[1] Ako kanyo toladen, kataw daan ako agtolad kay Kiristo.
[2] Maal ngani kamo, ako yewed kanyo anaweyan, osai kanyo piyagpangwat in mga ogali kangay piyatoldo sa kanyo.
[3] Kangay piyagpatoldo sa kanyo Kiristo sakop sa Diyos, in mga kaliyakiyan sakop kay Kiristo, in babai sakop sa kansiyo lalaki.
[4] Na in kaliyakiyan no siyo agsambalilo in betek siyo agpandalangin, osai in betek agpaliwanag in agiplaong Diyos, na siyo agpaidapo kabolowan kay Kiristo.
[5] Kamay in kagbaiyan no yewed agsorbong in siyo agpandalangin, osai in betek agpaliwanag in agiplaong Diyos, na siyo agpaidapo kabolowan sa kansiyo lalaki. Ina makarikoy kataw daan no biyolog wa gayed in olo.
[6] No in kagbaiyan dayo agsorbong na gopiten wa gayed in kansiyo abok. Na in maal in kagbaiyan agsorbong, angkataw makarikoy no giyopit wa in abok, malalaanen wa in olo.
[7] In kaliyakiyan ayaw agtakleb kansiyo olo, angkataw siyo anino Diyos, anino in kalakoyen Diyos. Kamay in mga kagbaiyan anino in kalakoyen in mga kaliyakiyan.
[8] Angkataw in kaliyakiyan yewed piyangwat batang sa kagbaiyan, dayem in kagbaiyan piyangwat batang sa kaliyakiyan.
[9] Osai din in kaliyakiyan piyangwat yewed panawen sa kagbaiyan, dayem in kagbaiyan piyangwat panawen sa kaliyakiyan.
[10] Maal sa mga angil no in kagbaiyan agsorbong matang piyagngitan siyo sakop sa kansiyo lalaki.
[11] Kamaybawa, sa piyangwat Diyos in mga kagbaiyan kailangan apo mga kaliyakiyan, osai in mga kaliyakiyan kailangan apo mga kagbaiyan.
[12] Kataw in kagbaiyan piyangwat batang sa kaliyakiyan, in kaliyakiyan piyagboslot kagbaiyan. In boote batang sa Diyos.
[13] Amba remremen, maal lames in kagbaiyan agpandalangin sa Diyos yewed agsorbong?
[14] In boo piyangwat Diyos agpamatoldo sa kantam kailangan in kaliyakiyan agkarikoy no maaba in kansiyo abok.
[15] Kamay sa kagbaiyan no maaba in abok ina makaanggay. Kaya siyo piyakan abok matang pansorbong.
[16] Kamay no siyo batay kay aglaban asin, na ako idapo piyagsabi no yewed keyen, Kataw ina ngani in kantam ogali sa agsamba, kadayo in mga barkadaan mga bodang Diyos.
[17] Ngona ako batay wa agpatoldo sa kanyo panawen sa kanyo mga tipon. Ina yewed makaanggay sa kangay. Kanyo mga tipon agpakamaal nges, bago daeten daan.
[18] In tokaw, ako karengey barita keyen kanyo tipon agpalsowayan. Ako agpaniwala karam ina totoo.
[19] Karam kailangan kay kamo agpalsowayan matang atawanan no nakay pag mga mangyan in maal.
[20] In kanyo tipon, in kanyo piyagkoman pamangnen idwa yapon in Kapwan,
[21] angkataw kamo baatte osai agkalaliyan agkoman kansiyo biyaba pamangnen, in roma agkayawes, in kalaati wakay aglasing.
[22] Nakay ina, kamo idapo balay matang kamo mamangan kay ista, minem kay ista? Kanyo piyagidapo kabolowan in barkadaan mga bodang Diyos, kanyo piyagpakarikoy in mga maidap. Kanyo lames beet ako agmaal sa kanyo? Ako idwa mayadi agkaanggay sa kanyo. Kamo idwa ngani kangay piyagkaanggayan.
[23] Batang sa Kapwan ina pag ogali in kangay piyatoldo sa kanyo. In bayapon in Kapwan Isos batay wa piyadakep sa mga agkabono sa kansiyo, kansiyo kiyowa in tinapay.
[24] Kalbas agpasalamat, kalbas kansiyo piyandodo. Siyo keyen, Anda in kangay bilog piyagtaboy panawen sa kanyo, anda kanyo komanen matang kamo manremrem sa kangay.
[25] Kataw din in sa pagpangineman. Kalbas wa siro mamangan in yapon, kansiyo din kiyowa in pagpangineman, keyen, In galem anda pag pangineman in bayo wakay pag kasondowan Diyos. Kangay daya in aglobos. Baatte kamo atai minem kamo manremrem sa kangay.
[26] Angkataw baatte kamo mamangan kataw anda, aginem kataw anda, na in katayan in Kapwan kanyo piyagpatoldo sa mga mangyan anggan siyo atai wakay rateng.
[27] Na no siyo mamangan in pamangnen, osai minem sa pagpangineman in Kapwan, kamay siyo apo daet yewed kay biyenglay, na siyo agpangwat wa daet sa bilog in Kapwan, osai sa daya in Kapwan.
[28] Na baatte mangyan in tokaw manremrem no apo daet sa galem, tokaw benglayen, kalbas bayo mamangan in pamangnen osai minem sa pagpangineman.
[29] Angkataw in mamangan osai minem, kamay yewed kansiyo piyagmaal in bilog in Kapwan, na siyo agayay wa parosa.
[30] Ina in dailan kaya aronaw apo maskit sa kanyo, aronaw idapo eyat, apo din mga matay.
[31] Kamay no kitam tokaw manremrem no apo daet, kadogay agbenglay, na kitam idbatay piyarosa in Kapwan.
[32] Kamay no kitam piyagparosa in Kapwan, na kitam kansiyo piyagpatoldo, matang kitam dogayan idbatay wa piyarosa sarig in mga yewed agpaniwala.
[33] Na, mga belag, no kamo agkatipon batay malpamangan na kamo agpanaya sa mga roma.
[34] Matang yewed mibaloy daet in kanyo tipon, matang kamo idbatay piyarosa in Kapwan. No siyo agkayawes na sa balay wa in mamangan. No ako asina wa rateng na in mga roma yewed kay maayos kangay wakay piyagpakapya.