[1] ፈሪሳውያንና ከጻፎች ወገን ከኢየሩሳሌም የመጡ ወደ እርሱ ተሰበሰቡ።
[2] ከደቀ መዛሙርቱም አንዳንዶችን እጃቸውን ሳይታጠቡ እንጀራ ሲበሉ አዩአቸው።
[3] ፈሪሳውያንና አይሁድም ሁሉ የሽማግሎችን ወግ ስለሚጠብቁ እጃቸውን ደኅና አድርገው ካልታጠቡ እህል አይበሉም ነበር።
[4] ከገበያ የገዙትንም በውኃ ካላጠቡ አይበሉም ነበር፤ ሌላም የሚጠብቁት ብዙ ሥርዐት ነበር፤ ጿውንና ማድጋውን፥ የናስ ዕቃውንና አልጋውንም ያጥቡ ነበር።
[5] ጻፎችና ፈሪሳውያንም ፥ “ደቀ መዛሙርትህ ለምን እንደ ሽማግሎች ወግ አይሄዱም? እጃቸውንስ ሳይታጠቡ ለምን እህል ይበላሉ?” ብለው ጠየቁት።
[6] ጌታችን ኢየሱስም መልሶ እንዲህ አላቸው ፥ “እናንተ ግብዞች፥ ኢሳይያስ በእናንተ ላይ መልካም ተናግሮአል፤ እንደ ተጻፈ ‘እነዚህ ሕዝቦች በከንፈራቸው ያከብሩኛል፤ በልባቸው ግን ከእኔ በጣም ይርቃሉ።
[7] የሰው ሥርዐት የሆነ ትምህርትን እያስተማሩ በከንቱ ያመልኩኛል።’
[8] የእግዚአብሔርን ትእዛዝ ትታችሁ የሰውን ወግ ታጠብቃላችሁ፥ ጿን ማድጋንም ማጠብን፥ ሌላውንም ይህን የመሰለውን ሁሉ ታደርጋላችሁ።”
[9] ደግሞ እንዲህ አላቸው ፥ “የራሳችሁን ወግ ትጠብቁ ዘንድ የእግዚአብሔርን ትእዛዝ ልታፈርሱ ይገባልን?
[10] ሙሴም አባትህንና እናትህን አክብር፤ በአባቱና በእናቱ ላይ ክፉ ቃልን የተናገረ ሞትን ይሙት ብሎአችሁ ነበር።
[11] እናንተ ግን ትላላችሁ ፥ ሰው አባቱን ወይም እናቱን ከእኔ የተጠቀምህበት ቐርባን ማለት መባ ነው ቢል፥
[12] ለአባቱ ወይም ለእናቱ ምንም እንዲያደርግ አትፈቅዱለትም።
[13] ስለ ሠራችሁትም ወጋችሁ የእግዚአብሔርን ቃል ትሽራላችሁ፤ ዳግመኛም ይህን የመሰለው የምትሠሩት ብዙ ነው።”
[14] ዳግመኛም ሕዝቡን ጠርቶ እንዲህ አላቸው ፥ “ሁላችሁም ስሙ፤ አስተውሉም።
[15] ከሰው ልብ የሚወጣው እርሱ ሰውን ያረክሰዋል እንጂ ከውጭ ወደ ሰው አፍ የሚገባው ሊያረክሰው የሚችል አይደለም።
[16] የሚሰማ ጆሮ ያለው ይስማ።”
[17] ከሕዝቡም ተለይቶ ወደ ቤት በገባ ጊዜ፥ ደቀ መዛሙርቱ ምሳሌውን ጠየቁት።
[18] እርሱም እንዲህ አላቸው ፥ “እናንተ ደግሞ እንዲህ አታስተውሉምን? ከውጭ ወደ ሰው አፍ የሚገባው ሁሉ ሰውን ሊያረክሰው እንደማይችል አታውቁምን?
