[1] Kami kay Kiristo mga sogowan, mga agpalowas in batang piyagbetang pag remrem Diyos. Kataw ina in remremen kamo sa kanyam.
[2] In sogowan kailangan maniwala sa agsogo sa kansiyo.
[3] Idapo kabolowan sa kangay no nakay in kanyo remrem sa kangay. Kalobante nangkataw in remrem in mga koyay sa kangay. Kamayba ako, no ako agremrem sa kangay sadiri, na idapo din kabolowan.
[4] Kamayba ako idapo atawanan daet sa kangay galem, karam ako apo din daet. Wara in Kapwan in agpangkit sa kangay, no ako maal, no ako daet.
[5] Kantam panayaen in Kapwan. Anggan ikkay kabetek kitam ayaw kay agremrem sa panawen in kapwa mangyan. In Kapwan in batay agpalowas in mga agitago sa lened. Siyo batay agpapangkit in mga remrem piyagtago mga mangyan. Ina pag betek in Diyos batay agmaal sa baatte mangyan kalakoy wa daan in piyangwat in mangyan.
[6] Laki mga belag, kami Apolos kangay karai piyangwat alimbawa, matang kamo apo pakinabang, matang kanyo atawanan in piyagsabi keyen ayaw aglampas sa Agisolat. Matang ayaw agpanremrem keyen, Ina pag mangyan kalakoyte, ina wakay lakonaw.
[7] Nakay ina, kamo lakonaw kay sa amat? Ina in kanyo kalakoyen tiyaboy waget Diyos sa kanyo. Na no tiyaboy waget sa kanyo, yewed kanyo wakayte piyangwat, nakay batang kamo mayabang kay kataw ina?
[8] Nakay ina, kamo mana bosog wa? Nakay ina, kamo mayaman wa, kabel wa in boote? Nakay ina, kamo agpansakop wa sa boote? Kami yewed. Dayem nges kamo agpansakop wa ngani, matang kami sarig din agpansakop.
[9] Kataw in mga abel sa gira piyaggoyod sa paoriyan in kapitan, na kami tomag in mga sogowan agbarita kataw ina kalakoyte sa boo, batay wa piyagbono. Kami tomag piyagpapangkit Diyos sa boo mangyan matang kami piyagpatawaan mga angil, mga mangyan.
[10] Tomag sa kanyo pangkit kami idapo bait panawen kami kay Kiristo, kamay kamo katawan wa gayed panawen kay Kiristo. Tomag sa kanyo pangkit kami idapo eyat, kami kalakoyte, kamay kamo maeyat, kamo lakonaw.
[11] Anggan ngona kami agkayawes, agkainem, idapo damit. Kami piyagbogbog, kami idapo pagoliyan.
[12] Kami wakayte in aganap boway. In mga agpamanes sa kanyam, kanyam piyagpandalangin. No kami piyagpangwatan daet, na kami agpakeyen wate.
[13] Kamayba kami piyaglibak, na mabait kami agsagot. Anggan ngona kami piyagidapo kabolowan, kami kataw waget mga lokkaan piyagbenglay waget.
[14] Kaya ina kangay piyagsolat, yewed matang kamo arikoyan. Ako agpatoldo sa kanyo kataw kangayte mga bodang piyagpakayawte.
[15] Kamayba nangkaro ka mangyan in agpatoldo sa kanyo in agpaniwala kay Kiristo, ako waget in kanyo amang sa paniwala. Kamo kangay mga bodang sa paniwala kay Kiristo Isos, angkataw ako in agbaba sa kanyo in Maal pag Barita.
[16] Ako agpatoldo sa kanyo keyen kamo agtolad sa kangay.
[17] Ina in dailan kaya Timotiyo kangay piyagsogo sa kanyo. Siyo kangay piyagmaal pag bodang sa paniwala sa Kapwan, siyo yewed aglimbang, siyo batay agpatoldo wakay sa kanyo in kangay mga ogali sa paniwala kay Kiristo, kataw daan in kangay piyagpatoldo sa boo mga barkadaan mga bodang Diyos kamayba saano.
[18] In amat sa kanyo agpakabwat remrem, kataw siro keyen ako idbatay wa asin pataboy.
[19] Kamay kadogayte wa ako batay wakay asin no in Kapwan beet. Na kangay batay piyagpangkit ina pag mga agpakabwat remrem, idwaget sa kansiro mga agiplaong, no yewed sa kansiro mga piyagpangwat, no ngani siro apo kabaloyan.
[20] Angkataw kaya kitam katawan no in mangyan sakop sa Diyos, piyagngitan sa kansiyo mga ogali, yewed waget sa kansiyo mga piyagsabi.
[21] In ako batay asin nakay agbangen in kanyo beet? Osai ako agbaba pamogbog, osai ako mabait, agpakayawte sa kanyo?