[1] በነጋም ጊዜ የካህናት አለቆችና የሕዝቡ ሽማግሌዎች ሁሉ ጌታችን ኢየሱስን ሊገድሉት ተማከሩ።
[2] አስረውም ወሰዱት፤ ለገዢው ለጰንጤናዊው ጲላጦስም አሳልፈው ሰጡት።
[3] ከዚህም በኋላ አሳልፎ የሰጠው ይሁዳ እንደ ፈረዱበት ባየ ጊዜ “ንጹሕ ደምን አሳልፌ የሰጠሁ እኔ በድያለሁ ” ብሎ ለካህናት አለቆችና ለሕዝቡ ሽማግሌዎች ሠላሳውን ብር መለሰ።
[4] እነርሱ ግን ፥ “እኛ ምን አግዶን አንተ ለራስህ ዕወቅ ” አሉት።
[5] ያንም ብር በቤተ መቅደስ በትኖ ሄደና ታነቀ።
[6] የካህናት አለቆችም ያን ብር አንሥተው “የደም ዋጋ ነውና በመባ ውስጥ ልንጨምረው አይገባንም ” አሉ።
[7] ተማክረውም ለእንግዳ መቃብር የሸክላ ሠሪ መሬት ገዙበት።
[8] ስለዚህም ያ መሬት እስከ ዛሬ ድረስ “የደም መሬት ” ተብሎ ተጠራ።
[9] ያንጊዜ የነቢዩ የኤርምያስ ቃል “የእስራኤል ልጆች የተስማሙበትን የክቡርን ዋጋ ሠላሳውን ብር ወሰዱ፤
[10] እግዚአብሔር እንደ አዘዘኝም ለሸክላ ሠሪ እርሻ ሰጡት ” ያለው ተፈጸመ።
[11] ጌታችን ኢየሱስም በመስፍኑ ፊት ቆመ፤ መስፍኑም ፥ “የአይሁድ ንጉሥ አንተ ነህን?” ብሎ ጠየቀው፤ ጌታችን ኢየሱስም ፥ “አንተ አልህ ” አለው።
[12] የካህናት አለቆችና የሕዝቡም ሽማግሌዎች ሲከስሱት ምንም የሰጠው መልስ የለም።
[13] ከዚህም በኋላ፤ ጲላጦስ ፥ “ይህን ያህል ሲመሰክሩብህ አትሰማምን?” አለው።
[14] መስፍኑ እጅግ እስኪያደንቅ ድረስ አንዲት ቃል ስንኳ አልመለሰለትም።
[15] በዚያም በዓል ለሕዝቡ ከእስረኟች መካከል አንዱን የወደዱትን እንዲፈታላቸው ለመስፍኑ ልማድ ነበረው።
[16] ያንጊዜም በጣም የታወቀ ስሙ በርባን የሚባል አንድ እስረኛ ነበር።
[17] እነርሱም ተሰብስበው ሳሉ ጲላጦስ ሕዝቡን ፥ “ማንን እንድፈታላችሁ ትፈልጋላችሁ? በርባንን? ወይስ ክርስቶስ የሚሉት ኢየሱስን?” አላቸው።
[18] በቅንዐት አሳልፈው እንደ ሰጡት ያውቅ ነበርና።
[19] ጲላጦስም በአደባባይ ተቀምጦ ሳለ፥ “በዚህ ጻድቅ ሰው ላይ እንዳትበድል ዕወቅ፤ ዛሬ በዚች ሌሊት በሕልሜ ስለ እርሱ ብዙ ተሠቃይቻለሁና ” ስትል ሚስቱ ላከችበት።
[20] የካህናት አለቆችና ሽማግሌዎች ግን በርባንን እንዲፈታላቸው፥ ኢየሱስን ግን እንዲገድሉ ሕዝቡን አባብለው እሺ አሰኙአቸው፤
[21] መስፍኑም መልሶ ፥ “ከሁለቱ ማንኛውን ልፈታላችሁ ትወዳላችሁ?” አላቸው፤ እነርሱም ፥ “በርባንን ” አሉ።
[22] ጲላጦስም ፥ “እንግዲህ ክርስቶስ የተባለውን ኢየሱስን ምን ላድርገው?” አላቸው፤ ሁሉም ፥ “ስቀለው!” አሉ።
[23] መስፍኑም ፥ “ምን ክፉ ሥራ ሠራ?” አላቸው፤ እነርሱ ግን “ስቀለው! ስቀለው!” እያሉ ጩኽት አበዙ።
