[1] ወደ ባሕር ማዶም ወደ ጌርጌሴኖን አገር ደረሱ፤
[2] ከታንኳውም በወረደ ጊዜ ርኩስ መንፈስ ያደረበት ሰው ከመቃብር ወጥቶ ተገናኘው።
[3] እርሱም በመቃብር ይኖር ነበር፤ ማንም በእግር ብረት እንኳ ቢሆን ያሥረው ዘንድ አይችልም ነበር።
[4] ዘወትር በእግር ብረትና በሰንሰለት ይታሰር ነበርና፥ ነገር ግን እግር ብረቱን ይሰብርና ሰንሰለቱን ይቀጠቅጥ ነበር፤ ሊያሸንፈውም የሚችል አልነበረም።
[5] ዘወትርም በመቃብርና በተራራ፥ በመዐልትና በሌሊት ይጮህ ነበር፤ ሰውነቱንም በባልጩት ይቈርጥ ነበር።
[6] ጌታችን ኢየሱስንም ከሩቅ ባየው ጊዜ ሮጦ ሰገደለት።
[7] በታላቅ ድምፅም እየጮኸ ፥ “የልዑል እግዚአብሔር ልጅ ኢየሱስ ሆይ፥ ከአንተ ጋር ምን አለኝ? እንዳታሠቃየኝ በእግዚአብሔር አምልሃለሁ ” አለው።
[8] ያን ርኩስ መንፈስ ከእርሱ ውጣ ብሎት ነበርና።
[9] ጌታችን ኢየሱስም ፥ “ስምህ ማነው?” ብሎ ጠየቀው፤ እርሱም ፥ “ስሜ ሌጌዎን ነው፤ እኛ ብዙዎች ነንና ” አለው።
[10] ከሀገርም አስወጥቶ እንዳይሰድደው አብዝቶ ማለደው።
[11] ከዚያም በተራራው አጠገብ ብዙ የዕሪያ መንጋ ተሰማርቶ ነበር።
[12] እነዚያ አጋንንትም ፥ “እናድርባቸው ዘንድ ወደ ዕሪያዎች ስደደን ” ብለው በብዙ ማለዱት።
[13] ጌታችን ኢየሱስም ፈቀደላቸው፤ እነዚያ ርኩሳን መናፍስትም ወጥተው ወደ ዕሪያዎች ገቡ፤ መንጋዎቹም በርግገው ወደ ባሕሩ ተወረወሩ፤ እነርሱም ሁለት ሺህ ያህል ነበሩ፤ በባሕሩ ውስጥም ሰጠሙ።
[14] እረኟችም ሸሽተው በከተሞችና በመንደሮች ተናገሩ፤ እነርሱም የሆነውን ሊያዩ መጡ።
[15] ወደ ጌታችን ኢየሱስም መጡ፤ ጋኔን የያዘውን፥ ሌጌዎንም የነበረበትን ሰው ልቡ ተመልሶለት፥ ልብሱንም ለብሶ ተቀምጦ አዩትና ፈሩ።
[16] ያዩ ሰዎችም ጋኔን ለያዘው ሰው የሆነውንና በዕሪያዎቹም የተደረገውን ነገሩአቸው።
[17] ከሀገራቸውም ይወጣ ዘንድ ይማልዱት ጀመሩ።
[18] ወደ ታንኳው በወጣ ጊዜም ያ ጋኔን የወጣለት ሰው ከእርሱ ጋር ይኖር ዘንድ ማለደው።
[19] ጌታችን ኢየሱስም ከለከለው፤ “ወደ ቤትህ ወደ ወገኖችህ ሂድ፤ እግዚአብሔር ያደረገልህንም ታላቅ ነገር ሁሉ፤ ይቅር እንዳለህም ተናገር ” አለው።
[20] ሄዶም ጌታችን ኢየሱስ ያደረገለትን ሁሉ በዐሥሩ ከተሞች ይሰብክ ጀመር፤ ሁሉም አደነቁ።
[21] ዳግመኛም፥ ጌታችን ኢየሱስ በታንኳው ወደ ማዶ ተሻገረ፤ ብዙ ሰዎችም ወደ እርሱ ተሰበሰቡ፤ በባሕር ዳርም ነበረ።
[22] እነሆ ስሙ ኢያኢሮስ የተባለ የምኵuራብ ሹም የነበረ አንድ ሰው ወደ እርሱ መጣና አገኘው፤ ከእግሩ በታችም ወድቆ ሰገደለት።
