[1] Dayem nges kamo agbanta sa kangay batay siyabi badyate idapo bait. Amba mamarengey wa ngani sa kangay piyagsabi.
[2] Kamo kangay piyagpanagiriyan kataw in panagiri Diyos. Kamo kataw osai ka daraga kangay piyangako batay piyagpakasal kay Kiristo. Siyo waget in kaliyakiyan maal batay lalaki.
[3] Kamay ako agkariyaban karam kanyo remrem batay wa mipadaet, batay wa agpanremrem sa roma, idwa Kiristo in piyagkabeet gayed. Kataw Iba piyabaribid in olay.
[4] Angkataw no apo agrateng agbarita sa kanyo osai wakay ka Isos, idwa in kanyam biyarita, na kanyo piyagkaanggay piyagparengey. Kalbas kanyo wa piyagtanggap in osai wakay ka abyan idwa in kanyo tiyanggap sa kanyam, kanyo wa piyagpaniwala in osai wakay ka adar, idwa in kanyam piyatoldo sa kanyo.
[5] Kamay in kangay remrem ako kalakoy daan ina pag mga agpamarita kanyo piyaglakonaw.
[6] Kamayba yewed makaparengey in kangay agiplaong, kamay sa boote padalan baatte kangay piyapangkit sa kanyo in lakonaw kangay atawanan.
[7] Karam ako somala in ako agpakaidap matang kamo piyalakonaw, in ako yewed mangayay kabayadan sa kanyo in ako agpatoldo sa kanyo in Maal pag Barita batang sa Diyos.
[8] Tangona in ako agpatoldo sa kanyo, in amat pag mga barkadaan mga bodang Diyos in agtaboy sa kangay. Kagwali siro kangay piyagagawan matang waget kamo piyagtolong.
[9] In ako sa kanyo, kamayba nakay pag betek ako akorangan ako yewed manlepes kamayba wa kay nakay. Angkataw in mga belag batang sa Masidonya in agtaboy in kangay mga piyagkailangan. Ibat sa parakayan ako agpilit yewed agpaidap sa kanyo kamayba nangkataw. Kamayba wa nangkadogay kamo idbatay kangay piyagpaidapan.
[10] Angkataw idapo baribid in Kiristo in agbalay sa kangay, na totoo ngani ako idbatay daan manlepes sa boo kobat Akaya, matang idapo batay kapaempet sa kangay piyaglakonaw.
[11] Kangay piyagsabi ina, yewed panawen ako yewed agpakayawte sa kanyo. In Diyos katawan kamo kangay wano piyagpakayawte.
[12] Ako idbatay agalis in kangay ogali sa kangay panawen. Matang ina pag mga agyabang agpamarita yewed mayadi agsabi keyen in kansiro ogali sa panawen kataw daan in kanyam piyagpangwat.
[13] Siro baribid pag mga agpamarita. Siro agpadaya waget, agpakagwali waget mga katiwala Kiristo.
[14] Ina idbatay makasoyo, angkataw kamayba Katanas agpakagwali daan angil agrawa.
[15] Na yewed makasoyo no kansiyo mga sogowan agpakagwali betek pag sogowan. Kamay dogayan in kansiro parosa kalakoy daan sa kansiro mga piyangwat daet.
[16] Datiyan kangay piyagsabi keyen ayaw kanyo agremremen ako idapo bait. Kamay no kataw ina ngani in kanyo remrem, na maal din matang ako maal kay agyabang kataw ina idapo bait.
[17] In kangay piyagsabi agkayabangan waget kagwali idapo bait. Anda yewed batang sa Kapwan.
[18] Kataw aronaw mangyan in agyabang sa mga atai sa kobat, na ako din batay agyabang.
[19] Baina, kanyo remrem kamo katawan sa boote, na kamo katawan din agtiis sa mga idapo bait.
[20] Baina ngani kamayba kamo piyagsakop, piyaglingig osai piyagbantalaan, piyagidapo kabolowan, piyagsampek, baina, ina pag boo kanyo piyagbanta.
[21] No kataw ina ngani in kanyo beet, na kami somala, angkataw kami idbatay kabaloy agpangwat kataw ina. Ako agaway kay sa idapo bait. Kamayba nakay in piyaglakonaw in amat, na ako kapalakonaw din asin.
[22] No siro mga Ibriyo, na ako din. No siro mga kasokponan Israil, na ako din. No siro kasokponan Abraam, na kadayo din ako.
[23] In ako agiplaong kataw tai ako agpakagwali idapo ngani bait, kamay no siro sogowan Kiristo, na ako labi kay kataw in sa kansiro. Baina, sa karowen panawen ako idwa gayed katokor. Ako makakarowan wa piiriso, makakarowan wa biyogbog, makakarowan din batay wa nges biyono.
[24] Ako makalima wa biyogbog mga Odyo, baatte tatlompot siyam ka bogbog.
[25] Makatolo wa ako piyanggaroti. Makaosai ako piyamenglayan bato. Ako makatolo karanas sa aleggeban mapor. In makaosai boo yabi boo ibeng ako agilotang sa dagat.
[26] In ako mapret agipanawan aronaw makalimo in kangay diyalan, kataw in mga sapa lakoy bongkalos, osai mga tolisan, kataw in galit mga Odyo, kadayo in sa mga yewed Odyo, osai din in mga makalimo sa bayan, osai in sa mga kobat waget, osai sa dagat, in mga makalimo sa mga agpakagwali waget belag.
[27] Ako batang ageyat wano anggan wa agpanromir, yewed katokor agesek. Ako batang wa maloba agkayawes, agkainem. Mapret ako piyagdimla angkataw idapo kowaan benang.
[28] Yewed waget ina. Kamayba in mga barkadaan mga bodang Diyos kangay din piyagkariyaban ibengibeng.
[29] No apo mainaen na ako agkabiyatan. No apo yaakay agempet sa agpaniwala, na ako maloba agkaibengan.
[30] No kailangan ako agpayabang, na in ako mainaen, ina in kangay piyaglakonaw.
[31] Ako yewed agsabi baribid. Ina atawanan in Diyos in Amang Isos kantam Kapwan. In kansiyo ngaran pagmaalen anggan idapo kalobosan.
[32] In ako sa bayan Damasko, in gobirnador sakop sa poon lakoy Aritas agpangwat damay sa mga sakbawan bayan matang nges ako diyakep.
[33] Kamay ako siyoroy sa galang lakoy, kalbas piyalooy sa awak agbangen alabat lakoy bato, matang ako mipalpas wa.