[1] Apo agbarita sa kangay keyen apo wa lakoy sa kanyo agpangwat daet. Kamayba in mga yewed agpaniwala idbatay agpangwat in kataw ina pag daet. Osai ka kaliyakiyan miskapet wakay sa kansiyo inang pangoman.
[2] Kalbas kamo agpakabwat kay remrem. In maal nges kamo agrongkot, in maal nges ina pag agpangwat kataw ina kanyo biyoyaw sa barkadaan mga bodang Diyos.
[3] -
[4] Kamayba in kangay bilog idapo asin, na ako agremrem daan din sa kanyo. Na kataw daan ako asin, sa kabaloyan Isos kantam Kapwan kangay wa atawanan in padalan asin pag agpangwat kaloba ina. Kamo matipon wa, ako agremrem daan din sa kanyo. Kalbas sa kabaloyan daan Isos kantam Kapwan,
[5] ina pag mangyan kanyo taboyen sa dimonyo, matang siida in kansiyo bilog, matang nges piyaboway kansiyo abyan dogayan sa Kabetek agrateng in Kapwan.
[6] Yewed maal in kamo agpakabwat remrem. Kanyo atawanan in piyagsabi keyen, Kamayba kalakoyte waget in piyaagem pamaistobo tinapay na mistobo in boo tikmel.
[7] Na benglayen wa in dogay wa pag pamaistobo, in daet pag ogali, matang kamo malinis. Na kamo kataw in bayo wakay tikmel, idapo pamaistobo. Kataw ngani ina kamo, angkataw biyono wa Kiristo kataw in bodang topa piyagbono sa piyasta piyagawit Paskowa.
[8] Na kitam wa mamiyasta, kamay ayaw wa in tinapay apo dogay wa pag pamaistobo, in daet remem, daet pag ogali. Dayem in tinapay idapo pamaistobo, in malinis pag remrem, in betek pag ogali.
[9] Kangay siyabi sa taite pag solat keyen, Ayaw agpanyanggat sa mga agpanggaraw.
[10] In kangay beet siyabi yewed sa yewed agpaniwala pag mga agpanggaraw, mga solangan, mga agpanakaw, mga agsamba sa yewed Diyos. Angkataw kamayba saano sa boo kobat apo mga yewed agpaniwala.
[11] Dayem in beet kangay siyabi ayaw agpanyanggat sa agsabi siyo agpaniwala kay Kiristo, kamay siyo agpanggaraw daan, no yewed solangan, no yewed agsamba sa yewed Diyos, no yewed aglibak, no yewed agpanlasing, no yewed agpanakaw. Ayaw agpamabelag sa kataw ina pag mga mangyan.
[12] -
[13] Ako yewed koyay agparosa sa mga yewed agpaniwala. Diyos agbangen in batay agparosa sa kansiro. Kamay kitam in mga koyay in agparosa sa mga agiyagem sa kantam barkadaan. Kataw in Agisolat keyen, Kanyo boyawen sa kanyo barkadaan in aleleng pag mangyan.