[1] Panawen sa tolong sa mga belag sa Odiya, kanyo pangwaten kataw in kangay piyatoldo sa mga barkadaan mga bodang Diyos sa Galasya.
[2] Baatte ibeng Linggo kanyo pasowayen kowarta, no nangkalakoy in abaloyan in baatte osai. Ina tiponen matang no ako asina rateng idwa kailangan mangayay.
[3] Kanyo idangen in mga mangyan in batay agbaba in kanyo tolong sa Irosalim. Paka ako rateng, siro kangay piyakan mga solat agsabi no nakay siro.
[4] No kailangan ako batay din ista, na siro kangay piyagpaanggat.
[5] No ako kadalan wa sa Masidonya, na ako batay asin sa kanyo. Ako batay domalan sa Masidonya.
[6] Ako batay dogay kayte agpamataw sa kanyo, karam anggan kalbas wa in pangodan. Kalbas no batay wakay panaw, na ako patolong sa kanyo. Kamay ako ikkay katawan no saano ako batay pataboy.
[7] Ako dayo domalan waget sa kanyo. In kangay beet dogay kayte, no ina in beet in Kapwan.
[8] Kamay ako agpamataw kay atai sa Ipiso anggan sa ibeng Pintikostis.
[9] Angkataw lakonaw kay in batay mapangwat atai sa panawen Diyos, kamayba aronaw in aglaban.
[10] No rateng sa kanyo Timotiyo na pabelagen gayed maal, angkataw siyo kataw daan din ako agpangwat in panawen in Kapwan.
[11] Na siyo ayaw kanyo agpaidapowen kabolowan. Dayem tolongen, matang siyo agkaanggay kaoli atai sa kangay. Angkataw kami in mga belag agpanaya sa kansiyo.
[12] Panawen sa kantam belag Apolos. Siyo kangay nges piyagpilit asin pataboy sa kanyo sarig in mga belag. Kamay siyo ikkay kapataboy. No siyo katokor wa na siyo batay asin pataboy.
[13] Kitam agingat. Agpakarigen in kantam paniwala. Ayaw agkalimo. Agpakaeyat remrem.
[14] Sa boo kantam ogali kitam agpakayawte.
[15] Mga belag, kanyo atawanan in mga kamalay Istipanas. Siro in tokaw pag mga maniwala kay Kiristo sa Akaya. Kalbas siro ageyat agtolong sa mga bodang Diyos. Na in kangay bilin sa kanyo, mga belag,
[16] kamo pasakop sa mga kataw ina, kadayo sa kansiro mga sarig ageyat agpanawen.
[17] Ako agkaanggay sa rateng kora Istipanas, Portonato, osai Akayko. Siro agtolong sa kangay sa kabetek kamo yewed katolong.
[18] Ako kansiro wakay piyakaeyat remrem. Kataw daan din siro agpakaeyat sa kanyo remrem. Pagmaalen in kataw ina pag mga mangyan.
[19] In mga barkadaan mga bodang Diyos sa Asya keyen, Kataw nakay wa kamo? Kadayo taybalang Akwila osai Pirisila keyen, osai in mga belag agsamba sa kansiro balay, angkataw kamo boo mga belag sa agpaniwala sa Kapwan.
[20] In boo belag atai keyen din, Nakay, idapo kamay nakay sa kanyo? Kamo malkaanggayan no kamo maltagbowan, angkataw kamo tayariyan.
[21] Ako Pablo wa in agsolat anda pag keyen, Kataw nakay wa kamo?
[22] Kamayba nakay in yewed agmaal sa Kapwan na pasowayen wa sa Diyos. Laki kanyam Kapwan, aywawa.
[23] Kamo pakaanggayen in Kapwan Isos.
[24] Ako agpakayawte sa kanyo boo panawen kay Kiristo Isos.