[1] Panawen sa ablasen in batang wa piyasola, totoo in piyagsabi keyen kitam boo katawan. Kamay in agsabi siyo katawan wa ina bosliyen. Kamay in agpakayawte agpakarigen sa paniwala.
[2] In agremrem siyo katawan wa, siyo yewed kay katawan in kailangan kansiyo atawanan.
[3] Kamay in agkabeet sa Diyos, in Diyos katawan sa kansiyo.
[4] Panawen sa ablasen batang wa piyasola, kitam katawan idapo kabolowan in mga yewed Diyos. Osai waget in Diyos.
[5] Kamayba apo mga piyagawit Diyos sa kobat, osai sa langit, kamayba aronaw ina pag mga piyagawit Diyos, osai piyagawit kapwan,
[6] na sa kantam atawanan osai waget ngani in Diyos. Siyo in Amang in agpangwat in boote, matang kitam kansiyo sangkap. Osai osai waget in Kapwan, siyo IsoKiristo, siyo in paywaraan agpangwat in boote, siyo in paywaraan agpakan boway sa kantam.
[7] Kamay yewed boo katawan ina. In amat tangona sanay sa agpandalangin sa mga mamaw. Na anggan ngona, no siro agpamangan in batang wa piyasola, kansiro remrem ina pag agkoman ablasen agiyagem kay daan sa agpandalangin sa mga mamaw. Siro keyen siro agpangwat daet, angkataw korang kay in kansiro atawanan, magolo in kansiro remrem.
[8] Kaya in Diyos agkaanggay sa kantam yewed panawen sa pamangnen agbangen. In remrem Diyos sa kantam idbatay agiyalis kamayba kitam mamangan, kamayba yewed.
[9] Kamay kitam agingat. Maal kitam mamangan, kamay no ina makadaet sa kalakoyte kay sa agpaniwala, matang siyo mamangan din, agpangwat daet sa kansiyo remrem, na ayaw kitam mamangan.
[10] No kitam in katawan, mamangan sa betek agpansola, kalbas kitam ngiitan in kalakoyte sa agpaniwala, na karam siyo aakayan agkoman sa ablasen piyasola.
[11] Na no kataw ina kitam in mga katawan, na panawen sa kantam piyangwat batay masida in paniwala in kalakoyte kay sa paniwala. Siyo kantam ariyan, in Kiristo matay panawen sa kansiyo.
[12] No kataw ina na kitam agpangwat daet kay Kiristo, angkataw kantam belag kalakoyte kay sa paniwala kantam yaakay sa daet, kantam siida in kansiyo paniwala.
[13] Na no kangay belag agpangwat daet panawen sa pamangnen, na ako idbatay wa daan gayed mamangan ina pag ablasen, matang siyo idwa din agpangwat daet.