[1] የሕያው እግዚአብሔር ልጅ የጌታችን የኢየሱስ ክርስቶስ ወንጌል መጀመሪያ ይህ ነው።
[2] በነቢያት እንደ ተጻፈ “እነሆ፥ መንገድህን በፊትህ የሚጠርግ መልእክተኛዬን በፊትህ እልካለሁ።
[3] የእግዚአብሔርን መንገድ ጥረጉ፤ ጥርጊያውንም አስተካክሉ እያለ በምድረ በዳ የሚጮህ የአዋጅ ነጋሪ ድምፅ፤”
[4] ዮሐንስም በምድረ በዳ ያጠምቅ ነበር፤ ኀጢአትንም ለማስተስረይ የንስሓ ጥምቀትን ይሰብክ ነበር።
[5] የይሁዳና የኢየሩሳሌምም ሰዎች ሁሉ ወደ እርሱ ይሄዱ ነበር፤ ኀጢአታቸውንም እየተናዘዙ በዮርዳኖስ ወንዝ ሁሉንም ያጠምቃቸው ነበር።
[6] የዮሐንስም ልብሱ የግመል ጠጕuር ነበር፤ ወገቡንም በጠፍር መታጠቂያ ይታጠቅ ነበር፤ ምግቡም አንበጣና የበረሃ ማር ነበር።
[7] እንዲህም እያለ ይሰብክ ነበር ፥ “ከእኔ ይልቅ የሚበረታ፥ ተጐንብሼ የጫማዉን ማሰሪያ ልፈታ የማይገባኝ ከእኔ በኋላ ይመጣል፤
[8] እኔ በውኃ አጠምቃችኋለሁ፤ እርሱ ግን በመንፈስ ቅዱስ ያጠምቃችኋል።”
[9] ያንጊዜም ጌታችን ኢየሱስ ከገሊላ ናዝሬት መጣ፤ ዮሐንስም በዮርዳኖስ ወንዝ አጠመቀው።
[10] ወዲያውም ከውኃዉ በወጣ ጊዜ፥ ሰማይ ሲከፈት፥ መንፈስ ቅዱስም እንደ ርግብ ወርዶ በራሱ ላይ ሲቀመጥበት አየ።
[11] ከሰማይም ፥ “የምወድህ ልጄ አንተ ነህ፤ በአንተም ደስ ይለኛል ” የሚል ድምፅ መጣ።
[12] ያንጊዜም መንፈስ ቅዱስ ወደ ምድረ በዳ አወጣው።
[13] አርባ መዓልትና አርባ ሌሊት በምድረ በዳ ተቀመጠ፤ ከሰይጣንም ይፈተን ነበር፤ ከአራዊትም ጋር ነበር፤ መላእክትም ያገለግሉት ነበር።
[14] ዮሐንስንም ከያዙት በኋላ ጌታችን ኢየሱስ ወደ ገሊላ መጥቶ የእግዚአብሔርን የመንግሥት ወንጌል ሰበከ።
[15] እንዲህም አለ ፥ “ጊዜዉ ደረሰ፤ የእግዚአብሔር መንግሥት ቀርባለችና ንስሓ ግቡ፤ በወንጌልም እመኑ።”
[16] በገሊላ ባሕር አጠገብ ሲያልፍም ስምዖንንና ወንድሙ እንድርያስን መረባቸውን ወደ ባሕር ሲጥሉ አገኛቸው፤ ዓሣ አጥማጆች ነበሩና።
[17] ጌታችን ኢየሱስም ፥ “ኑ ተከተሉኝ፤ ሰውንም የምታጠምዱ አደርጋችኋለሁ ” አላቸው።
[18] ያንጊዜም መረባቸውን ትተው ተከተሉት።
[19] ከዚያም ጥቂት እልፍ ብሎ የዘብዴዎስን ልጆች ያዕቆብንና ወንድሙ ዮሐንስን በታንኳ ላይ መረባቸውን ሲያበጁ አገኛቸው፤ እርሱም ከእነርሱ ጋር ነበር።
[20] ያንጊዜም ጠራቸው፤ አባታቸውን ዘብዴዎስንም ከሙያተኟቹ ጋር በታንኳ ውስጥ ትተው ተከትለውት ሄዱ።
[21] ወደ ቅፍርናሆምም ሄዱ፤ ወዲያውም በሰንበት ወደ ምኵuራብ ገብቶ ያስተምራቸው ጀመረ።