[19] ወደ ሆዱ ብቻ እንጂ ወደ ልቡ አይገባምና፤ ምግቡንም ሁሉ እያጣራ ወደ ውጭ ያፈስሳል።”
[20] እንዲህም አላቸው ፥ “ከሰው የሚወጣው ሰውን የሚያረክሰው እርሱ ነው።
[21] ከሰው ልብ ውስጥ ክፉ ዐሳብ ሁሉ ይወጣልና፤ ይኸውም ዝሙት፥ ስርቆት፥ መግደል፥
[22] ማመንዘር፥ መጐምጀት፥ ክፋት፥ ተንኮል፥ መዳራት፥ ስድብ፥ ትዕቢት፥ ምቀኝነት፥ ስንፍና ነው።
[23] ከውስጥ የሚወጣው ይህ ሁሉ ክፉ ነገር ሰውን ያረክሰዋል።”
[24] ጌታችን ኢየሱስም ከዚያ ተነሥቶ ወደ ጢሮስና ወደ ሲዶና ሀገር ሄደ፤ ወደ ቤትም ገባ፤ ማንም ሊያውቀው አልወደደም ነበር፤ ነገር ግን ሊሰወር አልቻለም።
[25] ያንጊዜም ልጅዋን ርኩስ መንፈስ የያዘባት አንዲት ሴት የእርሱን ነገር ሰምታ መጣች፤ ገብታም ከእግሩ በታች ወድቃ ሰገደችለት።
[26] ሴቲቱም አረማዊት ነበረች፤ በትውልዷም ከሶርያና ከፊንቄ ወገን ነበረች፤ ከልጅዋም ጋኔኑን ያወጣላት ዘንድ ለመነችው።
[27] ጌታችን ኢየሱስ ግን ፥ “ተዪ፤ በመጀመሪያ ልጆች ይጥገቡ፤ የልጆችን እንጀራ ነጥቆ ለውሾች መስጠት መልካም አይደለምና ” አላት።
[28] እርስዋም መልሳ ፥ “አዎን፥ ጌታ ሆይ፥ ውሾችም እኮ ከልጆች የወደቀውን ፍርፋሪ ከገበታ በታች ሆነው ይበላሉ ” አለችው።
[29] እርሱም ፥ “ሂጂ፤ ስለዚህ አነጋገርሽም ጋኔኑ ከልጅሽ ወጥቶአል ” አላት።
[30] ወደ ቤቷም ተመለሰች፤ ልጅዋንም ጋኔኑ ለቆአት፥ ልብስዋንም ለብሳ፥ በአልጋዋም ላይ ተቀምጣ አገኘቻት።
[31] ዳግመኛም ከጢሮስ አልፎ በሲዶና በኩል ዐሥር ከተማ በሚባል ሀገር መካከል ወደ ገሊላ ባሕር ሄደ።
[32] ዲዳና ደንቆሮ የሆነ ሰውም አምጥተው እጁን እንዲጭንበት ማለዱት።
[33] ብቻውንም ከሰዎች ፈቀቅ አደረገው፤ ጣቶቹንም ወደ ጆሮዎቹ አገባ፤ ምራቁንም እንትፍ ብሎ ምላሱን ዳሰሰው።
[34] ወደ ሰማይም ተመልክቶ አዘነና፤ “ኤፍታህ ” አለ፤ ይህም “ ተከፈት ” ማለት ነው።
[35] ወዲያውኑም ጆሮዎቹ ተከፈቱ፤ የምላሱም እስራት ተፈታና አስተካክሎ ተናገረ።
[36] ለማንም እንዳይነግሩ ከለከላቸው፤ ነገር ግን እርሱ የሚከለክላቸውን ያህል እነርሱ ደግሞ ይናገሩለት ነበር።
[37] እጅግም ተደነቁና ፥ “ሁሉን ደኅና አድርጎአል፤ ደንቆሮችም እንዲሰሙ፥ ዲዳዎችም እንዲናገሩ ያደርጋል ” አሉ።