[1] Angkataw kantam atawanan paka mabinlayan wa in dampa in kantam ngona piyagbalayan in kantam bilog, na kitam apo wakay bilog sa langit, pagbalayan piyangwat Diyos, yewed mangyan. Ina idbatay mabinlayan anggan dogayan.
[2] Atai pag balay kitam agdaing, beet wano malkoyog sa kantam balay sa langit.
[3] Matang no malkoyog wa kitam idbatay ngiitan idapo bilog.
[4] No kitam agpamataw kay atai pag dampa, in bilog atai sa kobat, na kitam agdaing, agkabiyatan. Yewed sa beet idapo wa anda pag bilog, dayem sa beet ina piyalitan wa in sa langit pag bilog. No kataw ina wa, na anda pag bilog in agkatay piyalitan wa boway idapo kalobosan.
[5] In Diyos wa daan in agsandata sa kantam matang miyalis kataw ina. Osai piyagtaboy sa kantam in kansiyo Abyan, matang kantam atawanan batay din piyagtaboy in boo kansiyo mga pangako.
[6] Na palagi maeyat in kanyam remrem. Kanyam atawanan no kitam atai kay pag balay, atai pag bilog, na kitam idapo kay sa balay in Kapwan.
[7] Angkataw kitam agkaboway panawen sa agpasandig sa Diyos, yewed panawen sa mga piyagngitan.
[8] Maeyat in kanyam remrem. Kanyam beet biyaliwan wa anda pag bilog, agpamataw wa sa bangen in Kapwan.
[9] Kamay labi kay sa boo in kanyam beet kami makaanggay sa Kapwan kamayba kami saano, kamayba atai, kamayba sa langit.
[10] Angkataw kitam boo batay piyaadap kay Kiristo, matang piyagpakan bayad sa kantam mga panawen in kitam agkaboway kay sa kobat, kamayba maalno, kamayba daeten pag panawen.
[11] Kaya kami agpilit agpaanggat sa mga mangyan matang moli wakay sa Diyos, angkataw kami katawan in beet siyabi agkalimo sa Kapwan osai agmaal sa kansiyo. In Diyos katawan in boo kanyam remrem. Osai kanyam beet kami kanyo wa din gayed atawanan.
[12] Ina kangay piyagsabi yewed matang agpakalakonaw sa kanyam sadiri, dayem matang kamo piyakan dailan agkaanggay sa kanyam. Osai matang kamo apo wa sagot sa agpakalakonaw sa bilog mangyan yewed sa kansiyo galem.
[13] No tomag masida wa in kanyam remrem na panawen sa Diyos. Kamay no maalno in remrem, na matang kamo piyagtolong.
[14] Kaya kami agkataw ina angkataw kami piyagpapoon in Kiristo agpakayawte sa kantam. Kataw sa kanyam remrem no in osai matay panawen sa boo mangyan, na in boo matay miyanggat sa kansiyo.
[15] Siyo matay panawen sa boo mangyan matang in mga agkaboway ngona idwa agpangwat in kansiro datiyan piyagkabeet, dayem in piyagkabeet in Kapwan, angkataw siyo in matay panawen sa kansiro kalbas tagoli wakay boway.
[16] Na ngona in kanyam remrem sa mangyan yewed sa bilog. Tangona kataw ina in kanyam remrem kay Kiristo, kamay ngona idwa.
[17] Kataw no in osai ka mangyan paagem wa kay Kiristo, na siyo bayo piyangwat. In boo mga tangona kalbas wa. Maanda in boo bayo wakay.
[18] Ina pag boo in Diyos in agpangwat. Panawen kay Kiristo kitam kansiyo wa piyabelag, yewed wa kaaway. Osai kami kansiyo iidang matang paoliyen sa kansiyo in mga mangyan.
[19] In kangay beet siyabi, in boo mangyan piyagpabodang Diyos panawen kay Kiristo. Kansiyo wa liibangaw in kansiro mga daet. Osai kansiyo tiyaboy sa kanyam ina pag barita in siyo agpabodang, siyo aglibangaw daet.
[20] Na kami siyogo Kiristo. Kagwali in Diyos wa din agpilit sa kanyo, kami in sogowan keyen, Kamo moli wakay sa Diyos.
[21] Kiristo idapo batang daet. Kamay piyababa sa kansiyo in kantam daet, matang kitam mipaagem sa kansiyo, betek sa pangkit Diyos.