[1] Laki mga belag, remremen wakay in kangay piyatoldo sa kanyo, in Maal pag Barita in kanyo piyaniwalaan, in kanyo piyagpasandigan.
[2] In Maal pag Barita in kangay piyatoldo sa kanyo, no kamo marigen in agiskapet asin, no yewed bosliyen in kanyo paniwala, na ina in agpaboway sa kanyo,
[3] Lakonaw in kangay yaadar sa roma. Kalbas kangay wakay piyatoldo sa kanyo keyen Kiristo matay panawen sa kantam mga daet, kataw in siyabi sa Agisolat.
[4] Siyo liyebeng. Siyo piyaboway wakay sa katolo ka ibeng. Ina din in siyabi sa Agisolat.
[5] Kalbas siyo papangkit kay Pidro, osai sa kansiyo Labing Dowai ka katiwala.
[6] Kalbas siyo papangkit din sa labi kay 500 ka belag agpaltiponan. In kalaati matay wa, kamay in karowan kay sa kansiro agkaboway kay anggan ngona.
[7] Kalbas siyo papangkit din kay Santiyago, kalbas sa boo kansiyo mga katiwala.
[8] Sa kalobosan siyo papangkit din sa kangay. Ako kagwali bodang miboslot yewed sa kabetek.
[9] Sa boo mga katiwala ako in kalakoyte, yewed sibay piyagawit katiwala angkataw kangay piyaidapan in barkadaan mga bodang Diyos.
[10] Kamay kaya ako mibaloy wa katiwala, ako piyakayawte in Diyos. Kalbas in siyo agpakayawte sa kangay apo din kabolowan, angkataw ako agpanawen labi kalakoy sa boo mga katiwala. Kamay yewed sa kangay kabaloyan, dayem in Diyos in agtolong sa kangay.
[11] Na kamayba ako, kamayba siro, ina daan in kanyam piyagpatoldo, ina in kanyo piyagpasandigan.
[12] No in kanyam piyagpatoldo keyen, Kiristo piyaboway wakay na nakay batang sa kanyo in kalaati keyen yewed batay boway wakay in mga matay?
[13] No totoo idbatay boway wakay in mga matay, na in beet siyabi yewed wa din boway wakay in Kiristo.
[14] Kamay no Kiristo yewed piyaboway wakay, na idapo kabolowan in kanyam piyagpatoldo, idapo din kabolowan in kantam paniwala.
[15] No Kiristo yewed piyaboway wakay, na kami baribid pag mga sogowan Diyos, angkataw siyabi kami keyen, Kiristo piyaboway wakay Diyos. Kamay ina yewed totoo no ngani yewed batay wakay boway in mga matay.
[16] No idbatay boway wakay in mga matay, na yewed din boway wakay in Kiristo.
[17] No yewed piyaboway wakay in Kiristo, na idapo kabolowan in kantam paniwala, osai yewed liibangaw in kantam mga daet.
[18] Osai no Kiristo yewed boway wakay, na in matay wa pag mga agpaniwala idbatay din boway wakay.
[19] No in kabolowan agpasandig kay Kiristo ngona waget pag boway, na kitam ayawte wano labi kay sa boo mga mangyan.
[20] Kamay angkataw totoo wa ngani Kiristo piyaboway wakay, na kantam atawanan tiyak batay wakay piyaboway in matay wa pag mga agpaniwala.
[21] Kataw romateng in katayan panawen osai ka mangyan, na kataw daan din ina romateng in boway wakay panawen din osai ka mangyan.
[22] Angkataw kaya in boo mangyan agkatay, panawen kitam boo batang kay Adan. Na kataw daan din in boo mga agpaniwala batay wakay boway, panawen piyaagem kay Kiristo.
[23] Kamay baatte osai apo kabetek piyagpaboway wakay. Kiristo in tokaw. Kalbas sa kabetek siyo agrateng wakay na batay wakay din piyaboway in mga piyaagem wa kay Kiristo.
[24] In boo mga sakopan, anggan in boo mga agpansakop kamayba mamaw kamayba mangyan, boo wanote batay diyaeg Kiristo. Kalbas ina pag kansiyo siyakop kansiyo batay tiyaboy sa Diyos Amang. Ina wa in kalobosan kobat.
[25] Angkataw kailangan Kiristo agpansakop anggan in boo kansiyo mga kalaban diyaeg wa Diyos, kalbas boo wa piyasakop kay Kiristo.
[26] Katayan in paori sa boo mga kalaban piyagbono.
[27] In Agisolat keyen, Piyasakop Diyos sa kansiyo in boote. Kamay in Diyos agbangen yewed sakop. Siyo agbangen in agpatoldo kay Kiristo keyen, In boote sakop sa kaimo.
[28] Paka in boote piyasakop wa kay Kiristo, na siyo in Bodang, siyo batay din pasakop sa Diyos in agtaboy in boote sa kansiyo. Matang in boote kamayba nakay, boo wa sakop sa Diyos.
[29] No totoo yewed piyagpaboway wakay in mga matay, na nakay batang kamo agpabaotismo panawen sa mga matay wa? Idapo kabolowan in kamo agpabaotismo panawen sa mga matay wa.
