[1] በዚያም ወራት ጌታችን ኢየሱስ በሰንበት በእርሻ መካከል ሄደ፤ ደቀ መዛሙርቱም ተርበው ነበርና እሸት እየቈረጡ ይበሉ ጀመር።
[2] ፈሪሳውያንም አይተው ፥ “እነሆ፥ ደቀ መዛሙርትህ በሰንበት ሊደረግ የማይገባውን ሲያደርጉ እይ ” አሉት።
[3] እርሱም አላቸው ፥ “እርሱ በተራበ ጊዜ፥ ከእርሱም ጋር የነበሩት በተራቡ ጊዜ ዳዊት ያደረገውን፥
[4] ወደ እግዚአብሔር ቤት እንደ ገባ፥ ከካህናትም ብቻ በቀር እርሱ ሊበላው የማይገባውን፥ ከእርሱም ጋር የነበሩት ሊበሉት የማይገባቸውን የመሥዋዕቱን ኅብስት እንደ በላ አላነበባችሁምን?
[5] በቤተ መቅደስ የሚያገለግሉ ካህናት ሰንበትን እንደሚሽሩአት፥ በደልም እንደማይሆንባቸው በኦሪት ያለውን አላነበባችሁምን?
[6] እኔም ከቤተ መቅደስ የሚበልጥ እዚህ እንዳለ እላችኋለሁ።
[7] ከመሥዋዕት ይልቅ ምሕረትን እመርጣለሁ ያለው ምን እንደ ሆነ ብታውቁስ ኖሮ ያልበደሉትን ባልፈረዳችሁባቸው ነበር።
[8] የሰንበት ጌታዋ የሰው ልጅ ነውና።”
[9] ጌታችን ኢየሱስም ከዚያ ዐልፎ ወደ ምኵuራባቸው ገባ።
[10] እነሆ፥ እጁ የሰለለች ሰው ነበር፤ ይከሱት ዘንድ ፥ “በሰንበት መፈወስ ይገባልን?” ብለው ጠየቁት።
[11] እርሱም አላቸው ፥ “ከእናንተ መካከል አንድ በግ ያለው በሰንበትም ወደ ጕuድጓድ ውስጥ ቢወድቅበት ይዞ የማያወጣው ማነው?
[12] እንግዲያማ ከበግ ይልቅ ሰው እንደ ምን አይበልጥም! እንኪያስ በሰንበት መልካም ማድረግ ይገባል።”
[13] ከዚያም በኋላ ያን ሰው “እጅህን ዘርጋ ” አለው፤ እጁንም ዘረጋት፤ ያንጊዜም ድና እንደ ሁለተኛዋ ሆነች።
[14] ፈሪሳውያንም ወጥተው ሊገድሉት ስለ እርሱ ተማከሩ።
[15] ጌታችን ኢየሱስም ባወቀ ጊዜ ከዚያ ሄደ፤ ብዙ ሰዎችም ተከተሉት፤ ሁሉንም አዳናቸው።
[16] እንዳይገልጡትም አዘዛቸው።
[17] በነቢዩ በኢሳይያስ የተነገረው ይፈጸም ዘንድ፥ እንዲህ ሲል።
[18] “እነሆ፥ የመረጥሁት ልጄ፥ ነፍሴ የወደደችው፥ መንፈሴን በእርሱ ላይ አኖራለሁ፤ እርሱ ለአሕዛብ ፍርድን ይናገራል፤
[19] አይከራከርም፤ አይጮኽም፤ በአደባባይም ቃሉን የሚሰማ የለም።
[20] ያሸናፊነቱን ፍርድ እስኪያመጣ ድረስ የተቀጠቀጠ መቃን አይሰብርም፤ የሚጤስ የጧፍ ኩስታሪንም አያጠፋም።
[21] አሕዛብም በስሙ ተስፋ ያደርጋሉ።”
[22] ከዚህ በኋላ ጋኔን ያደረበትን ዕውርና ደንቆሮ አመጡለት፤ ያም ዕውር፥ ደንቆሮ እስኪናገር፥ እስኪያይም ድረስ ፈወሰው።
[23] ሕዝቡም ሁሉ እየተደነቁ፥ “ይህ የዳዊት ልጅ አይደለምን?” አሉ።
[24] ፈሪሳውያን ግን በሰሙ ጊዜ “በአጋንንት አለቃ በብዔል ዜቡል ነው እንጂ ይህስ አጋንንትን አያወጣም ” አሉ።
[25] ጌታችን ኢየሱስም ዐሳባቸውን ዐውቆ እንዲህ አላቸው ፥ “እርስ በርስዋ የምትለያይ መንግሥት ሁላ ትጠፋለች፤ ከተማም ሁላ፥ ቤትም እርስ በርስዋ የምትለያይ ከሆነች አትጸናም።
[26] ሰይጣንም ሰይጣንን የሚያወጣው ከሆነ እርስ በርሱ ተለያየ፤ እንግዲህ መንግሥቱ እንዴት ትጸናለች?