[24] ከዚህም በኋላ ጲላጦስ ሁከት ከሚበዛ በቀር የሚጠቅም ነገር እንደሌለ ባየ ጊዜ፥ ውኃ ወስዶ ፥ “እኔ ከዚህ ጻድቅ ሰው ደም ንጹሕ ነኝ፤ እናንተ ለራሳችሁ ዕወቁ ” ብሎ በሕዝቡ ፊት እጁን ታጠበ።
[25] ሕዝቡም ሁሉ መልሰው ፥ “ደሙ በእኛና በልጆቻችን ላይ ይሁን ” አሉ።
[26] ከዚህም በኋላ በርባንን ፈታላቸው፤ ጌታችን ኢየሱስን ግን ገርፎ ሊሰቅሉት ሰጣቸው።
[27] ከዚህም በኋላ የመስፍኑ ጭፍሮች ጌታችን ኢየሱስን ተቀብለው ወደ ፍርድ ሸንጎ ወሰዱት፤ ጭፍራውንም ሁሉ ወደ እርሱ ሰበሰቡ።
[28] ልብሱንም ገፍፈው ቀይ ልብስ አለበሱት።
[29] የእሾህም አክሊል ጐንጕuነው በራሱ ላይ አቀዳጁት፤ በቀኝ እጁም ዘንግ አሲያዙት፤ በፊቱም ተንበርክከው ፥ “የአይሁድ ንጉሥ ሆይ፥ ሰላም ለአንተ ይሁን ” እያሉ ተዘባበቱበት፤
[30] በላዩም ተፉበት፤ ዘንጉንም ነጥቀው ራሱን መቱት።
[31] ከተዘባበቱበትም በኋላ፥ ቀዩን ልብስ ገፍፈው ልብሱን አለበሱት፤ ሊሰቅሉትም ወሰዱት።
[32] ሲወጡም ስምዖን የሚባል የቀሬና ሰው አገኙ፤ መስቀሉንም ይሸከም ዘንድ አስገደዱት።
[33] ትርጓሜው የራስ ቅል ወደሚሆን ጎልጎታ ወደሚባል ቦታ በደረሱ ጊዜ፥
[34] ከሐሞት ጋራ የተቀላቀለ ወይንን ሊጠጣ አቀረቡለት፤ ቀምሶም ሊጠጣው አልወደደም።
[35] በሰቀሉትም ጊዜ ዕጣ ተጣጥለው ልብሱን ተካፈሉ፤ ይህም “ልብሶቼን ለራሳቸው ተካፈሉ፤ በቀሚሴም ላይ ዕጣ ተጣጣሉ ” ያለው የመጽሐፍ ቃል ይፈጸም ዘንድ ነው።
[36] በዚያም ተቀምጠው ይጠብቁት ነበር።
[37] በራሱ ላይም “ይህ የአይሁድ ንጉሥ ኢየሱስ ነው ” የሚል የክሱን ጽሕፈት ጽፈው አኖሩ።
[38] ያንጊዜም ሁለት ወንበዴዎችን አንዱን በቀኙ አንዱንም በግራው ከእርሱ ጋር ሰቀሉ።
[39] የሚያልፉትም ራሳቸውን እየነቀነቁ ይሰድቡት ነበር።
[40] “ቤተ መቅደስን የምታፈርሰው፥ በሦስተኛውም ቀን የምትሠራው አንተ ሆይ፥ ራስህን አድን፤ የእግዚአብሔር ልጅ ከሆንህስ እስኪ ከመስቀልህ ውረድ ” ይሉት ነበር።
[41] እንዲሁም የካህናት አለቆች ከጻፎችና ከሽማግሌዎች ጋር እንዲህ እያሉ ይዘብቱበት ነበር፤
[42] “ሌላውን ያድናል፤ ራሱን ማዳን ግን አይችልም፤ የእስራኤል ንጉሥ ከሆነ አሁን ከመስቀል ይውረድና እንመንበት።
[43] በእግዚአብሔርም ታምኗል፤ ይወደውም እንደ ሆነ እነሆ፥ አሁን ያድነው፤ እኔ የእግዚአብሔር ልጅ ነኝ ብሏልና።”
[44] ከእርሱ ጋር የተሰቀሉ ወንበዴዎችም እንዲሁ ያሽሙአጥጡት ነበር።
[45] ከስድስት ሰዓት ጀምሮም እስከ ዘጠኝ ሰዓት ዓለም ሁሉ ጨለማ ሆነ።
