[1] Anda kay din in osai ka alimbawa, In bodang in batay kapwan in mga sangkap in kansiyo amang, no siyo kalakoyte kay siyo sogowan waget, ikkay siyo in agalapet, kamayba dogayan siyo in batay kapwan in boo.
[2] Siyo sakop kay sa mga agalapet, sa mga katiwala anggan sa kabetek in tarato in kansiyo amang.
[3] Kataw din ina kitam. In kitam yewed kay kay Kiristo kitam piyagpansakop kay mga mamaw in apo kabaloyan atai sa boo kobat.
[4] Kamay paka rateng wa in tarato, siyogo Diyos in kansiyo Bodang. Siyo biyoslot kagbaiyan. Siyo Odyo sakop sa mga Batas.
[5] Kaya siyo siyogo matang kansiyo piyalpas in mga sakop sa mga Batas. Na ngona kitam mibaloy wa gayed mga bodang Diyos.
[6] Kaya atawanan kitam mga bodang Diyos, angkataw kitam piyakan in Abyan kansiyo Bodang sa kantam galem, matang kitam agsabi sa kansiyo keyen, Mambey, Amang.
[7] Na kitam idwa sogowan, no yewed bodang wa. Na kataw bodang wa, kitam piyangwat wa din Diyos batay kapwan.
[8] Tangona in yewed kay kanyo atawanan in Diyos, kamo sakop sa mga yewed Diyos.
[9] Kamay ngona kanyo wa atawanan in Diyos. In maal kay nges kangay siyabi keyen kamo atawanan wa in Diyos. Na nakay batang kamo moli wakay sa mga mamaw tangona agpansakop sa kanyo? Siro idapo eyat, idapo kabolowan. Nakay batang kanyo wakay beet pasakop asin?
[10] Kanyo piyagpaniwalaan in mga ibeng, in mga bolan, in mga kabetek, osai in mga dagon.
[11] Ako agkariyaban, karam idapo wa kabolowan in kangay eyat agpanawen sa kanyo.
[12] Mga Belag, ako agateet sa kanyo. Ako kanyo toladen in ako idwa agpanremrem sa mga Batas, kataw ako agtolad sa kanyo in kamo yewed sakop sa mga Batas. Tangona kitam agpaybelagan.
[13] Kanyo atawanan kaya ako tangona kapatoldo sa kanyo in Maal pag Barita panawen ako apo maskit.
[14] Kamayba kataw ina ako yewed kanyo piyaglado, yewed piyagkaramesan panawen sa kangay maskit, kamayba wa ina maidap sa kanyo. Dayem ako kanyo piyabelag gayed maal kataw in angil batang sa Diyos, kataw wa daan Kiristo Isos.
[15] Tangona kamo agkaanggay wano. Na nakay batang ngona idwa? Ako wa daan in agsabi, no nges maal kiyaslot in kanyo mga mata matang taboyen sa kangay, na ina wa nges in kanyo piyangwat.
[16] Ngona ako agpansabi kay in betek. Na nakay, panawen ina ako kanyo piyagkadaetan?
[17] Ina pag mga bosliyen pag agpatoldo tomag agpakayawte sa kanyo, kamay yewed maal in kansiro remrem. In kansiro waget beet kamo agawen sa kangay matang kamo agpakayawte sa kansiro.
[18] Maal in apo agpakayawte sa kanyo no maal in kansiro remrem. Dayem nges palagi kataw ina kitam, ayaw waget sa kabetek ako asin sa kanyo.
[19] Laki kangay mga bodang, panawen sa kanyo ngona wakay ako agkaskitan wa labi kataw inang agkaboslotan, anggan Kiristo piyagngitan wa gayed sa kanyo boway.
[20] Kangay nges beet ako katagbo wa sa kanyo matang kitam manggisodan gayed na kangay wa asabi sa kanyo in boo kangay remrem. Kataw agkagolo wa labi kangay remrem panawen sa kanyo.
[21] Amba, kamo in mga agkabeet wakay pasakop sa mga Batas, yewed lames kanyo piyagparengey in piyagsabi sa mga Batas?
[22] In piyagsabi asin keyen, Abraanɩ apo dowai ka bodang. In osai Ismail in bodang sa sogowan waget, in osai wakay Isaak in bodang sa babai wa daan gayed.
[23] In bodang sa sogowan biyodang kataw waget kitam mga mangyan. Kamay in bodang sa babai gayed biyodang panawen in pangako Diyos.
[24] Asin pag dokabai apo alimbawa. In dokabai, na kantam remremen ina dowai ka kasondowan. Agar agbangen in alimbawa sa kasondowan apo in mga Batas piyangwat sa Boksor Sinai. In kansiyo mga bodang boo sogowan waget.
[25] Agar alimbawa sa Boksor Sinai sa kobat Arabya. Kamay ngona siyo alimbawa din sa bayan Irosalim, angkataw in mga mangyan asin pag bayan sakop asin pag mga Batas.
[26] Kamay Sara in babai gayed, ina alimbawa sa Irosalim sa langit. Ina in yewed sakop. Siyo in kantam inang.
[27] Angkataw in mga Agisolat keyen, Laki kagbaiyan yewed agpamodang, kao agkaanggay wa. Kao agkaanggay wano, kao in idbatang domalan sa kaidapan agboslot. Angkataw in biyaliwan pag kagbaiyan karowan wa in batay kasokponan, labi kay karo in apo lalaki.
[28] Mga belag, kataw Isaak biyodang sa babai gayed panawen sa pangako Diyos, na kataw din ina kitam bodang wa Diyos panawen sa pangako.
[29] No kataw tangona in biyodang sa kabaloyan in Abyan Diyos piyaidapan in biyodang kataw waget kitam mga mangyan, na kataw din ina ngona.
[30] Kamay in siyabi in mga Agisolat keyen, Boyawen in kagbaiyan sogowan, kadayo in kansiyo bodang. Angkataw in bodang in sogowan yewed mayadi piyakan bagiyan in mga sangkap. In boo sangkap piyagtaboy sa bodang in babai gayed.
[31] Na, mga belag, kitam yewed mga bodang sa sogowan, no yewed bodang sa babai gayed.