[27] እኔስ፥ በብዔል ዜቡል አጋንንትን የማወጣ ከሆንሁ ልጆቻችሁ በምን ያወጡአቸዋል? ስለዚህ እነርሱ ፈራጆች ይሆኑባችኋል።
[28] እኔ በእግዚአብሔር መንፈስ አጋንንትን የማወጣ ከሆንሁ ግን፥ እንግዲያስ የእግዚአብሔር መንግሥት አሁን ወደ እናንተ ደርሳለች።
[29] ኀይለኛን አስቀድሞ ካላሰረ በስተቀር ወደ ኀይለኛ ቤት ለመግባት፥ ገንዘቡንም ለመበርበር የሚችል ማንም የለም፤ ከዚህም በኋላ ቤቱን ይበረብራል።
[30] ከእኔ ጋር ያልሆነ ባለጋራዬ ነው፤ ከእኔም ጋር የማይሰበስብ ይበትናል።
[31] ስለዚህ እላችኋለሁ ፥ ለሰው ኀጢአትና ስድብ ሁሉ ይሰረያል፤ መንፈስ ቅዱስን ለሰደበ ግን አይሰረይለትም።
[32] በሰው ልጅ ላይ ቃል የሚናገር ይሰረይለታል፤ በመንፈስ ቅዱስ ላይ የሚናገር ግን በዚህ ዓለምም ቢሆን፥ በሚመጣውም ዓለም ቢሆን አይሰረይለትም።
[33] “ወይም ዛፉን መልካም፥ ፍሬውንም መልካም አድርጉ፤ ወይም ዛፉን ክፉ፥ ፍሬውንም ክፉ አድርጉ፤ ዛፍ በፍሬው ይታወቃልና።
[34] የእባብ ልጆች ሆይ፥ እናንተ ክፉዎች ስትሆኑ መልካም መናገርን እንዴት ትችላላችሁ? ከልብ የተረፈውን አፍ ይናገራልና።
[35] ደግ ሰው ከመልካም ልቡ መዝገብ መልካም ነገርን ያወጣል፤ ክፉ ሰው ግን ከክፉ ልቡ መዝገብ ክፉ ነገርን ያወጣል።
[36] እኔ ግን እላችኋለሁ ፥ ሰዎች ስለሚናገሩት ስለ ከንቱ ነገር ሁሉ በፍርድ ቀን ስለ እርሱ መልስ ይሰጡበታል።
[37] ከአነጋገርህ የተነሣ ትጸድቃለህ፤ ከአነጋገርህም የተነሣ ይፈረድብሃልና።”
[38] ያንጊዜም ከጻፎችና ከፈሪሳውያን ወገን ሰዎች መጥተው ፥ “መምህር ሆይ፥ ከአንተ ምልክት ልናይ እንወዳለን ” አሉት።
[39] ጌታችን ኢየሱስም መልሶ እንዲህ አላቸው ፥ “ዐመፀኛዪቱና፤ አመንዝራዪቱ ትውልድ ምልክትን ትሻለች፤ ምልክት ግን ከነቢዩ ከዮናስ ምልክት በቀር አይሰጣትም።
[40] ዮናስ ሦስት መዓልትና ሦስት ሌሊት በዓሣ አንበሪ ሆድ እንደ ነበረ፥ እንዲሁ የሰው ልጅ ሦስት መዓልትና ሦስት ሌሊት በምድር ልብ ውስጥ ይኖራልና።
[41] የነነዌ ሰዎች በፍርድ ቀን ተነሥተው ይህችን ትውልድ ይፋረዱአታል፤ በዮናስ ስብከት ንስሓ ገብተዋልና፤ እነሆ፥ ከዮናስ የሚበልጥ በዚህ አለ።
[42] ንግሥተ አዜብ በፍርድ ቀን ተነሥታ ከዚች ትውልድ ጋር ትፋረዳለች፤ የሰሎሞንን ጥበብ ትሰማ ዘንድ ከምድር ዳርቻ መጥታለችና፤ እነሆ፥ ከሰሎሞን የሚበልጥ በዚህ አለ።
[43] “ርኩስ መንፈስም ከሰው ከወጣ በኋላ፥ ዕረፍት ሲሻ ውኃ ወደሌለበት ምድረ በዳ ይዞራል፤ አያገኝምም።
[44] ከዚህም በኋላ፥ እንግዲህስ ወደ ወጣሁበት ቤቴ እመለሳለሁ ይላል፤ በመጣም ጊዜ ባዶ ሆኖ፥ ተጠርጎና ተለስኖ ያገኘዋል።
[45] ከዚህም በኋላ ይሄዳል፤ ከእርሱም የሚከፉ ሌሎች ሰባት አጋንንትን ያመጣል፤ ገብተውም በዚያ ይኖራሉ፤ ለዚያም ሰው የኋላ ኑሮው ከፊተኛው የከፋ ይሆናል፤ ለዚችም ክፉ ትውልድ እንዲሁ ይሆንባታል።”
[46] ለሕዝቡም ይህን ሲነግራቸው፥ እነሆ፥ እናቱና ወንድሞቹ ሊያነጋግሩት ፈልገው በውጭ ቆመው ነበር።
[47] ከደቀ መዛሙርቱም አንዱ መጥቶ ፥ “እነሆ፥ እናትህና ወንድሞችህ ከውጭ ቆመዋል፤ ሊያነጋግሩህም ይሻሉ ” አለው።
[48] እርሱ ግን ለነገረው መልሶ ፥ “እናቴ ማን ናት? ወንድሞቼስ እነማን ናቸው?” አለው።
[49] እጁንም ወደ ደቀ መዛሙርቱ ዘርግቶ ፥ “እነሆ፥ እናቴና ወንድሞቼ እነዚህ ናቸው።
[50] በሰማይ ያለውን የአባቴን ፈቃድ የሚያደርግ ሁሉ እርሱ ወንድሜ፥ እኅቴ፥ እናቴም ነውና ” አለ።