[1] Kamayba kitam kaiplaong sa mga agiplaong mangyan osai sa agiplaong mga angil, kamay no kitam yewed agpakayawte, na in kantam agiplaong kagwali waget agana batingting, no yewed takleb kaldido agkaykaling.
[2] Kamayba kitam apo kabaloyan agporopita, kamayba kitam katawan in boo mga datiyan piyagbetang Diyos, osai in boo mga atawanan, kamayba kitam apo lakonaw pag paniwala anggan kabaloy agpapanaw in mga boksor, kamay no kitam yewed agpakayawte na kitam idapo kabolowan.
[3] Kamayba kantam piyagtaboy sa mga maidap in boo kantam sangkap. Kamayba tiyaboy din in kantam bilog piyagpasonog anggan matay. Kamay no kitam yewed agpakayawte na kitam idapo pakinabang asin.
[4] In agpakayawte na agbanta, osai mabait. In agpakayawte na idbatay agpanagiri, idbatay mayabang, idbatay agpakalakonaw.
[5] In agpakayawte apo daan rikoy, osai idbatay agayaw, yewed din galiten, idbatay din manremrem daet.
[6] In agpakayawte yewed agkaanggay sa daet. Dayem sa betek, na siyo agkaanggay.
[7] In agpakayawte idbatay agempet. Siyo agpaniwala daan, agpanaya, agtiis anggan sa kalobosan.
[8] Agkalobos in agsabi in batang sa Diyos. Agkalobos in kabaloyan miplaong sa makasoyo pag mga agiplaong. Agkaidapo in mga atawanan. Kamay in agpakayawte idapo kalobosan.
[9] Angkataw kantam atawanan ikkay sibay. In kitam agpatoldo in agiplaong Diyos ikkay din sibay.
[10] Kamay paka sibay wa gayed, na biyaliwan wa in yewed sibay.
[11] In kitam bodang kay, in kantam agiplaong, in kantam mga remrem, osai in kantam atawanan, boo daan kataw bodang. Kamay paka kitam gorangen wa kantam wa biyenglay in ogali bodang.
[12] In kantam piyagngitan ngona yewed mapawa, kagwali sa marames pag aninowan. Kamay dogayan kitam batay agroris wa gayed sa Diyos agpatobang. Ngona ikkay sibay in kantam atawanan, kamay dogayan sibay wa gayed in atawanan. Kataw daan ngona kitam atawanan gayed Diyos.
[13] Agaway in agpaniwala, in agpanaya, osai in agpakayawte. Kamay asin pag tolo in agpakayawte agbangen in lakonaw.