[1] Kaya maeyat in kanyam remrem, angkataw in Diyos agpakayawte sa kanyam, kami kansiyo iidang asin pag panawen.
[2] Kami idwa agpangwat in mga makarikoy pag panawen, mga ogali piyagbetang. Kami yewed agpadaya, yewed kanyam piyagsongi in Agiplaong Diyos. Dayem in betek in kanyam piyagpatoldo sa boo mangyan, matang in boo kangitan kami agpangwat maal sa pangkit Diyos.
[3] No apo kay tabon in Maal pag Barita kanyam piyagpatoldo, na in mga waget agitaboy sa toyongan in idbatay kangitan.
[4] Kaya siro yewed agpaniwala, angkataw kansiro remrem biyeleg in piyagpaniwalaan atai sa kobat, matang yewed kansiro ngiitan in rawa in Maal pag Barita panawen sa kalakoyen Kiristo. Siyo kataw daan in Diyos.
[5] Kiristo Isos in Kapwan in kanyam piyagpatoldo, yewed in kanyam sadiri. Kami kanyo waget sogowan panawen kay Kiristo.
[6] Angkataw in Diyos tangona in agsabi keyen, Batang sa lened agrawa wa. Na siyo daan in agrawa sa kanyam mga remrem, matang kanyam atawanan in kalakoyen Diyos agrawa sa mata Kiristo.
[7] Kami in piyakan ina pag kayamanan, in atawanan sa kalakoyen Diyos, kami kagwali waget mga keden, matang atawanan in kabaloyan lakonaw sa boo ina batang sa Diyos, yewed sa kanyam.
[8] Kami palagi piyagpaidapan kamay idbatay diyaeg, piyagbaslag in remrem kamay yewed abyatan kanyam remrem,
[9] piyagpangwatan daet kamay yewed piyagbaliwan idapo belag, piyagpakaskitan kamay yewed matay.
[10] Kami kataw daan Isos palagi agkatay in kanyam bilog, matang in kansiyo boway piyagngitan din sa kanyam bilog.
[11] Anggan agkaboway kay baatte kami piyagkabono panawen kay Isos, matang in boway Isos piyagngitan sa kanyam agkatay pag bilog.
[12] Na kami baatte piyagbono kamay panawen ina kamo piyagpaboway Kiristo.
[13] Piyagsabi sa mga Agisolat keyen, Kaya ako agiplaong angkataw ako agpaniwala. Kataw din ina in kanyam paniwala. Kaya kami agiplaong angkataw kami agpaniwala.
[14] Angkataw kantam atawanan in Diyos in agpaboway wakay sa Kapwan Isos, siyo daan in batay agpaboway wakay sa kanyam, sarig Isos. Siyo din in batay agbaba kantam boo sa kansiyo bangen.
[15] In boo kanyam kaidapan panawen sa kanyo. Matang karowan kay in batay katawan siro piyagpakayawte Diyos, na karowan in agkaanggay, agpakalakonaw sa kansiyo.
[16] Kaya maeyat in kanyam remrem, angkataw kamayba agkaidapo eyat in bilog, in abyan palagi piyagpaistobo in eyat.
[17] No piyagpaytikkalakoy osai in kanyam kadogayte pag mga kaidapante ngona osai in kapalit dogayan kaanggayan, na labi kay lakonaw in kaanggayan agbangen anggan idapo kalobosan.
[18] Na yewed mga piyagngitan in kanyam piyagpanremrem, dayem in mga yewed piyagngitan. Angkataw kadogayte waget in mga piyagngitan, kamay idapo kalobosan in mga yewed piyagngitan.