[1] Na kataw kami mga katolong sa panawen Diyos, kami agpilit sa kanyo, ayaw aglimbang agpasandig sa kansiyo, angkataw kitam kansiyo piyagpakayawte.
[2] Kataw keyen in Diyos, Sa makaanggay pag kabetek kao kangay piyarengey. Sa kabetek agpamaboway kao kangay tiyolong. Maanda, ngona wa in makaanggay pag kabetek. Maanda, ngona wa in kabetek agpamaboway.
[3] Kami yewed agpangwat makabais kamayba kay nakay, matang idapo batay ngiitan daet sa kanyam panawen.
[4] Dayem in boo kanyam panawen piyagngitan kami sogowan Diyos. Kataw kami agbanta gayed sa mga golo, sa aronaw mga kaidapan,
[5] kami piyagbogbog, biilanggo, siyonggaban mga mangyan, kami agpanawen anggan, yewed agesek, yewed mamangan.
[6] Kaya piyagngitan kami sogowan Diyos panawen maalno in kanyam ogali, panawen kanyam atawanan, kami yewed aglimbang, kami mabait, panawen din in Betek pag Abyan, osai panawen kami agpakayawte gayed,
[7] panawen yewed bosliyen in kanyam agiplaong, osai panawen in kabaloyan Diyos. In kanyam betek pag mga ogali, in kanyam panlaban osai pansangga.
[8] Apo betek kami piyagmaal, apo betek piyagidapo kabolowan. Apo betek piyagpamalowasan, apo betek piyagpakalakonaw. Kamayba kami piyangawit bosliyen betek in kanyam piyagsabi.
[9] Kagwali kami yewed atawanan kamay atawanan daan. Kamayba kami piyagparosa kamay idbatay matay.
[10] Kamayba agrongkot kami agkaanggay daan. Tomag maidap kamay agpakayaman daan sa karowan. Kagwali idapo wano, kamay kanyam daan in boote.
[11] Mga belag sa Korinto, kami idapono piyagtago sa kanyo. Piyalowas wa sa kanyo in boo kanyam remrem.
[12] Kamo kanyam wano gayed piyagmaal, kamay kamo agkabagyaan sa kanyam.
[13] Kamo kangay bodang, ako agiplaong sa kanyo. Kataw ako agpakayawte sa kanyo, na kamo din agpakayawte sa kangay.
[14] Ayaw kamo agyanggat sa mga yewed agpaniwala. In maal osai in daet yewed mayadi piyalagem. Kataw in rawa osai in lened yewed mayadi osai waget.
[15] Yewed mayadi maybelag Kiristo osai Dimonyo. In agpaniwala yewed mayadi paagem sa yewed agpaniwala.
[16] Yewed mayadi in mga yewed Diyos agbalay sa balay lakoy Diyos. Kitam in balay in agkaboway pag Diyos. Siyo wa daan in agsabi keyen, Ako batay agpamataw sa kangay mga mangyan, agbalay sa kansiro. Ako in batay kansiro Diyos. Siro in batay kangay mga mangyan.
[17] Keyen in Kapwan, Na kamo pasoway wa, ayaw agpasabangen sa kansiro. Ayaw mangatang kamayba sa nakay pag marames. Na ako batay agkaanggay sa kanyo.
[18] Kamo batay mibaloy kangay mga bodang. Ako batay wa in kanyo amang. Ina in siyabi in Kapwan, in Apo Kabaloyan.