[1] ጌታችን ኢየሱስም ይህን ነገር ከፈጸመ በኋላ ከገሊላ ተነሥቶ ወደ ይሁዳ አውራጃ ወደ ዮርዳኖስ ማዶ ደረሰ።
[2] ብዙዎች በሽተኟችም ተከተሉት፤ በዚያም ፈወሳቸው።
[3] ፈሪሳውያንም ሊፈትኑት ወደ እርሱ መጥተው ፥ “በማናቸውም በበደለችው ሁሉ ሚስቱን ሊፈታ ለሰው ይገባልን?” አሉት።
[4] እርሱም መልሶ እንዲህ አላቸው ፥ “አላነበባችሁምን? በመጀመሪያ የፈጠራቸው እርሱ ወንድና ሴት አደረጋቸው።”
[5] እንዲህም አለ ፥ “ስለዚህ ሰው አባቱንና እናቱን ትቶ ሚስቱን ይከተላል፤ ሁለቱም አንድ አካል ይሆናሉ።
[6] እንኪያስ ሁለት አይደሉም፤ አንድ አካል ናቸው እንጂ፤ እግዚአብሔርም አንድ ያደረገውን ሰው አይለይ።”
[7] እነርሱም ፥ “እንኪያ የፍቺዋን ደብዳቤ ሰጥተው እንዲፈቱአት ሙሴ ለምን አዘዘ?” አሉት።
[8] እርሱም አላቸው ፥ “ሙሴስ ስለ ልባችሁ ክፋት ሚስቶቻችሁን እንድትፈቱ ፈቀደላችሁ፤ ቀድሞ ግን እንዲህ አልነበረም።
[9] እኔ ግን እላችኋለሁ፤ ያለ ዝሙት ምክንያት ሚስቱን የሚፈታ ሁሉ አመንዝራ ያደርጋታል፤ የተፈታችውንም ያገባ ያመነዝራል።”
[10] ደቀ መዛሙርቱም ፥ “የባልና የሚስት ሥርዐት እንዲህ ከሆነስ መጋባት መልካም አይደለም ” አሉት።
[11] እርሱም አላቸው ፥ “ይህ ለተሰጠው ነው እንጂ ለሁሉ የሚቻል አይደለም።
[12] ከእናታቸው ማኅፀን እንዲሁ የተወለዱ ጃንደረቦች አሉና፤ ሰዎች የሰለቡአቸውም ጃንደረቦች አሉ፤ ስለ መንግሥተ ሰማያትም ራሳቸውን ጃንደረባ ያደረጉ አሉ፤ መታገሥ የሚችል ግን ይታገሥ።”
[13] ከዚህም በኋላ እጁን በላያቸው ጭኖ ይጸልይ ዘንድ ሕፃናትን አመጡለት፤ ደቀ መዛሙርቱ ግን ተቈጡአቸው።
[14] ጌታችን ኢየሱስም ፥ “ሕፃናትን ተዉአቸው፤ ወደ እኔም ይመጡ ዘንድ አትከልክሉአቸው፤ መንግሥተ ሰማያት እንደ እነዚህ ላሉት ናትና ” አላቸው።
[15] እጁንም በላያቸው ጫነባቸውና ከዚያ ሄደ።
[16] እነሆም አንድ ጐልማሳ መጥቶ ፥ “ቸር መምህር ሆይ የዘለዓለም ሕይወትን እወርስ ዘንድ ከበጎ ሥራ ወገን ምን ላድርግ?” አለው።
[17] እርሱም ፥ “ለምን ቸር ትለኛለህ? ከአንዱ እግዚአብሔር በቀር ማንም ቸር የለም፤ ወደ ሕይወት ልትገባ ብትወድድስ ትእዛዛትን ጠብቅ ” አለው።
[18] እርሱም ፥ “የትኟቹን?” አለው፤ ጌታችን ኢየሱሱም አለው፥ “አትግደል፥ አታመንዝር፥ አትስረቅ፥ በሐሰትም አትመስክር፥
[19] አባትህንና እናትህን አክብር፤ ባልንጀራህንም እንደ ራስህ ውደድ።”
[20] ያም ጐልማሳ ፥ “ይህን ሁሉ ከሕፃንነቴ ጀምሬ ጠብቄአለሁ፤ እንግዲህ የቀረኝ ምንድን ነው?” አለው።
[21] ጌታችን ኢየሱስም እንዲህ አለው ፥ “ፍጹም ልትሆን ብትወድስ፥ ሂድና ያለህን ሁሉ ሸጠህ ለድኾች ስጥ፤ ሰማያዊ ሀብትንም ታገኛለህ፤ መጥተህም ተከተለኝ።”
[22] ጐልማሳውም ይህን ነገር ሰምቶ ሀብቱ ብዙ ነበርና እያዘነ ሄደ።
[23] ጌታችን ኢየሱስም ለደቀ መዛሙርቱ እንዲህ አላቸው ፥ “እውነት እላችኋለሁ፤ ባለጸጋ ወደ መንግሥተ ሰማያት ይገባ ዘንድ ጭንቅ ነው።
[24] ዳግመኛም እላችኋለሁ ፥ ባለጸጋ ወደ እግዚአብሔር መንግሥት ከሚገባ ይልቅ ግመል በመርፌ ቀዳዳ ቢያልፍ ይቀላል።”
[25] ደቀ መዛሙርቱም ይህን በሰሙ ጊዜ ፥ “እንግዲያ ማን ሊድን ይችላል?” እያሉ እጅግ ተደነቁ።
[26] ጌታችን ኢየሱስም አያቸውና ፥ “በሰው ዘንድ ይህ አይቻልም፤ በእግዚአብሔር ዘንድ ግን ሁሉ ይቻላል ” አላቸው።
[27] ከዚህም በኋላ ጴጥሮስ መልሶ ፥ “እኛ ሁሉን ትተን ተከተልንህ፤ እንግዲህ ምን እናገኛለን?” አለው።
[28] ጌታችን ኢየሱስም እንዲህ አላቸው ፥ “እውነት እላችኋለሁ፤ የተከተላችሁኝ እናንተ በዳግም ልደት የሰው ልጅ በክብሩ ዙፋን በተቀመጠ ጊዜ እናንተም በዐሥራ ሁለት ዙፋን ትቀመጣላችሁ፤ በዐሥራ ሁለቱም ነገደ እሥራኤል ትፈርዳላችሁ።
[29] ስለ ስሜም ቤትን፥ ወይም ወንድሞችን፥ ወይም እኅቶችን፥ ወይም አባትን፥ ወይም እናትን፥ ወይም ሚስትን፥ ወይም ልጆችን፥ ወይም ርስትን የተወ ሁሉ መቶ ዕጥፍ ዋጋ ያገኛል፤ የዘለዓለም ሕይወትንም ይወርሳል።
[30] ነገር ግን ብዙዎች ፊተኟች ኋለኟች ይሆናሉ፤ ኋለኟችም ፊተኟች ይሆናሉ።