[1] Kaya kitam piyalpas wa Kiristo sa mga Batas, matang kitam agipalpas ngani. Na kitam agpakarigen, matang ayaw wakay sakop asin pag mga Batas.
[2] Ako Pablo in agsabi, ayaw malibangaw in kangay piyagsabi. No kamo agpatoli kay, na Kiristo kanyo piyagpaidapo kabolowan.
[3] Kangay wakay piyagolit, kamayba nakay pag agpatoli, kailangan siyo maniwala sa boo wano mga Batas.
[4] No kamo agpilit agpaniwala sa mga Batas matang nges piyangwat Diyos idapo daet, na kamo pasoway wa kay Kiristo, pasoway wa sa Diyos in agpakayawte nges sa kanyo.
[5] Kamay no sa kanyam, sa kabaloyan in Abyan Diyos, osai panawen sa agpasandig kay Kiristo kami agpanaya in kami batay piyangwat Diyos idapo daet.
[6] Angkataw no in mangyan agiyagem kay Kiristo Isos, na idapo wa kabolowan kamayba tiyoli kamayba yewed tiyoli. Dayem in apo kabolowan in agpasandig sa kansiyo. Ina piyagngitan sa agpakayawte sa amat.
[7] Maalen wa nges tangona in kanyo panawen. Nakay in ageleg sa kanyo sa agpaniwala sa totoo?
[8] Nangkataw siyo agpilit sa kanyo? In kataw ina pag agpilit yewed batang sa Diyos. In Diyos in agberya sa kanyo.
[9] Apo alimbawa keyen kamayba kalakoyte waget in piyaagem pamaistobo tinapay na mistobo lakoy in boo tikmel.
[10] Panawen kitam boo agiyagem sa Kapwan ako apo tiwala sa kanyo in kanyo batay remrem kataw wa daan in kangay. Osai in agpagolo sa kanyo batay ngani piyarosaan Diyos, kamayba nakay pag mangyan.
[11] Mga belag, no ako agbarita keyen kailangan agpatoli, na nakay batang ako piyagpaidapan kay? No ina totoo, na nges yewed batay makagalit in kangay patoldo panawen sa katayan Kiristo.
[12] Kalbas asina sa mga agpanggolo sa kanyo kangay nges beet siro ayaw waget agpatoli dayem padodowen wa gayed.
[13] Mga belag, kamo biyerya Diyos matang kamo agipalpas. Kamay kataw ngona kamo agipalpas, na ina ayaw agpangwaten dailan agpamangwat kamaybawate nakay pag daet in beet kanyo remrem. Dayem maytolongan kamo panawen sa agpaybelagan.
[14] Angkataw osai waget ka agiplaong in galem in boo mga Batas. Ina keyen, Pakayawteen in roma mangyan, kataw wa daan in kanyo bilog.
[15] Kamay no kamo agkataw ayop, agpalkayatan, agpangamol, na agingat, karam isag kamo idapo wa tera.
[16] Anda wakay in kangay piyagsabi keyen, In kantam mga ogali pasakopen sa Abyan Diyos. Na kitam idbatay agpangwat ln piyagkabeet waget kantam bilog.
[17] Angkataw in piyagkabeet kantam bilog aglaban sa beet in Abyan Diyos. Osai in Abyan aglaban sa piyagkabeet kantam bilog. Agpaylaban ina pag dowai, matang yewed kantam apangwat in beet nges piyangwat.
[18] Kamay no kantam ogali piyagpasakop sa Abyan, na kitam idwa sakop sa mga Batas.
[19] Atawanan in mga piyagpangwat in piyagkabeet kansiyo waget bilog, ina in mga agpanggaraw, mga marames, mga makarikoy pag panawen,
[20] in agsamba sa yewed Diyos, in agbalaon, in agkabais, in agpalaway, in agpanagiri, in daet remrem, in ayawan, in dayo mangako, in agpaylabanan,
[21] in agpangayaw, in agpanlasing, in daeten pag mesaan, anggan in roma kay pag mga kataw ina. Kamo kangay piyagpatoldo kataw tangona keyen, In mga agpamangwat kataw ina idbatay piyakan bagiyan sa sakopan Diyos.
[22] Anda wakay in mga batang sa Abyan, in agpakayawte, in agkaanggay, in apyaan in remrem, in yewed galiten, in mabait, in maalen, in yewed aglimbang,
[23] in kabwatte remrem, osai in kabaloy agsakop sa kansiyo remrem. Idapo batas laban sa mga kataw ina.
[24] In mga kay Kiristo Isos, in kansiro datiyan remrem, anggan in datiyan mga piyagkabeet kansiro wa biyono.
[25] In Abyan in agtaboy boway sa kantam, na kailangan kitam pasakop wa sa kansiyo.
[26] Ayaw kitam agyabang, ayaw matapang, ayaw agpanagiri.