[30] Osai kami. No yewed piyagpaboway wakay in mga matay, na nakay batang kami agaway kay agbarita? Maanda, palagi kami piyagpaidapan kay.
[31] Mga belag, ibengibeng ako batay nges piyagbono. Betek wano ina in kangay piyagsabi, angkataw ako agpakayawte sa kanyo panawen kay Kiristo Isos kantam Kapwan.
[32] No ngona waget ako agkaboway, idbatay wa boway wakay, na nakay in kabolowan in ako lomaban sa matapang pag mga mangyan kagwali matapang pag ayop atai sa Ipiso? No kitam idbatay wakay boway, na kitam wa maniwala sa piyagsabi mga mangyan keyen kitam pakalakoyen in komanen, minem wa lakoy, angkataw goribas kitam agkatay wa.
[33] Ayaw bomaribid in remrem. Apo piyagsabi keyen no siyo agyanggat sa mga aleleng pag mangyan na batay biyenglay in kansiyo maal pag ogali.
[34] Na kitam agpakabait. Benglayen wa in kantam mga daet. In kalaati sa kanyo yewed katawan sa Diyos. Kangay piyagsabi ina matang kamo arikoyan.
[35] Apo yangon batay agtanong keyen nangkataw in batay wakay piyagpaboway in mga matay? Kataw nakay dogayan in bilog ina?
[36] Ina pag agtanong idapo bait. Angkataw in bini tiyogda idbatay boway anggan yewed kay matay in bini.
[37] Osai in bini tiyogda, osai wakay in lomwas. In tiyogda beter, kamayba nakay pag bini, kalbas in lomwas bolos.
[38] No nakay pag poon in remrem Diyos na ina in kansiyo piyagtaboy sa bini. No nakay pag bini in tiyogda na ina daan in batay poon.
[39] In mga agkaboway yewed tikkatawan in galem. Osai wakay in bilog mangyan, osai wakay in bilog ayop, osai wakay in sa bantog, osai wakay in sa isda.
[40] -
[41] Kataw din ina sa langit. Osai wakay in rawa in ibeng, osai wakay in rawa in bolan, in rawa in mga magirem osai wakay din. Baatte magirem osai wakay in kaalenen. Apo bilog panlangit. Apo din bilog pangkobat. Tanan daan maalen, kamay osai wakay in panlangit, osai wakay in pangkobat.
[42] Kataw din ina in boway wakay. In bilog in piyaglebeng agkabolok, kamay in bilog boway wakay kamayba nangkadogay idbatay wa agkabolok.
[43] In liyebeng daeten pag bilog, idapo eyat. Kamay in boway wakay maalen, maeyat.
[44] Pangkobat pag bilog in piyaglebeng. Panlangit pag bilog in piyagpaboway wakay. No apo bilog pangkobat, na apo din bilog panlangit.
[45] In siyabi sa Agisolat keyen, In tokaw pag Adan, siyo mangyan piyangwat agkaboway. Kamay in paori pag Adan Isos, siyo Abyan in agpamaboway.
[46] Yewed tokaw in panlangit. In pangkobat agbangen in tokaw, kalbas in panlangit.
[47] In tokaw pag Adan batang sa diya, kataw piyangwat batang bogabo. Kamay Isos in kadowai ka Adan, siyo batang sa langit.
[48] In mga pangkobat kataw daan Adan batang sa diya. In mga panlangit kataw daan Isos batang sa langit.
[49] Ngona kitam kataw in mangyan batang sa diya, na kitam kataw daan din dogayan in mangyan batang sa langit.
[50] Mga belag, in beet kangay siyabi, in bilog ener osai daya, ina yewed wano mayadi piyarateng sa sakopan Diyos. In bilog pangkobat agkabolok, idapo batay boway idapo kalobosan.
[51] Parengeyen in piyagbetang kangay wa piyagpalowas. Kitam idbatay boo matay. Kamay kitam boo batay miyalis,
[52] malkaktekan, kadogayte mamempenek waget, sa kabetek in kalobosan pag agana in bodyong. In bodyong batay magana, kalbas in mga agpaniwala batang matay piyagpaboway wakay, idbatay wa matay. Kitam boo batay miyalis.
[53] Anda pag bilog in agkabolok batay miyalis idbatay wa mabolok. In agkatay pag bilog batay miyalis idbatay wa matay.
[54] Anda pag bilog agkatay, agkabolok. Paka miyalis wa idbatay wa matay, idbatay wa mabolok, na batay wa mibaloy in Agisolat keyen, Idapo wa in katayan, diyaeg wa gayed.
[55] Osai keyen, Ngona, katayan idwa kapandaeg, katayan idapo wa kabaloyan agbono.
[56] Kaya katayan kabaloy agbono angkataw apo daet pag ogali in mangyan. In kabaloyan daet batang sa mga Batas Diyos.
[57] Kitam agkaanggay sa Diyos in agpakan sa kantam kabaloyan matang kapandaeg. Kantam Kapwan IsoKiristo in agpanonton in kabaloyan.
[58] Na, mga belag, kitam agpakarigen. Ayaw aglimbang. Agpakaeyat sa panawen in Kapwan. Angkataw kantam atawanan apo ngani kabolowan in kantam panawen sa Kapwan.