[22] ትምህርቱንም አደነቁ፤ እንደ ጻፎቻቸው ያይደለ እንደ በዓለ ሥልጣን ያስተምራቸው ነበርና።
[23] በዚያም ጊዜ በምኵuራባቸው ውስጥ ክፉ ጋኔን ያደረበት ሰው ነበር።
[24] እርሱም ፥ “የናዝሬቱ ኢየሱስ ሆይ፥ ከአንተ ጋር ምን አለን? ልታጠፋን መጥተሃልን? የእግዚአብሔር ቅዱስ ሆይ፥ አንተ ማን እንደ ሆንህ ዐውቄሃለሁ ” ብሎ ጮኸ።
[25] ጌታችን ኢየሱስም ፥ “ዝም በልና ከእርሱ ውጣ ” ብሎ ገሠጸው።
[26] ያ ክፉ ጋኔንም አፈራገጠውና በታላቅ ቃል ጮኾ ከእርሱ ወጣ።
[27] ሁሉም አደነቁ፤ እርስ በርሳቸውም ፥ “ይህ አዲስ ትምህርት ምንድን ነው? ርኩሳን አጋንንትን ውጡ ብሎ ያዝዛቸዋልና፤ እነርሱም ይታዘዙለታልና ” ተባባሉ።
[28] ዝናዉም በገሊላ አውራጃዎች ሁሉ ተሰማ።
[29] ወዲያውም ከምኵuራብ ወጥቶ ከያዕቆብና ከዮሐንስ ጋር ወደ ስምዖንና ወደ እንድርያስ ቤት ገባ።
[30] የስምዖን አማትም በንዳድ ታማ ነበር፤ ስለ እርስዋም ነገሩት።
[31] ወደ እርስዋም ቀርቦ እጅዋን ይዞ አስነሣት፤ ያንጊዜም ንዳድዋ ተዋት፤ ተነሥታም አገለገለቻቸው።
[32] ፀሐይ ገብቶ በመሸ ጊዜም፥ ድውያንንና አጋንንት ያደሩባቸውን ሁሉ ወደ እርሱ አመጡ።
[33] የከተማዪቱ ሰዎችም ሁሉ በደጅ ወደ እርሱ ተሰበሰቡ።
[34] በልዩ ልዩ ደዌ የታመሙትን ብዙዎችን ፈወሳቸው፤ ብዙዎች አጋንንትንም አወጣ፤ እርሱ ክርስቶስ እንደ ሆነ ዐውቀዋልና እንዲናገሩ አልፈቀደላቸውም።
[35] በጥዋትም እጅግ ማልዶ ተነሣ፤ ወጥቶም ወደ ምድረ በዳ ሄደ፤ በዚያም ጸለየ።
[36] ስምዖንና አብረውት የነበሩትም ተከተሉት።
[37] ባገኙትም ጊዜ፥ “ሁሉ ይፈልጉሃል ” አሉት።
[38] እርሱም ፥ “ተነሡ፤ ወደ ሌሎች መንደሮችም እንሂድ፤ በዚያ እሰብክ ዘንድ ስለዚህ መጥቻለሁና ” አላቸው።
[39] በገሊላ ሁሉ በየምኵuራባቸው ተዘዋውሮ አስተማረ፤ አጋንንትንም ያወጣ ነበር።
[40] ለምጻም ሰውም ወደ እርሱ መጣ፤ ተንበርክኮም ፥ “አቤቱ፥ ከወደድህስ ልታነጻኝ ትችላለህ ” ብሎ ለመነው።
[41] ጌታችን ኢየሱስም ራራለት፤ እጁንም ዘርግቶ ዳሰሰውና ፥ “እፈቅዳለሁ ንጻ ” አለው።
[42] ይህንም በተናገረ ጊዜ ለምጹ ፈጥኖ ለቀቀውና ነጻ።
[43] መክሮም አሰናበተው።
[44] “ለማንም እንዳትናገር ዕወቅ፤ ነገር ግን ሂድና ራስህን ለካህን አስመርምር፤ ምስክርም ሊሆንባቸው ሙሴ እንዳዘዘ ስለ መንጻትህ መባህን አቅርብ ” አለው።
[45] እርሱ ግን በወጣ ጊዜ እጅግ ይሰብክ ጀመር፤ ዝናዉም ወጣና ተገለጠ፤ በግልጥም ወደ ከተማ መግባት ተሳነው፤ ነገር ግን በምድረ በዳ በውጭ ነበረ፤ ከየስፍራዉም ሁሉ ወደ እርሱ ይመጡ ነበር።