[1] No sa kanyo barkadaan apo tayari sa paniwala agpalaway, nakay batang kamo agpaosay sa mga koyay yewed agpaniwala? Nakay batang yewed sa mga iidang Diyos pag mga koyay?
[2] Kailangan kanyo atawanan kitam in mga iidang Diyos batay agosay sa boo mangyan. No kitam batay agosay sa boo mangyan, na nakay batang kamo yewed kabaloy agosay sa mga kataw ina kalakoyte?
[3] Kitam dogayan agosay sa mga angil. Na no kitam kabaloy agosay sa mga angil, na labi kay kitam kabaloy atai waget in sa kobat mga osap.
[4] No kamo apo osap, kamo lames batay kay agpaosay sa mga koyay yewed sa barkadaan mga bodang Diyos?
[5] Kailangan kamo agkarikoy. Tiyak apo asin sa kanyo katawan agosay sa mga tayariyan sa agpaniwala.
[6] Kamo tayariyan, no agpalsisombongan, nakay batang ina kanyo piyagpaosay sa mga yewed agpaniwala?
[7] In kamo agpalawayan, ina agsida sa kanyo agpaysarigan agpaniwala. In maal kay kamo agbanta wate no kamo piyagapi, no kamo piyagpadaya.
[8] Kamay kamo kay in agpangapi, in agpamadaya, kamayba sa kanyo daan belag sa agpaniwala.
[9] Kailangan kanyo atawanan in mga agpamangwat daet idbatay sa sakopan Diyos. Ayaw agpabaribiden in kanyo remrem. In mga agpanggaraw, in mga agsamba sa yewed Diyos, in mga agpanaban, in mga bakla,
[10] in mga agpanakaw, mga solangan, mga agpanlasing, mga agpanlibak, mga agpangapi, in kataw ina pag mga mangyan idbatay sa sakopan Diyos.
[11] Kitam tangona in amat kataw ina. Kamay ngona kitam liinis wa, kitam tiyalaga wa sa Diyos, kitam piyangwat wa idapo daet, sa kabaloyan IsoKiristo in Kapwan, osai in Abyan Diyos.
[12] Apo mangyan batay agsabi keyen, Idapo piyagayaw sa kangay kamayba nakayte. Na tomag betek in kansiyo siyabi, kamay in roma daeten sa kantam. Maal din ako agsabi keyen, Idapo piyagayaw sa kangay. Kamay ako idbatay pasakop sa kamayba nakay pag ogali.
[13] Apo batay keyen, In boyon pagsoroyan pamangnen, pamangnen piyagsoroy sa boyon. Betek ina pag siyabi, kamay kadayo in boyon, kadayo in pamangnen, na dogayan batay siida in Diyos. In bilog mangyan piyangwat yewed matang agpanggaraw, dayem matang agpangwat in beet in Kapwan. Na in Kapwan in baala sa kantam bilog.
[14] Isos in Kapwan piyaboway wakay tagoli Diyos. Na kitam batay din kataw ina piyaboway wakay tagoli kansiyo kabaloyan.
[15] Kailangan kanyo atawanan kitam mga sangkap sa bilog Kiristo. Na nakay, maal lames kiyowa in sangkap Kiristo, kalbas piyaagem sa agpanggaraw pag kagbaiyan? Yewed wano mayadi.
[16] Kailangan kanyo atawanan in agiskapet sa kataw ina pag kagbaiyan, siro mibaloy wa osai waget ka bilog. Kataw siyabi sa Agisolat keyen, Siro dowai mibaloy wa osai waget.
[17] Kamay in agiskapet sa Kapwan, na siro mibaloy wa osai waget ka abyan, osai in Kapwan.
[18] Kitam ayaw agpanggaraw. In agpanggaraw, kansiyo daan bilog in piyagpangwatan daet, kamay in boo roma mga daet, idwa sa kansiyo bilog.
[19] Kailangan kanyo atawanan in kantam bilog balay in Betek pag Abyan. Siyo in tiyaboy Diyos sa kantam. Siyo agbalay sa kantam galem. Na idwa kitam in kapwan kantam bilog. Diyos in kapwan.
[20] Kitam kansiyo biili, biyayadan wa. Na kailangan paglakonawen kantam bilog in Diyos.