[1] Ako agipalpas, ako sogowan agpamarita, ako batang kangitan kay Isos kantam Kapwan. Kamo in raweg kangay panawen sa Kapwan.
[2] Kamayba in roma dayo maniwala ako katiwala Kiristo, kailangan kamo agbangen maniwala ako ngani katiwala Kiristo. Kaya kamo agpaniwala sa Kapwan angkataw ako katiwala Kiristo.
[3] Anda in kangay sagot sa mga agbotog sa kangay.
[4] Nakay ina, ako lames piyagayaw agayay pamangnen, agayay sapa sa mga barkadaan mga bodang Diyos?
[5] Nakay ina, ako piyagayaw agpaanggat babai agpaniwala, kataw Pidro, kataw in roma mga katiwala Kiristo, kataw in mga belag in Kapwan?
[6] Nakay, kami waget dokalaki Birnabi in yewed mayadi agempet agpamangkit pamangnen?
[7] Nakay, no siyo sondalo, siyo yewed piyagbayadan? Nakay, no siyo agtogda obas, siyo yewed agpamangan in galem? Nakay, no siyo agalapet baka, siyo yewed agkoman in gatas?
[8] Anda in kangay piyagsabi yewed batang waget sa ogali mangyan. Anda daan din in piyagsabi in mga Batas Diyos.
[9] Angkataw in mga Batas Diyos siyolat Mowisis keyen, Ayaw agboksongen in bibi baka sa betek siyo piyagparoyos. Kaya siyabi Diyos, yewed sa agpakayawte waget sa baka,
[10] no yewed anggan din sa mangyan. Ina siyolat panawen sa kantam, angkataw kaya in mangyan agarado, osai agroyos, siyo batay din apo bagiyan sa galem.
[11] Kami agasik sa kanyo in piyagkailangan kanyo abyan. Na nakay batang yewed mayadi kami agani sa kanyo in piyagkailangan kanyam bilog?
[12] No in amat maal agkowa batang sa kanyo, na kami labi kay maal agkowa. Kamayba maal kami agkowa, na kami yewed. Kami agbanta wa sa boote, matang yewed yeeleg in Maal pag Barita Kiristo.
[13] In mga agpanawen sa balay lakoy Diyos, piyagpakan pamangnen sa balay Diyos. Osai in mga agbono sa mga ayop piyagtaboy sa Diyos, no biyono wa na apo din bagiyan ablasen.
[14] Na kataw daan ina in mga agpatoldo in Maal pag Barita. In bilin in Kapwan kailangan in mga agtanggap sa Maal pag Barita agtaboy pamangnen sa mga agpatoldo.
[15] Kamay kamayba ako maal agayay, yewed kangay piyagkowa kamayba nakay. Anda kangay solat, ako yewed agayay tolong. Kamayba ako agkatay wa, ako idbatay agayay kamayba kay nakay, matang idapo batay kasabi keyen kaya ako agbarita ako agpamangkit waget bayad.
[16] Yewed mayadi ako agyabang panawen sa ako agpatoldo in Maal pag Barita. Ako siyogo agpatoldo. No ako idwa agpatoldo in Maal pag Barita na magolo wano in kangay remrem.
[17] No ako wakayte agpanawen, na ako batay agpamangkit bayad. Kamay kaya ako agpanawen ako siyogo Diyos, anda pag panawen in piyatoldo sa kangay.
[18] Na in ako agpatoldo in Maal pag Barita, no ako idwa agayay bayad, na anggayan in kangay galem. Na ina wa in bayad, in ako idwa agpangkowa kamayba nakay in maal kangay piyagkowa.
[19] Ako agipalpas, ako yewed sakop kamayba sa nakay pag mangyan. Kamay ako agpasakop wa sa boo mangyan, matang aronaw in kangay yaakay kay Kiristo.
[20] Sa betek ako sarig in mga Odyo, ako agtolad sa Odyo, matang siro kangay maakay kay Kiristo. Kamayba ako yewed sakop sa mga Batas Mowisis, kangay piyagogali in mga Batas Mowisis, no betek sarig in mga sakop asin, matang siro kangay maakay.
[21] No betek sarig in mga yewed Odyo, mga yewed sakop sa mga Batas Mowisis, ako agtolad wa sa yewed Odyo, yewed sakop asin, matang siro maakay din ako. Kamay ako agpaniwala daan sa mga Batas Diyos, angkataw ako agpaniwala sa mga bilin Kiristo.
[22] No betek sarig in mga idapo eyat ako kataw in idapo eyat, matang siro kangay maakay. Na ako agtolad sa boo mangyan, matang apo piyaboway, kamayba nakay pag padalan.
[23] Ina boo kangay piyagpangwat panawen sa Maal pag Barita, matang ako apo din bagiyan sa piyagtaboy in Maal pag Barita.
[24] Kamo katawan no apo labanan siro boo agdalagan, kamay osai waget in mandaeg, siyo waget in piyakan bayad. Na pakalakasen in agdalagan matang kamo kabel in bayad.
[25] In boo mga agsanay batay agdalagan, agayaw sa kansiro sadiri mga beet, matang kabel bayad kamayba osai waget ka sarikaw isagte wakay masida. Kamay in kantam piyagkaamag bayad sarikaw idbatay masida anggan idapo kalobosan.
[26] Ako ageyat agdalagan, agtaboy sa batay kangay pagratengan. Ako ageyat agsontok, yewed waget agparaktis.
[27] Kangay piyagpaidapan in kangay bilog, kangay piyagsakop, karam ako batang agpatoldo sa mga roma, ako agbangen piyagayaw wa lomaban.