ሳሉ ጌታችን ኢየሱስ እንዲህ ብሎ ጠየቃቸው ፥
[42] “ስለ ክርስቶስ ምን ትላላችሁ? የማን ልጅ ነው?” እነርሱም ፥ “የዳዊት ልጅ ነው ” አሉት።
[43] ጌታችን ኢየሱስም እንዲህ አላቸው ፥ “እንግዲያ እርሱ ራሱ ዳዊት በመንፈስ ቅዱስ እንዴት እንዲህ አለ?
[44] ‘ጌታ ጌታዬን ፥ ጠላቶችህን ከእግርህ በታች እስከ አደርጋቸው ድረስ በቀኜ ተቀመጥ አለው።’
[45] እርሱ ራሱ ዳዊት ‘ጌታዬ ’ ያለው፥ እንግዲህ እንዴት ልጁ ይሆነዋል?”
[46] አንድም ቃል እንኳ ሊመልስለት የቻለ የለም፤ ከዚያች ቀንም ጀምሮ ማንም ሊጠይቀው አልደፈረም።