[1] Mga belag, ako beet kamo katawan in barita in piyangwat Diyos in siyo agpakayawte sa mga barkadaan kansiyo mga bodang sa Masidonya.
[2] Kamayba siro piyagsobok mga maloba pag kaidapan siro agkaanggay daan no, anggan kamayba wa siro maidap siro agtaboy daan lakoy.
[3] Siro wakayte agtaboy, yewed waget in kansiro abaloyan no yewed labi kay sa kansiro abaloyan. Kaya ako katawan,
[4] angkataw siro agpilit sa kangay keyen, Kami din pasaliyen sa agtolong sa mga belag sa Odiya.
[5] Kalbas in tiyaboy labi kay kalakoy sa kanyam piyagremrem. Kansiro tokaw tiyaboy sa Kapwan in boo sa kansiro sadiri. Kalbas panawen sa beet Diyos, ina tiyaboy din sa kanyam.
[6] Angkataw Titos in datiyan agpapoon ina pag panawen agtolong, na siyo kangay siyogo agpapoon din sa kanyo agbangen anggan mibaloy wa.
[7] Kamo lakonaw in paniwala, in atawanan. Kamo kabaloy agiplaong, osai ageyat agpanawen, osai agpakayawte sa kanyam. Na kamo agpilit din agtaboy lakonaw pag tolong sa mga belag sa Odiya.
[8] Kamo yewed kangay piyagpilit. Kaya kangay piyagbarita sa kanyo in piyagpangwat in kalaati in siro agtolong, matang atawanan no kamo apo din agpakayawte gayed.
[9] Angkataw kanyo atawanan in kalakoyen in agpakayawte IsoKiristo kantam Kapwan. Kamayba siyo mayaman, siyo agpakaidap panawen sa kantam, matang panawen sa kansiyo kaidapan kitam kansiyo piyayaman.
[10] Anda in kangay bilin panawen asin. Kadagon kamo in tokaw agkatolong osai agtaboy. Na ngona lobosen wa ina in kanyo piyarakay.
[11] Angkataw kamo agkaanggay agparakay, na ayaw wa aglimbangen anggan lobos. Agtaboy kamo no nangkalakoy in kanyo abaloyan.
[12] Angkataw no kitam beet agtaboy, na piyagtanggap Diyos kamayba nangkalakoy in kantam abaloyan. Yewed kansiyo piyagayay in idapo sa kantam.
[13] Yewed kangay beet siyabi kamo piyagpaidapan matang in amat apyaan.
[14] Dayem in beet tikkatawan in boo. Ngona pag betek kamo apo. Na in maal kanyo tolongen in mga agkaidapan. Na no dogayan kamo agbangen in agkaidapan, kalbas siro wakay agbangen in apo, na siro wakay in batay agtolong sa kanyo. Kataw ina kamo boo tikkatawan.
[15] Na mibaloy wa sa kanyo in Agisolat keyen, In agporot aronaw idbatay siyobraan. In agporot wakay kalakoyte idbatay kiyorang.
[16] Ako agkaanggay sa Diyos angkataw siyo agpanawen sa remrem Titos in siyo agpakayawte wano sa kanyo, kataw daan kami.
[17] Yewed waget sa kanyam siyabi, dayem siyo wakayte beet asin pataboy angkataw siyo beet wano agtolong sa kanyo.
[18] In osai ka belag atawanan sa boo mga barkadaan mga bodang Diyos panawen siyo agpatoldo in Maal pag Barita, siyo kanyam piyagpasarig sa kansiyo.
[19] Yewed waget in siyo atawanan, siyo iidang din in mga barkadaan mga bodang Diyos matang kanyam sarig agbaba anda pag tolong in kanyam piyagpapoonan. In kataw ina pag panawen agpalakonaw sa Kapwan, osai agpapangkit in kanyam pakayawte sa mga bodang Diyos.
[20] Anda pag tolong lakoy kanyam piyagalapet gayed maal matang idapo kapadaet sa kanyam.
[21] Kami agpilit agpangwat in betek, yewed waget sa pangkit Kapwan, kadayo din sa pangkit mangyan.
[22] Matang kanyam kay piyagpaanggat in osai kay ka belag. Siyo makakarowan kanyam tiyepeng kamay baatte kanyam ngiitan siyo agkabeet wano agtolong. Kalbas ngona labi kay siyo agkatolong wano, angkataw lakonaw wano in kansiyo tiwala sa kanyo.
[23] Ina pag Titos, siyo in kangay belag, kami agpaytolong agtolong sa kanyo. Ina wakay dayem in mga belag in kansiyo sarig, siro sogowan in mga barkadaan. Boo kansiro ogali aglakonaw kay Kiristo.
[24] Na kamo agpabelag gayed sa kansiro, matang in mga barkadaan mga bodang Diyos kangitan kamo agpakayawte, osai betek in kami aglakonaw sa kanyo.