[1] Mga belag, yewed kay mayadi ako agpatoldo sa kanyo kataw in ako agpatoldo sa mga piyagbalayan in Abyan Diyos. Kailangan kamo kangay piyagpatoldo kataw in agpatoldo sa mga agpanremrem waget sa bilog, kataw sa mga bodangte kay sa agpaniwala kay Kiristo.
[2] Kamo kangay piyagpakan soso, yewed in baaw gayed, angkataw kamo ikkay kabaloy agkoman. Anggan ngona kamo ikkay kabaloy,
[3] angkataw kamo agpanremrem kay sa bilog waget. Kaya atawanan kamo agpanremrem kay sa bilog waget, angkataw kamo agpanagiri kay, agpalawayan kay, ogali waget daan mangyan.
[4] In kamo agkataw ina, in osai keyen, Ako kay Pablo, in osai wakay keyen, Ako kay Apolos, na in kanyo ogali ogali kay daan mangyan.
[5] Nakay in tongkolin Apolos? Nakay in tongkolin Pablo? Kami sogowan waget Diyos, kansiyo siyogo matang kamo yaakay maniwala kay Kiristo. Baatte osai sa kanyam agpangwat in panawen tiyaboy Diyos sa kanyam.
[6] Ako in agtogda asin, Apolos in aglalos asin, kamay in Diyos in agpaistobo sa togda.
[7] Kalakoyte in agtogda, osai in aglalos. In Diyos agbangen in lakonaw, siyo in agpaistobo.
[8] In agtogda osai in aglalos tanan agpanawen. In baatte osai batay piyagbayadan sibay sa kansiyo panawen.
[9] Kami tanan agpaytolong sa panawen Diyos. Kamo in agay Diyos. Kamo din in balay piyagpangwat Diyos.
[10] Kataw ako piyakan Diyos kabaloyan agtadyok, ako in agarigi. Osai wakay ka mangyan in agpangwat. Kamay in baatte agpangwat anda pag balay na pakarigenen.
[11] Yewed mayadi piyabalay in roma wakay pag arigi, no yewed in piyabalay wa Diyos, in IsoKiristo.
[12] In mga agpangwat apo agpabalay ginto, pilak, marigen pag bato. Apo wakay agpabalay yangaw, garasen, lalosen.
[13] In baatte agpangwat, in karigenen kansiyo piyangwat batay atawanan sa Ibeng Agtepeng, angkataw batay piyadalan sa baya. Ina pag Ibeng in panawen in baatte osai piyagtepeng sa baya, no nakay in marigen, no nakay in matebed.
[14] No kansiyo piyaiskapet sa arigi agaway, yewed matebed, na batay piyagbayadan siyo.
[15] Kamay no matebed, na siyo idapo wa batay bayad. Kamay siyo gayed piyaboway daan, kamay idapo piyagbaba kataw domalagan waget sa baya.
[16] Kailangan kanyo atawanan kamo pag barkadaan balay lakoy Diyos, in kanyo galem pagbalayan kansiyo Abyan.
[17] No in mangyan agsida sa balay lakoy Diyos, na siyo batay piyarosaan Diyos, angkataw piyagpabokod sa Diyos in kansiyo lakoy balay. Kitam in kansiyo balay lakoy.
[18] Kamayba nakay ayaw agpabaribiden in remrem. No kansiyo remrem siyo katawan wa in atai sa kobat, na kailangan siyo keyen in kansiyo atawanan idapo kabolowan, matang siyo batay katawan wa ngani.
[19] Angkataw in atawanan atai sa kobat idapo kabolowan sa pangkit Diyos. Keyen in Agisolat, In mga katawan batay piyagkabel Diyos sa kansiro daan salaod.
[20] Osai wakay keyen, Atawanan in Kapwan idapo kabolowan in piyagremrem in mga katawan.
[21] Na ayaw agpakalakoyen in panawen mangyan. Kanyo in boo,
[22] osai Pablo, kadayo Apolos, osai Pidro, osai in kobat, in boway, in katayan, kadayo din ngona pag betek, kadayo in agrateng kay. Kanyo in boote.
[23] Kalbas kamo kay Kiristo, Kiristo sa Diyos.