[1] Mga belag, in ako pataboy sa kanyo kangay wa piyalowas in batang piyagbetang pag remrem Diyos. Kamay in kangay mga agiplaong yewed malayem, yewed maidap atawanan.
[2] Angkataw in ako pataboy sa kanyo in kangay remrem ako idapo batay piyagpatoldo sa kanyo no yewed in IsoKiristo in piyako sa kodos.
[3] Ako idapo eyat in ako sa kanyo. Ako agkalimo, agtagelgey.
[4] Ako agbarita agpatoldo sa kanyo, yewed sa masadap pag mga agiplaong batang sa atawanan mangyan, no yewed in kabaloyan in Betek pag Abyan in agpatonay sa barita.
[5] Matang in kamo agpasandig kay Kiristo kamo agpasandig sa kabaloyan Diyos, yewed sa atawanan mangyan.
[6] Kamay sa mga gorangen wa sa agpaniwala kami agpatoldo in atawanan. Kamay yewed in atawanan atai sa kobat, kamayba in mga koyay atai sa kobat. Ina pag mga koyay agkaidapo.
[7] In kanyam piyagpatoldo in remrem Diyos, in batang piyagbetang sa mga mangyan. In ikkay mibaloy in kobat, ina in kansiyo remrem siyandata matang kitam batay piyakalakonaw.
[8] In mga koyay atai sa kobat, kamayba osai waget yewed katawan ina pag remrem Diyos. No kansiro atawanan na idbatay wa nges kansiro piyako sa kodos in lakonaw lakoy pag Kapwan.
[9] Kataw tai in siyabi in Agisolat keyen, Yewed kay ngiitan mata, ikkay arengeyan talinga, ikkay riyemrem mangyan in siyandata Diyos batay piyagtaboy sa mga agmaal sa kansiyo.
[10] Kamay ina piyalowas wa Diyos sa kantam, piyalowas in kansiyo Abyan. In Abyan katawan in boote, kamayba in idbatay atawanan pag remrem Diyos.
[11] Idapo batay katawan in remrem osai ka mangyan, no yewed in kansiyo daan abyan. Na kataw din ina idapo batay katawan in remrem Diyos, no yewed in Abyan waget Diyos.
[12] In tiyaboy sa kantam yewed in remrem agpasandig sa atawanan mangyan, dayem in Abyan Diyos, matang kantam atawanan in kansiyo mga piyagtaboy sa kantam.
[13] In kanyam mga piyagsabi batang sa Abyan Diyos, yewed batang sa atawanan mangyan. Na in mga atawanan in Abyan in kanyam piyagpatoldo sa mga apo in Abyan Diyos.
[14] No in mangyan idapo in Abyan Diyos, na siyo dayo komwa in mga piyagtaboy in Abyan Diyos. Ina pag mga piyagtaboy kansiyo piyagidapo kabolowan, yewed kansiyo atawanan. Angkataw in mga apo in Abyan Diyos, ina waget in katawan.
[15] In mga mangyan piyagbalayan in Abyan Diyos katawan in kalakoyen kamayba nakay. Kamay idapo batay katawan in kalakoyen ina pag mangyan.
[16] Kataw tai in Agisolat keyen, Idapo batay katawan in remrem in Kapwan. Idapo batay kapatoldo sa kansiyo. Kamay in remrem Kiristo agbalay wa daan sa kantam galem.