[1] Ako Pablo in agsolat anda. Ako sogowan agbarita, kamay ako yewed siyogo mangyan. Yewed mangyan in omidang sa kangay, no yewed IsoKiristo, osai in Diyos Amang in agpaboway wakay tagoli sa kansiyo.
[2] Kadayo in boo mga belag atai kangay sarig, kami agsolat sa mga barkadaan mga bodang Diyos sa boo kobat Galasya.
[3] Kamo kanyam piyagpandalangin matang in Diyos kantam Amang agpakayawte osai agpakapya wa gayed sa kanyo remrem, osai IsoKiristo in Kapwan.
[4] Panawen sa kantam mga daet, tiyaboy Kiristo in kansiyo boway matang kitam piyalpas wa sa daeten pag kabetek ngona. Angkataw siyo maniwala sa beet kantam Diyos, kantam Amang.
[5] Siyo pagmaalen anggan idapo kalobosan. Ina wa ngani.
[6] Ako agsoyo sa kanyo, in kamo toloy wa pabaribid in agpasandig sa Diyos. Sa pakayawte Kiristo kamo kansiyo biyerya, kalbas kamo toloy pabaribid wakay sa roma pag barita kamo keyen maal.
[7] Kamay ina pag barita korang. Apo mga agpagolo sa kanyo remrem. Siro beet agsida sa Maal pag Barita Kiristo.
[8] Angkataw kamayba wa kami, kamayba wa angil batang sa langit, no agpatoldo wakay sa kanyo yewed in Maal pag Barita kanyam wa piyatoldo, na siyo parosaen wa Diyos.
[9] Kanyam wa siyabi, piyagolit wakay ngona, no apo agpatoldo sa kanyo yewed wakay in Maal pag Barita kanyo wa tiyanggap, na siyo parosaen wa gayed Diyos.
[10] Na nakay, tomag lames kangay piyagkabeet in piyagmaal mangyan? Yewed. Dayem in kangay piyagkabeet in piyagmaal Diyos. Tomag lames ngani in kangay beet mangyan in agmaal sa kangay? Yewed ngani. No kataw daan ina in kangay beet na ako nges ayaw wa sogowan Kiristo.
[11] Laki mga belag, ako beet kamo katawan anda. In Maal pag Barita kangay piyagpatoldo yewed batang sa mangyan.
[12] Ina yewed kangay abel sa mangyan. Yewed din mangyan in agpatoldo sa kangay. Dayem IsoKiristo wa daan in agpapangkit ina sa kangay.
[13] Kanyo wa abaritaan no kataw nakay in kangay boway tangona in ako agpaniwala kay sa mga piyagogali Odyo. Ako maloba wano agpamakaskit sa barkadaan mga bodang Diyos, agpilit wano agsida asin.
[14] Sa agadar sa mga piyagogali mga Odyo ako mabwat kay sa boo Odyo kakoyay ako, nangkataw ako agpakaeyat wano agpangwat in boo ogali kanyam mga kakoyayan.
[15] Kamay panawen in Diyos mabait ako ikkay biyodang ako kansiyo wa iidang, kalbas biyerya matang mibaloy kansiyo sogowan.
[16] Paka kansiyo wa piyamaal, na in kansiyo Bodang piyapangkit wa sa kangay matang in Maal pag Barita sa kansiyo Bodang kangay biyaba piyatoldo sa mga yewed Odyo. Paka piyapangkit wa ako yewed agtanong sa mangyan kamayba wa kay nakay.
[17] Kamayba wa sa mga katiwala Kiristo tokaw sa kangay, ako yewed pataboy sa kansiro sa Irosalim. Dayem ako tokaw pataboy sa kobat lakoy Arabya. Kadogay moli wakay sa bayan Damasko.
[18] Anggan kalbas in tolo ka dagon bayo ako pataboy sa Irosalim matang katagbo kay Pidro. Ako agpamataw sa kansiyo labing lima ka ibeng.
[19] Kamay in roma pag mga katiwala Kiristo ako idapo ngitan, no yewed Santiyago waget in ariyan in Kapwan.
[20] Totoo ngani anda in boo kangay piyagsabi. In Diyos katawan ako idapo piyagsabi baribid.
[21] Paka kalbas ina, ako pataboy sa mga bayan sa Siriya osai sa Silisya.
[22] Ina pag betek ako yewed kay atawanan in mga barkadaan mga bodang Diyos sa kobat lakoy Odiya.
[23] Siro karengey waget barita keyen in tangona agpamakaskit sa kansiro, ngona agpatoldo wa in paniwala kansiyo tangona piyagpilit piyagsida.
[24] Kalbas siro agmaal wa sa Diyos panawen sa kangay.