[46] በዘጠኝ ሰዓትም ጌታችን ኢየሱስ ፥ “ኤሎሄ ኤሎሄ ላማ ሰበቅታኒ?” ብሎ በታላቅ ቃል ጮኸ፤ ይኸውም ፥ “አምላኬ አምላኬ ለምን ተውኸኝ?” ማለት ነው።
[47] በዚያም ቆመው የነበሩት በሰሙ ጊዜ፥ “ይህስ ኤልያስን ይጠራል ” አሉ።
[48] ያንጊዜም ከእነርሱ አንዱ ሮጠና ሰፍነግ ወሰደ፤ ሆምጣጤም ሞላበት፤ በዘንግም አስሮ አጠጣው።
[49] “ተዉ ኤልያስ መጥቶ ያድነው እንደ ሆነ እንይ ” የሚሉም ነበሩ።
[50] ዳግመኛም ጌታችን ኢየሱስ በታላቅ ድምፅ ጮኸ፤ ያንጊዜም ነፍሱ ከሥጋው ተለየች።
[51] እነሆም፥ የቤተ መቅደስ መጋረጃ ከላይ እስከ ታች ከሁለት ተቀደደ፤ ምድርም ተነዋወጠች፤ ዐለቶችም ተሰነጠቁ።
[52] መቃብሮችም ተከፈቱ፤ ተኝተው ከነበሩ ከቅዱሳን በድኖችም ብዙዎች ተነሡ።
[53] ከመቃብራቸውም ወጡ፤ ከትንሣኤውም በኋላ ወደ ቅድስት ከተማ ገብተው ለብዙዎች ታዩአቸው።
[54] የመቶ አለቃውና ከእርሱ ጋር ጌታችን ኢየሱስን ይጠብቁ የነበሩት ግን፤ ንውጽውጽታውንና የሆነውን ሁሉ አይተው እጅግ ፈሩ፤ “በእውነትም ይህ የእግዚአብሔር ልጅ ነው ” አሉ።
[55] የሆነውንም ሁሉ ከሩቁ የሚመለከቱ ብዙ ሴቶች በዚያ ነበሩ፤ እነርሱም ከገሊላ ጀምሮ ጌታችን ኢየሱስን የተከተሉትና ያገለገሉት ነበሩ።
[56] ከእነርሱም ማርያም መግደላዊት፥ የያዕቆብና የዮሳም እናት ማርያም፥ የዘብዴዎስም የልጆቹ እናት ነበሩ።
[57] በመሸም ጊዜ ስሙ ዮሴፍ የሚባል ባለጸጋ ሰው ከአርማትያስ መጣ፤ እርሱም የጌታችን የኢየሱስ ደቀ መዝሙር ነበር።
[58] እርሱም ወደ ጲላጦስ ሄዶ የጌታችን የኢየሱስን ሥጋ ለመነ፤ ጲላጦስም እንዲሰጡት አዘዘ።
[59] ዮሴፍም የጌታችን የኢየሱስን ሥጋ ተቀብሎ በንጹሕ በፍታ ገነዘው።
[60] ለራሱ ከዐለት በአስፈለፈለው በሐዲስ መቃብርም ቀበረው፤ ታላቅ ድንጋይም አንከባሎ የመቃብሩን አፍ ገጥሞ ሄደ።
[61] ከዚያም ማርያም መግደላዊትና ሁለተኛዋ ማርያም በመቃብሩ ፊት ለፊት ተቀምጠው ነበር።
[62] ከዐርብም በኋላ በማግሥቱ የካህናት አለቆችና ፈሪሳውያን ወደ ጲላጦስ ተሰበሰቡ።
[63] እነርሱም እንዲህ አሉት ፥ “ጌታ ሆይ፥ ያ መስሐቲ በሕይወቱ ሳለ፥ ‘በሦስተኛው ቀን እነሣለሁ ’ ያለውን አሰብን። ሉቃ.
[64] እንግዲህ ደቀ መዛሙርቱ ሌሊት መጥተው እንዳይሰርቁት ለሕዝቡም ከሙታን ተለይቶ ተነሣ እንዳይሉ፥ እስከ ሦስት ቀን መቃብሩ እንዲጠበቅ እዘዝ፤ የኋለኛዪቱ በደሉ ከፊተኛዪቱ የምትከፋ ትሆናለችና።”
[65] ጲላጦስም ፥ “ጠባቆች አሏችሁ፤ ሄዳችሁም እንደምታውቁ አስጠብቁ ” አላቸው።
[66] እነርሱም ሄደው ከጠባቆች ጋር ድንጋዩን አትመው መቃብሩን አስጠበቁ።