[1] Kangay remrem ayaw kay asin pataboy sa kanyo matang kamo idbatay wa kangay piyakarongkot.
[2] Angkataw no kamo kangay piyakarongkot, na idapo wa batay agpakaanggay sa kangay, angkataw kamo kangay wa piyakarongkot.
[3] Ina in dailan kaya ako agsolat taite sa kanyo. Matang no ako asina wa, na ako idbatay wa agkarongkot sa kanyo. Kamo nges in agpakaanggay sa kangay. Angkataw in kangay atawanan, in makaanggay sa kangay, na makaanggay din sa kanyo boo.
[4] In ako agsolat sa kanyo, in kangay remrem maloba wano gayed agrongkot. Ako agpanangis wa gayed. Kaya kamo kangay siyolatan yewed matang agpakarongkot sa kanyo, dayem matang kanyo atawanan ako agpakayawte wano sa kanyo.
[5] In taite agpangwat lakoy daet agpakarongkot, na yewed ako agbangen in piyakarongkot, no yewed kamo boo. Kamay ako idbatay aglampas sa betek, yewed yangon kamo boo in piyakarongkot.
[6] Kamay karowan sa kanyo in agparosa sa kansiyo. Na ina sibay wa.
[7] Ngona kanyo libangawen in kansiyo daet. Pakaeyaten in kansiyo remrem, matang idbatay mistobo in kansiyo rongkot anggan omempet wa gayed sa paniwala.
[8] Kangay gayed beet sa kanyo, papangkiten sa kansiyo siyo kanyo kay gayed piyagpakayawte.
[9] In osai kay ka dailan kaya ako agsolat sa kanyo, matang kangay atawanan no kanyo piyagpaniwalaan in boo kangay piyatoldo sa kanyo.
[10] No kanyo wa liibangaw in piyangwat daet kamayba nakay pag mangyan, na kangay wa din liibangaw. In daet kangay liibangaw, no ngani apo, na kaya kangay liibangaw panawen sa kanyo sa adap Kiristo,
[11] matang kitam yewed diyaeg Katanas. Angkataw kitam katawan in kansiyo mga padalan.
[12] Paka ako rateng sa Torowas, matang agpatoldo in Maal pag Barita Kiristo, kangay ngiitan in mga mangyan siyandata wa in Kapwan matang ako ista agpanawen.
[13] Kamay ako agkariyaban nangkataw yewed kangay ngiitan kantam belag Titos. Kalbas ako panaw asin pag mga mangyan, pataboy wa sa Masidonya.
[14] Kamay ako agkaanggay sa Diyos. Panawen kitam piyaagem kay Kiristo kitam palagi piyagpaanggat Diyos sa parada Kiristo in siyo mandaeg. Kitam sangkap Diyos matang agparateng in barita Kiristo sa boo kobat, kagwali mala masadap.
[15] Kitam kagwali mala masadap, piyagtaboy Kiristo sa Diyos. Aarekan din in mga piyagpaboway, anggan din in mga agitaboy sa toyongan.
[16] Sa mga agitaboy sa toyongan mala daet, mala makakatay. Dayem sa mga piyagpaboway na mala masadap, mala agtaboy boway. Nakay lames in apo kabaloyan kapangwat kalakoy ina pag panawen?
[17] Kami yewed kataw in roma agpabili waget in barita Diyos. Kami dayem siyogo Diyos. Sa kansiyo pangkit kami agbarita kansiyo mga agiplaong idapo piyaagem. Kami sogowan ngani Kiristo.