[1] “እውነት እላችኋለሁ፤ በዚህ ከቆሙት ሰዎች የእግዚአብሔርን መንግሥት በኀይል ስትመጣ እስኪያዩአት ድረስ ሞትን የማይቀምሱት አሉ ” አላቸው።
[2] በስድስተኛውም ቀን ጌታችን ኢየሱስ ጴጥሮስን ያዕቆብንና ዮሐንስን ይዞ ለብቻቸቸው ወደ ረዥም ተራራ አወጣቸው፤ መልኩም በፊታቸው ተለወጠ።
[3] ልብሱም አንጸባረቀ፤ ሸማ አጣቢም በምድር ላይ እንደዚያ ዓይነት አድርጎ ሊያነጻው እስከማይችል እጅግ ነጭ ሆነ።
[4] ሙሴና ኤልያስም ከጌታችን ከኢየሱስ ጋር እየተነጋገሩ ታዩአቸው።
[5] ጴጥሮስም መልሶ ጌታችን ኢየሱስን ፥ “መምህር ሆይ፥ በዚህ መኖር ለእኛ መልካም ነው፤ ሦስት ዳስም እንሥራ፤ አንዱን ለአንተ፥ አንዱንም ለሙሴ፥ አንዱንም ለኤልያስ ” አለው።
[6] ደንግጠው ነበርና የሚናገረውን አያውቅም ነበር።
[7] ደመናም መጥቶ ጋረዳቸው፤ ከደመናውም “የምወደው ልጄ ይህ ነው፤ እርሱን ስሙት ” የሚል ቃል መጣ።
[8] ከዚህም በኋላ ድንገት ዙሪያውን በተመለከቱ ጊዜ፥ ከጌታችን ከኢየሱስ ብቻ በቀር ሌላ ከእነርሱ ጋር ያዩት የለም።
[9] ከተራራውም ሲወርዱ የሰው ልጅ ከሙታን ተለይቶ እስኪነሣ ድረስ ጌታችን ኢየሱስ ያዩትን ለማንም እንዳይናገሩ አዘዛቸው።
[10] ቃሉንም ይዘው ፥ “ከሙታን ተለይቶ መነሣት ምንድን ነው?” ብለው እርስ በርሳቸው ተጠያየቁ።
[11] ደቀ መዛሙርቱም ፥ “ጻፎች፥ ኤልያስ አስቀድሞ ይመጣ ዘንድ አለው ለምን ይላሉ?” ብለው ጠየቁት።
[12] እርሱም መልሶ እንዲህ አላቸው ፥ “ኤልያስማ አስቀድሞ ይመጣል፤ ሁሉንም ያቀናል፤ እንኪያ ብዙ መከራ እንደሚያጸኑበት፥ እንደሚንቁትም ስለ ሰው ልጅ እንዴት ተብሎ ተጻፈ?
[13] ነገር ግን እላችኋለሁ፤ ኤልያስ በእርግጥ መጥቶአል፤ ስለ እርሱ እንደ ተጻፈም የወደዱትን ሁሉ አደረጉበት።”
[14] ወደ ደቀ መዛሙርቱም በመጣ ጊዜ፥ ብዙ ሰዎች ከብበዋቸው፥ ጻፎችም ሲከራከሩአቸው አገኘ።
[15] ሰዎችም ሁሉ ባዩት ጊዜ ደነገጡ፤ ወዲያውም ወደ እርሱ ሮጡና እጅ ነሡት።
[16] ጻፎችንም ፥ “ስለምን ትከራከሩአቸዋላችሁ?” ብሎ ጠየቃቸው።
[17] ከሕዝቡም መካከል አንድ ሰው መልሶ እንዲህ አለ ፥ “መምህር ሆይ፥ ልጄን ወደ አንተ አምጥቼዋለሁ፤ ዲዳ ጋኔን ይዞታልና።
[18] ባገኘበትም ቦታ ይጥለዋል፤ ያፈራግጠዋል፤ አረፋ ያስደፍቀዋል፤ ጥርሱንም ያፋጨዋል፤ ያደርቀዋል፤ ለደቀ መዛሙርትህም ያወጡለት ዘንድ ነገርኋቸው፤ ነገር ግን መፈወስ ተሳናቸው።
[19] እርሱም መልሶ ፥ “እምነት የሌላት ትውልድ፥ እስከ መቼ ድረስ ከእናንተ ጋር እኖራለሁ? እስከ መቼ ድረስስ እታገሣችኋለሁ? ወደዚህ ወደ እኔ አምጡት ” አላቸው።
[20] ወደ እርሱም ወሰዱት፤ ያም ጋኔን ባየው ጊዜ ወዲያውኑ በመሬት ላይ ጣለው፤ አፈራገጠው፤ አረፋም አስደፈቀው።
[21] ጌታችን ኢየሱስም ፥ “የያዘው ከመቼ ጀምሮ ነው?” ብሎ አባቱን ጠየቀው፤ እርሱም ፥ “ከሕፃንነቱ ጀምሮ ነው።
[22] ብዙ ጊዜ ሊገድለው ወደ ገደል ወደ እሳትም ወደ ውኃም ይጥለዋል፤ ነገር ግን ቢቻልህ እዘንልኝ፤ ርዳኝም ” አለው።
[23] ጌታችን ኢየሱስም ፥ “ቢቻልህ ብለሃል፤ ብታምንስ ለሚያምን ሁሉ ይቻላል ” አለው።
[24] የዚያ ብላቴና አባትም ፥ “አቤቱ፥ አምናለሁ፤ ነገር ግን አለማመኔን ርዳው ” ብሎ ጮኸ።
