[1] Ako Pablo in agsolat osai Timotiyo kantam belag. Ako katiwala Kiristo. Ina in beet Diyos. Kami agsolat sa barkadaan mga bodang Diyos sa bayan Korinto, kadayo sa mga iidang Diyos sa boo kobat Akaya.
[2] Kamo pakayawteen osai pakapyaen in Diyos kantam Amang osai IsoKiristo kantam Kapwan.
[3] Kantam pakalakonawen in Diyos, in Amang Kiristo Isos kantam Kapwan. Siyo in mabait pag Amang. Siyo in Diyos in agpakaeyat remrem.
[4] Sa boo kantam kaidapan siyo in agpakaeyat kantam remrem, matang kitam kabaloy agpakaeyat remrem sa mga mangyan piyagpaidapan, panawen kantam remrem piyakaeyat Diyos.
[5] No nangkalakoy in kaidapan kanyam diyalan in kami agyanggat kay Kiristo, na kalakoy din ina in kanyam eyat remrem batang kay Kiristo.
[6] No kami piyagpaidapan na ina matang piyakaeyat kanyo remrem, osai matang kamo piyaboway. Kalbas no piyakaeyat in kanyam remrem na ina matang piyakaeyat din in kanyo remrem matang kamo kabaloy agtiis sa mga kaidapan kataw daan in kanyam piyagtiis.
[7] Na maeyat in kanyam remrem sa kanyo, angkataw kanyam atawanan kataw kamo agyanggat sa kanyam sa kaidapan na piyakaeyat din in kanyo remrem kataw kanyam.
[8] Mga belag, kanyam piyagbarita sa kanyo in mga kaidapan kanyam diyalan in kami sa Asya. In kalobaen idwa mayadi, anggan kanyam remrem tomag idbatay wa boway.
[9] Kami keyen kami batay wa matay. Kamay ina mibaloy matang ayaw kami agpasandig sa sadiri kabaloyan, dayem sa Diyos, kataw siyo in agpamaboway wakay sa mga matay.
[10] Ina pag betek kami kansiyo piyaboway sa batay wa piyagbono. Kamay anggan ngona kami piyagpaboway daan. Kanyam din atawanan gayed kami kansiyo kay batay piyagpaboway,
[11] angkataw kamo agpandalangin agtolong sa kanyam. No kataw ina, aronaw in agpandalangin sa kanyam, na aronaw din in batay agkaanggay sa Diyos paka kansiyo wa siyagot in mga pandalangin, kami kansiyo tiyolong.
[12] Anda in kanyam piyagkaanggay, angkataw sa kanyam galem kami katawan in kanyam mga ogali idapo agibetang sa boo mangyan, yewed bosliyen, na labi kay sa kanyo. Ina yewed waget sa kanyam atawanan, dayem batang daan sa Diyos.
[13] -
[14] Na sa kanyam mga solat ayaw agpamangkit kay galem labi kay sa kanyo ngiitan. Ngona in kanyam ogali ikkay gayed kanyo atawanan. Kamay kangay beet dogayan kanyo gayed atawanan. Matang sa kabetek agrateng in Kapwan Isos kami kanyo piyakalakonaw, kataw daan kamo kanyam piyagpakalakonaw.
[15] Panawen ina in kangay atawanan sa kanyo, na in kangay nges taite remrem ako tokaw domalan sa kanyo, matang nges kitam makadowai agpalkaanggayan.
[16] Kangay nges beet domalan sa kanyo in ako agtaboy atai sa kobat Masidonya. Kalbas in ako agoli domalan wakay sa kanyo, matang ako kanyo wakay tiyolong sa agipanaw agtaboy sa Odiya.
[17] Ngona in idwa domalan sa kanyo karam kanyo remrem ako bosliyen, agalisalis in kangay remrem, kataw in piyagpangwat in mga yewed agpaniwala, kamayba aon kamay yewed.
[18] Kataw in Diyos yewed bosliyen na kataw din ina ako, yewed bosliyen in kangay mga agiplaong sa kanyo. No aon na aon wa daan ngani.
[19] Angkataw IsoKiristo in Bodang Diyos in piyatoldo sa kanyo kami Silbano osai Timotiyo, siyo yewed aon kadogay yewed. Dayem siyo palagi aon.
[20] Angkataw kay IsoKiristo kitam kabel in boo mga pangako Diyos. Panawen sa kansiyo kitam kasabi keyen, Ina wa ngani, matang in Diyos piyagmaal.
[21] In Diyos in agparigen sa kanyam paniwala, anggan sa kanyo, kataw kitam agpaagem kay Kiristo. Siyo daan din in omidang sa kantam.
[22] Kitam kansiyo tiyandaan osai piyakan kansiyo Abyan sa kantam galem matang kantam atawanan batay kay din mibaloy in boo kansiyo mga pangako.
[23] In Diyos katawan sa kangay galem. Siyo katawan totoo ngani kaya ako taite idwa domalan sa Korinto, angkataw kamo daan kangay piyagpanremrem.
[24] Yewed kanyam beet agpoon sa kanyo paniwala. Kataw marigen wa kamo asin. Dayem kanyam beet agtolong sa kanyo matang kamo agkaanggay.