[1] Idwa kailangan ako agsolat sa kanyo panawen asin pag tolong sa mga bodang Diyos.
[2] Angkataw ako katawan kamo beet agtolong. Kamo kangay piyaglakonaw sa mga taga Masidonya. Kadagon kay in kangay siyabi sa kansiro kamo in mga taga Akaya beet wa agtolong. Kalbas siro aronaw in aakayan agtolong sa kanyo pakayawte.
[3] Kamay anda pag mga belag kangay piyagpatokaw asin matang ngiitan totoo in boo kangay siyabi panawen sa kanyo, kamo sandata wa daan ngani kataw in kangay siyabi.
[4] No in taga Masidonya apo miyanggat sa kangay, kalbas kansiro ngiitan kamo yewed kay sandata na kami batay arikoyan, kadayo din kamo panawen kami batang agpakalakonaw sa kanyo.
[5] Ina in dailan kaya anda pag mga belag kangay piilit piyagpatokaw, matang agtolong sa kanyo agimis in kanyo piyangako tolong. No isag ako rateng masandata wa na ngiitan wa ngani in kamo wakayte agtaboy yewed piyagpilit.
[6] Amba, kanyo remremen. In agasik kalakoyte, na kalakoyte din in batay abel. In agasik wakay dayem lakonaw, na lakonaw din in batay abel.
[7] In baatte mangyan agtaboy no nangkalakoy in kansiyo remrem. Ayaw mabyat sa remrem, yewed sa piyagpilit waget pag agtaboy. Angkataw in agkaanggay pag agtaboy in makaanggay sa Diyos.
[8] In Diyos kabaloy agpakarowan sa kantam anggan lampas kay sa kantam piyagkailangan. Matang kitam baatte katolong sa mga maidap.
[9] Angkataw in Agisolat keyen, In Diyos agtaboy sa mga maidap anggan agbongsod. Siyo mabait wano anggan idapo kalobosan.
[10] In Diyos agtaboy in bini piyagasik, osai pamangnen. Na siyo daan din in batay agtaboy sa kanyo in kagwali bini osai in batay agpaistobo matang lakonaw in galem in lakonaw kanyo piyagtaboy.
[11] Kamo kansiyo batay piyagpayaman sa boote, matang kamo labi kay batay katolong sa karowan. Na in galem ina pag agtolong in karowan in batay agkaanggay sa Diyos panawen sa kanyo tolong kanyam piyagbaba sa kansiro.
[12] Angkataw anda pag kantam tolong sa mga bodang Diyos, yewed waget matang siro apyaan, dayem panawen asin aronaw wano in agkaanggay sa Diyos.
[13] In kanyo piyagtaboy lakonaw, ina tanda kanyo paniwala sa Maal pag Barita Kiristo yewed waget sa agiplaong dayem piyagngitan wa daan sa kanyo panawen. Siro agkaanggay wano sa Diyos panawen sa kanyo tiyaboy sa boo, osai panawen sa kanyo paniwala.
[14] Kalbas kamo kansiro batay piyagpanremrem piyagpandalangin, angkataw kansiro ngiitan in Diyos agpakayawte din sa kanyo.
[15] Kitam wa agkaanggay sa Diyos sa kansiyo lakoy tiyaboy sa kantam. In kalakoyen ina lakonaw lakoy, idapo wa batay kalakoy ina.