[1] Na kitam agpakaeyat agpakayawte kataw ina. Kalbas ayayen din in mga kabaloyan piyagtaboy in Betek pag Abyan, labi kay in agpatoldo in agiplaong Diyos.
[2] In agiplaong sa makasoyo pag agiplaong, na siyo agpanggisodan sa Diyos, yewed sa mangyan. Angkataw in boo mangyan yewed katawan in kansiyo piyagsabi. Siyo piyagpakan kabaloyan in Betek pag Abyan matang agsabi in mga piyagbetang kay.
[3] Dayem in agsabi in batang sa Diyos, na siyo agiplaong sa mga mangyan, agpaistobo sa kansiro paniwala, agpakaeyat in remrem, osai agayat.
[4] In agiplaong sa makasoyo pag agiplaong agpaistobo waget sa kansiyo sadiri paniwala. Dayem in agpatoldo in agiplaong Diyos na ina agpaistobo sa paniwala in barkadaan mga bodang Diyos.
[5] Maal sa kangay no kamo boo agiplaong sa makasoyo pag mga agiplaong. Kamay labi kay maal no kamo boo apo kabaloyan agpatoldo in agiplaong Diyos. In agpatoldo in agiplaong Diyos labi kay kalakoy sa agiplaong sa makasoyo pag mga agiplaong. Dayem apo agpaaling in kansiyo siyabi matang agpaistobo in paniwala in barkadaan mga bodang Diyos.
[6] Na mga belag, kamayba ako pataboy sa kanyo, no ako agiplaong waget sa makasoyo pag mga agiplaong, na kamo idapo pakinabang sa kangay. Dayem no ako agpatoldo sa kanyo in piyagpapangkit Diyos sa kangay, in kangay mga atawanan, no yewed in agiplaong Diyos, no yewed in mga adar, na kamo apo pakinabang.
[7] Alimbawa, kamayba in mga idapo payeng pag mga piyagpagana kataw in bangsi, kataw in gitara, no in agpagana yewed sanay, na kitam idbatay katawan in baren.
[8] In agpagana bodyong no yewed sanay na in mga sondalo idbatay karengey, idbatay agsandata aggira.
[9] Na kataw daan ina. No kitam agiplaong sa makasoyo pag agiplaong in idbatay atawanan, na idapo batay katawan in kantam piyagsabi. In kantam mga agiplaong idapo kabolowan, kowaya waget.
[10] Karowan in mga agiplaong sa kobat. Baatte osai apo kabolowan.
[11] Kamay no ako yewed katawan in kansiyo agiplaong na idapo kabolowan kami agpanggisodan.
[12] Kataw kanyo piyagbeet in mga piyagtaboy in Betek pag Abyan, na pakalakoyen in mga kabaloyan agpaistobo paniwala sa barkadaan mga bodang Diyos.
[13] Na no siyo agiplaong sa makasoyo pag agiplaong na kansiyo ayayen din in kabaloyan agpaaling in kansiyo siyabi.
[14] No kitam agpandalangin sa makasoyo pag agiplaong na kantam abyan agpandalangin, kamay in kantam remrem yewed.
[15] Na nakay in maal? In maal agpandalangin in kantam abyan, kamay kadayo din in kantam remrem agpangwat agpandalangin. Agbaren in kantam abyan kamay kadayo in kantam remrem agpangwat agbaren din.
[16] No in kantam abyan waget in agkaanggay sa Diyos, kalbas in roma mangyan, no siyo yewed piyakan ina pag kabaloyan, na siyo idbatay katawan in kantam piyagsabi, na siyo idbatay kasabi keyen, Ina wa ngani.
[17] Kamayba maal din ina pag agkaanggay sa Diyos, kamay ina yewed agtolong, yewed agpaistobo sa roma paniwa la.
[18] Ako agkaanggay sa Diyos kataw ako kaiplaong sa makasoyo pag mga agiplaong labi kay sa kanyo boo.
[19] Kamay sa agsamba ako dayo agsabi osai ka laksa ka agiplaong sa yewed atawanan pag agiplaong. In labi kay kangay beet ako agsabi lima waget ka agiplaong in atawanan in karowan, matang agpatoldo sa mga roma.
[20] Mga belag, ayaw kataw mga bodangte in remrem. Kailangan kamo mibaloy kataw mga bodangte idapo katawan agpangwat daet. Kamay mibaloy wa koyay in remrem.
