[1] Ngona in katolo ako asin pataboy. In Agisolat keyen, In kamayba nakay pag sombong ayaw agpaniwalaen no idapo agpatotoo dowai no yewed tolo ka mangyan.
[2] In tagoli wakay tangona ako asin sa kanyo kangay siyabi sa mga agpamangwat daet keyen ako batay wa daan agparosa. Kalbas ngona in ako adayonaw kay sa kanyo na kangay tagoli wakay piyagsabi sa kansiro, kadayo sa mga roma kay keyen, No ako asina wakay na ako batay wa daan ngani agparosa.
[3] Kaya ako agkataw ina matang kanyo ngani ngiitan Kiristo in agsogo sa kangay agiplaong sa kanyo. Siyo apo kabaloyan lakoy agpanawen sa kanyo, yewed mainaen.
[4] Kamayba tangona siyo mainaen piyako sa kodos, kamay ngona siyo agkaboway sa kabaloyan Diyos. Na panawen kami agiyagem kay Kiristo kami din mainaen. Kamay ngona in kami agiyagem ngani sa kansiyo kami din agkaboway sa kabaloyan Diyos matang agpapoon sa kanyo.
[5] Pangkiten gayed in kanyo ogali, no kamo agpaniwala ngani. Amba, kanyo remremen in kanyo sadiri. No kamo yewed agpakagwali waget agpaniwala na kamo batay katawan IsoKiristo agbalay wa sa kanyo galem.
[6] In kangay pagasa kamo batay katawan kami siyogo ngani Diyos.
[7] In kanyam pandalangin sa Diyos kamo ayaw agpangwat daet. Kaya kataw ina kanyam pandalangin, yewed matang kami piyagmaal, dayem matang kamo agpamangwat maal kamayba kami tomag piyagdaeg.
[8] Angkataw kami yewed mayadi aglaban sa betek. Dayem agalapet sa betek.
[9] Kami agkaanggay no kami mainaen no kamo agbangen maeyat. In kanyam pandalangin in boo kanyo ogali idapo wa agiyagem, mibaloy wa gayed boo betek.
[10] Kaya anda in kangay siyolat ngona in ako adayonaw kay, matang no ako rateng wa asin na idwa kailangan agparosa sa kanyo sa kabaloyan tiyaboy in Kapwan sa kangay. Anda pag kabaloyan tiyaboy in Kapwan yewed matang agpasida sa kanyo dayem agpaistobo sa kanyo paniwala.
[11] Laki mga belag, anggan atai waget. Anda wa in kalobosan. Kamo agpilit agogali boo betek. Kamo manremrem, kanyo pangwaten in kangay mga siyabi. Kamo malsangayonan, osai maybelagan. Na in Diyos agpakayawte osai agtaboy kabaloyan agpaybelagan, siyo batay agbalay sa kanyo.
[12] Kamo malkaanggayan no kamo maltagbowan. In boo mga bodang Diyos keyen, Kataw nakay wa kamo?
[13] Kamo boo pabelagen IsoKiristo kantam Kapwan. Kamo boo pakayawteen in Diyos. Osai kamo boo palagemanen in Betek pag Abyan.