[1] Ako Pablo in agpasolat, osai Tostinis kantam belag. Ako biyerya in Diyos matang ako katiwala Kiristo Isos agbarita.
[2] Kami agsolat sa barkadaan mga bodang Diyos sa Korinto, sa mga iidang Diyos, kansiyo piyabokod, piyaagem kay Kiristo Isos, sarig din in boo mga iidang sa boo kobat, in boo agpandalangin kay IsoKiristo, Kapwan kantam boo.
[3] Kamo kangay piyagpandalangin matang in Diyos kantam Amang, osai IsoKiristo kantam Kapwan agpakaanggay, osai agpakapya wa gayed sa kanyo remrem.
[4] Baatte ako agkaanggay sa Diyos panawen sa kansiyo mga piyagtaboy sa kanyo. Kiristo Isos in agbaba agtaboy.
[5] -
[6] Kaya atawanan totoo in barita panawen kay Kiristo, angkataw ngiitan miyalis wa in kanyo mga ogali. Kataw kamo piyaagem wa sa kansiyo, kamo piyakan kabaloyan kamayba nakay pag kabaloyan, kamayba sa agiplaong, kamayba sa atawanan.
[7] Anggan kamo apo in boo piyagtaboy in Betek pag Abyan, in kitam agpanaya kay anggan IsoKiristo kantam Kapwan batay wakay atai ngiitan.
[8] Kitam kansiyo piyagpakaeyat anggan dogayan matang kitam idapo lebag sa galem sa kabetek agrateng wakay IsoKiristo kantam Kapwan.
[9] In betek pag Diyos in agberya sa kantam matang piyaagem wa sa kansiyo bodang, IsoKiristo kantam Kapwan.
[10] Laki mga belag, ako siyogo rsoKiristo kantam Kapwan agsabi wa gayed sa kanyo keyen, Ayaw agpaylabanan. Maybelagan wa kamo boo. Osai wageten in kanyo remrem, osai in kanyo beet.
[11] Laki mga belag, ako biyaritaan kay Kolowi mga kamalay keyen, Kamo agpalawayan.
[12] In beet kangay siyabi baatte sa kanyo osai wakay in piyagsabi. In osai keyen, Ako kay Pablo. In osai keyen, Ako kay Apolos. In osai keyen, Ako kay Pidro. In osai keyen, Ako kay Kiristo.
[13] Nakay, kanyo lames remrem Kiristo agkadodo? Kanyo lames remrem ako Pablo in piyako sa kodos panawen sa kanyo? In kamo biyaotismowan nakay, sa ngaran lames Pablo?
[14] Ako agkaanggay sa Diyos, kataw ako idapo biyaotismowan sa kanyo, no yewed Kirispo osai Gayo.
[15] Matang kamayba osai waget yewed mayadi agsabi keyen siyo biyaotismowan sa ngaran Pablo.
[16] A, apo kay mana kangay wa biyaotismowan, in balayan Istipanas. No yewed ina, na ako idapo atawanan roma mangyan kangay biyaotismowan.
[17] Ako siyogo Kiristo agpatoldo in Maal pag Barita. Ako yewed siyogo agbaotismo. Ako agpatoldo ngani, kamay yewed kataw in agiplaong mga katawanan, in mga agkasadapan sa kobat. In kangay piyagpatoldo toloy atawanan matang yewed maidapo in kabaloyan in katayan Kiristo sa kodos.
[18] Sa remrem in mga agitaboy sa toyongan, idapo kabolowan in piyagpatoldo keyen, Kiristo matay sa kodos. Dayem sa kantam agbangen, sa mga piyagpamaboway, in Kiristo matay sa kodos, ina in kabaloyan Diyos agpamaboway.
[19] Angkataw keyen in Agisolat, Kangay batay piyagsida in atawanan in mga katawan. Osai kangay batay piyagpaidapo kabolowan in atawanan in mga katawan.
[20] Na idapo wa kabolowan in mga katawan. Idapo wa kabolowan in mga batang agadar. Idapo wa kabolowan in mga agmatiwid atai sa kobat. In piyapangkit Diyos in atawanan atai sa kobat idapo kabolowan.
[21] Sa maal pag remrem Diyos no in mangyan siyo wakayte agadar na siyo idbatay katagbo sa Diyos. Dayem in beet Diyos batay piyagpamaboway in mga agpasandig sa kansiyo panawen sa Maal pag Barita. Ina kanyam piyagpamatoldo, kamayba idapo kabolowan sa remrem in mga agpasandig sa kobat.
[22] In mga Odyo dayo maniwala no idapo ngiitan makasoyo pag panawen. In mga agbangen Girigo na agkaamag sa mga atawanan.
[23] Kamay in kanyam agbangen piyagpatoldo in Kiristo piyako sa kodos. Sa remrem mga Odyo ina daeten wano. Sa remrem mga yewed Odyo ina idapo kabolowan.
[24] Kamay sa mga biyerya Diyos, kamayba Odyo kamayba Girigo, Kiristo in kabaloyan Diyos agpamaboway. Siyo in remrem Diyos.
[25] In remrem Diyos, kamayba idapo kabolowan sa pangkit mangyan, na labi kalakoy sa boo remrem mga mangyan. In kabaloyan Diyos, kamayba idapo kabolowan sa pangkit mangyan, na labi kalakoy sa boo kabaloyan mga mangyan.
[26] Mga belag, remremen in kanyo kalakoyen tangona in kamo biyerya Diyos. Sa pangkit mga mangyan kamo karowan in yewed katawan, karowan in idapo kabaloyan, karowan in kalakoyte waget.
[27] Iidang Diyos in mga idapo atawanan atai sa kobat matang piyarikoy in mga katawan. Osai iidang Diyos in mga idapo kabaloyan atai sa kobat matang piyarikoy in mga apo kabaloyan.
[28] Iidang Diyos in mga kalakoyte, in mga piyagpaidapo kabolowan atai sa kobat matang piyagpaidapo kabolowan in mga piyagpakalakoy atai sa kobat.
[29] Matang kamayba nakay pag mangyan yewed mayadi agpakalakonaw sa pangkit Diyos.
[30] Kitam kansiyo piyaagem kay Kiristo Isos. Kiristo Isos in paywaraan Diyos agtaboy kansiyo remrem sa kantam. Panawen sa kansiyo kitam idapo wa daet, kitam piyabokod, osai piyaboway.
[31] Kataw ina in siyabi sa Agisolat keyen, No apo agpakalakoy, na in Kapwan in pakalakonawen.