[21] Siyabi sa Agisolat keyen, Siyabi in Kapwan keyen, Ako batay agsogo mga mangyan apo roma pag mga agiplaong atai pag mga mangyan. Kamayba kataw ina siro idbatay kay din agparengey sa kangay agiplaong. Ina in siyabi in Kapwan.
[22] No kataw ina, no kitam agiplaong sa makasoyo pag mga agiplaong, na ina yewed tolong sa mga agpaniwala agbangen. Kamay ina agpapangkit sa mga yewed agpaniwala agbangen keyen kitam apo in Abyan. Dayem no kitam agpatoldo in agiplaong Diyos na karam ina yewed tolong sa mga yewed agpaniwala agbangen. Kamay ina agpapangkit sa mga agpaniwala agbangen keyen kitam apo in Abyan.
[23] Sa agsamba, no kitam boo agiplaong sa makasoyo pag mga agiplaong, kalbas apo rateng asin mga mangyan idapo kataw ina pag kabaloyan, kamayba mga yewed agpaniwala, na siro batay keyen kitam idapo bait.
[24] Dayem no kitam boo agpatoldo in agiplaong Diyos, kalbas apo rateng osai ka yewed agpaniwala, no yewed mangyan idapo kataw ina pag kabaloyan, na panawen sa boo siyabi kansiyo batay atawanan siyo apo daet, atawanan siyo daet sa pangkit Diyos.
[25] In kansiyo mga piyagtago remrem piyagngitan wa, na siyo batay agpaereng, agdaing sa Diyos. Siyo batay agsabi keyen in Diyos atai ngani sa kantam.
[26] Mga belag, anda in galem kangay piyagsabi. Sa kantam samba apo agbaren, apo agpatoldo, apo agbarita in remrem Diyos, apo agiplaongan sa makasoyo pag agiplaong, osai apo din agpaaling ina pag mga agiplaong. In boote kantam pangwaten maal matang agpaistobo paniwala sa barkadaan mga bodang Diyos.
[27] No apo agiplaong sa makasoyo pag agiplaong, na dowai waget no yewed tolo, maykalbasan. Kalbas kailangan apo din agpaaling in kansiro siyabi.
[28] Kamay no sa samba idapo batay agpaaling na ayaw miplaong sa makasoyo pag agiplaong. Miplaong waget sa Diyos sa galem kansiyo remrem.
[29] Miplaong in dowai no yewed tolo ka agpatoldo in agiplaong Diyos. In mga roma manremrem sa kansiro piyagsabi no betek, no yewed.
[30] Kadogay no osai wakay ka asin agtokkaw agpanremrem sa piyagsabi toloy apo din agiplaong Diyos batay piyatoldo, na omempet wa in osai.
[31] Angkataw kitam boo maal agpatoldo in agiplaong Diyos, kamay ayaw agpalkaktekan, matang boo katawan, osai boo maeyat in remrem.
[32] In piyakan kabaloyan agpatoldo in agiplaong Diyos kailangan katawan agempet agiplaongan.
[33] Angkataw in Diyos yewed agkaanggay sa aglalae, no yewed sa agkapyaan. Kataw tai in kailangan sa boo mga barkadaan mga bodang Diyos.
[34] In mga kagbaiyan ayaw agiplaong sa agsamba. Siro piyagayaw agiplaong. Kailangan siro pasakop, kataw in siyabi sa mga batas mga Odyo.
[35] No in kagbaiyan apo tanong, na ayaw kay agpalowasen anggan rateng sa balay, bayo agtanong sa kansiyo lalaki. Angkataw makarikoy no in kagbaiyan miplaong sa agsamba.
[36] Karam kanyo remrem in agiplaong Diyos batang sa kanyo, kamo waget in aratengan in agiplaong Diyos.
[37] No kansiyo remrem siyo siyogo Diyos, apo kabaloyan tiyaboy in Betek pag Abyan, na kailangan siyo maniwala anda in kangay piyagsolat bilin ngani Kiristo.
[38] No siyo dayo maniwala asin, na kamo ayaw din maniwala sa kansiyo.
[39] Na, mga belag, kantam ayayen in kabaloyan agpatoldo in agiplaong Diyos. Kamay ayaw agayawen in agiplaong sa makasoyo pag mga agiplaong.
[40] Kamay kailangan agkapyaan, ayaw magolo in boo kantam panawen.