[25] ጌታችን ኢየሱስም ሰው ሲራወጥ አይቶ “አንተ ዲዳ፥ ደንቆሮም ጋኔን ከእርሱ እንድትወጣ፥ ዳግመኛም እንዳትመለስበት እኔ አዝዤሃለሁ ” ብሎ ያን ክፉ ጋኔን ገሠጸው።
[26] ጮኾም እጅግ አፈራገጠውና ወጣ፤ ብዙዎችም ሞተ እስኪሉ ድረስ እንደ በድን ሆነ።
[27] ጌታችን ኢየሱስም በእጁ ይዞ አስነሣው፥ ቆመም።
[28] ወደ ቤትም በገቡ ጊዜ ደቀ መዛሙርቱ ለብቻቸው ሆነው ፥ “ስለምን እኛ እርሱን ማውጣት ተሳነን?” አሉት።
[29] እርሱም ፥ “ይህ ወገን ያለ ጿምና ያለ ጸሎት ሊወጣ አይችልም ” አላቸው።
[30] ከዚያም ወጥተው በገሊላ በኩል አለፉ፤ ማንም ያውቀው ዘንድ አልፈቀደም።
[31] “የሰው ልጅ በሰዎች እጅ ተላልፎ ይሰጥ ዘንድ አለው፤ ይገድሉታልም፤ በሦስተኛውም ቀን ይነሣል ” ብሎ ለደቀ መዛሙርቱ ያስተምራቸው ነበርና።
[32] የነገራቸውንም አላስተዋሉም፤ ሊጠይቁትም ይፈሩ ነበር።
[33] ወደ ቅፍርናሆም ደርሶ ወደ ቤት በገባ ጊዜ ፥ “በመንገድ እርስ በርሳችሁ ምን ትነጋገሩ ነበር?” ብሎ ጠየቃቸው።
[34] በመንገድ እርስ በርሳቸው ፥ “ ከእነርሱ ማን ይበልጣል?” ተባብለው ነበርና ዝም አሉ።
[35] ተቀምጦም ዐሥራ ሁለቱን ጠርቶ ፥ “አለቃ ሊሆን የሚወድ ራሱን ለሁሉ ዝቅ ያድርግ፤ ለሁሉም አገልጋይ ይሁን ” አላቸው።
[36] ሕፃንንም ይዞ በመካከላቸው አቆመው፤ አቅፎም እንዲህ አላቸው ፥
[37] “እንደዚህ ካሉ ሕፃናት አንዱን በስሜ የሚቀበል እኔን ይቀበላል፤ እኔንም የሚቀበል የላከኝንም እንጂ እኔን ብቻ የሚቀበል አይደለም።”
[38] ዮሐንስም መልሶ ፥ “መምህር ሆይ፥ በስምህ አጋንንትን ሲያወጣ ያየነው አንድ ሰው አለ፤ ከእኛም ጋር ስላልተከተለህ ከለከልነው ” አለው።
[39] ጌታችን ኢየሱስ ግን እንዲህ አላቸው ፥ “በስሜ ተአምራትን የሚያደርግ፥ ወዲያውም በእኔ ላይ ክፉ ቃልን ሊናገር የሚችል የለምና አትከልክሉት።
[40] ባላጋራችሁ ካልሆነ ባልንጀራችሁ ነውና።
[41] እናንተ የክርስቶስ ስለ ሆናችሁ፥ በስሜ ቀዝቃዛ ጿ ውኃ የሚያጠጣችሁ ዋጋውን እንደማያጣ እውነት እላችኋለሁ።
[42] “በእኔ ከሚያምኑት ከእነዚህ ከታናናሾች አንዱን የሚያስት አህያ የሚፈጭበት የወፍጮ ድንጋይ በአንገቱ ታስሮ ወደ ባሕር ቢሰጥም ይሻለዋል።
[43] እጅህም ብታስትህ ቊረጣት፤ ጕuንድሽ ሆነህ ወደ ሕይወት ብትገባ ይሻልሃልና።
[44] ሁለት እጅ ኖሮህ እሳቱ ወደማይጠፋበት፥ ትሉም ወደማያንቀላፋበት ወደ ገሃነም እሳት ከምትገባ፥
[45] እግርህም ብታስትህ ቐረጣት፤ አንካሳ ሆነህ ወደ ሕይወት ብትገባ ይሻልሃልና።
[46] ሁለት እግር ኖሮህ እሳቱ ወደማይጠፋበት፥ ትሉም ወደማያንቀላፋበት ወደ ገሃነም እሳት ከምትገባ።
[47] ዐይንህም ብታስትህ አውጣት፤ አንድ ዐይና ሆነህ ወደ እግዚአብሔር መንግሥት ብትገባ ይሻልሃልና።
[48] ሁለት ዐይን ኖሮህ እሳቱ ወደማይጠፋበት፥ ትሉም ወደማያንቀላፋበት ወደ ገሃነም እሳት ከምትገባ።
[49] “ሁሉም በእሳት ይጣፍጣልና መሥዋዕት ሁሉ በጨው ይጣፍጣል።
[50] ጨው መልካም ነው፤ ጨው ግን አልጫ ቢሆን በምን ታጣፍጡታላችሁ? በውስጣችሁ ጨው ይኑራችሁ፤ እርስ በርሳችሁም ተስማሙ።”