[23] “ልጄ ልትሞት ደርሳለች፤ ነገር ግን ና እጅህን ጫንባት፤ ትድናለችም ” እያለ አብዝቶ ማለደው።
[24] ጌታችን ኢየሱስም ከእርሱ ጋር ሄደ፤ ብዙ ሰዎችም ተከተሉት፤ ይጋፉትም ነበር።
[25] ከዐሥራ ሁለት ዓመት ጀምሮ ደም ይፈስሳት የነበረች ሴት ነበረች።
[26] ከብዙዎች ባለ መድኀኒቶችም እጅግ ደከመች፤ ገንዘብዋንም ሁሉ ሰጥታ ጨረሰች፤ ነገር ግን እጅግ ባሰባት እንጂ ምንም የጠቀማት የለም።
[27] የጌታችን ኢየሱስን ነገር በሰማች ጊዜ መጣችና በሰው መኃል ገብታ በስተኋላው የልብሱን ጫፍ ዳሰሰች።
[28] የልብሱን ጫፍ የዳሰስሁ እንደ ሆነ እድናለሁ ብላለችና።
[29] ወዲያውም የደምዋ ምንጭ ደረቀ፤ ከደዌዋም እንደ ዳነች ራስዋ ዐወቀች።
[30] ጌታችን ኢየሱስም ኀይል ከእርሱ እንደ ወጣ ዐውቆ፥ ወደ ሰዎች መለስ ብሎ ፥ “ልብሴን ማን ዳሰሰ?” አላቸው።
[31] ደቀ መዛሙርቱም ፥ “ሕዝቡ ሲጋፋህ ታያለህ፤ አንተ ግን ማን ዳሰሰኝ? ትላለህ ” አሉት።
[32] ይህንም ያደረገውን ያይ ዘንድ ዘወር አለ።
[33] ሴቲቱም የተደረገላትን ስላወቀች ፈራች፤ እጅግም ተንቀጠቀጠች፤ ወደ ጌታችን ኢየሱስም መጥታ ሰገደችለት፤ እውነቱንም ሁሉ ነገረችው
[34] እርሱም ፥ “ልጄ ሆይ፥ ሃይማኖትሽ አዳነችሽ፥ በሰላም ሂጂ፤ ከደዌሽ ተፈወሺ ” አላት።
[35] ከእርስዋ ጋር ሲነጋገርም ሰዎች ከምኵuራቡ ሹም ቤት መጥተው ፥ “ልጅህ ሞታለች፤ እንግዲህ መምህርን አታድክመው ” አሉት።
[36] ጌታችን ኢየሱስም ሲያነጋግሩት በሰማ ጊዜ፥ የምኵuራቡን ሹም ፥ “እመን እንጂ አትፍራ ” አለው።
[37] ከጴጥሮስና ከያዕቆብ፥ ከያዕቆብ ወንድም ከዮሐንስም በቀር የሚከተለው ማንም እንዳይኖር ከለከለ።
[38] ወደ ምኵuራቡ ሹም ቤት በገባ ጊዜም ሲታወኩና፥ ሲያለቅሱ፥ እጅግም ሲጮኹ አገኛቸው።
[39] ገብቶም ፥ “ለምን ትጮኃላችሁ? ለምንስ ታለቅሳላችሁ? ልጅቱስ ተኝታለች እንጂ አልሞተችም ” አላቸው።
[40] በጣምም ሳቁበት፤ እርሱ ግን ሁሉን አስወጥቶ የብላቴናይቱን አባትና እናት፥ ከእርሱ ጋር የነበሩትንም ይዞአቸው ብላቴናይቱ ወደ አለችበት ገባ።
[41] የብላቴናይቱንም እጅ ይዞ ፥ “ጣሊታ ቁሚ ” አላት፤ ትርጓሜውም “አንች ብላቴና ተነሺ ” ማለት ነው።
[42] ያንጊዜም ያቺ ብላቴና ተነሥታ ወዲያና ወዲህ አለች፤ ዕድሜዋም ዐሥራ ሁለት ዓመት ነበር፤ ያንጊዜም ታላቅ መደነቅን ተደነቁ።
[43] ይህንም የሚያውቅ ማንም እንዳይኖር በብዙ መከራቸው፤ የምትበላውንም እንዲሰጡአት አዘዘ።